Yoswa 1
1
Kaseleredu ka ŵaYisraele mu charu cha chipanganu
1Pavuli pa nyifwa yaku Mosese mteŵeti wa Ambuya, Ambuya angunena ndi Yoswa mwana waku Nuni, mteŵeti waku Mosese, 2“Mosese mteŵeti wangu wafwa; viyo sono usoke, wambuke, Yordane uyu, iwe ndi ŵanthu wose yaŵa, murutenge ku charu cho ndituŵapaska ŵaYisraele. 3Malo ghose gho phazi lako lamukandapo ndapaska kwaku imwe, nge ndimo ndingupangirana ndi Mosese. 4Kwamba ku bozwa ndi Lebanoni uyu kwachifika ku msinji ukuru, msinji wa Efrate, charu chose cha ŵaHiti kufika ku Nyanja Yikuru#1.4 Nyanja Yikuru: ndiyo Nyanja ya Mediteraniyani. kumasereru gha dazi yikaŵanga mphaka yinu. 5Paulengevi munthu mweniyo wakaziŵanga kuma paurongo pako mu umoyo wako wose; nge ndimo ndinguŵiya pamoza ndi Mosese, ndimu ndikaŵiyanga ndi iwe, kuti ndikakujowonga cha. 6Uŵi wanthazi, khwima mtima; chifukwa iwe ukahariskanga khamu ili charu cho ndingurapiya auskeu kuŵapaska. 7Ukhome ŵaka ndipo uchinthi ukongwa; kuŵa wakuphwere kuchita kwakuyana ndi langulu lose lo mteŵeti wangu Mosese wangukulanguliya, ungalisiyanga kurata ku janja la marghe pamwenga la maze mwakuti uŵi ndi kusakata kwamampha ko kose ukayanga. 8Buku ili la marangu lireke kutuwa mu mlomo wako, kweni ughanaghanenge nagho msana ndi usiku, alinga kuti uŵenge wakughaphwere kuchita chose chakulembeka mwaku lo, mwaku ichi ukasakatanga ndipo kukaŵanga ndi usakati wamampha. 9Asi ndakulanguliya? Uŵi wanthazi, khwima; ungopanga cha, nanga nkhufipa mtima; pakuti Ambuya Chiuta wako we pamoza nawe ko ukayanga.”
10Sono Yoswa wangulanguliya ŵaraŵara ŵaŵanthu, 11“Porotani mu ugoŵi, ŵaneniyeni ŵanthu wo, kuti ‘Jirongosoliyeni kamba, chifukwa mukati mu mazuŵa ghatatu mukambukanga Yordane uyu, kwachisere, kwachironda-ronda charu cho Ambuya Chiuta winu wamupaskani kuchironda.’ ”
12Ndipo ku ŵina Rubene ndi ŵina Gadi, ndi fuku la ŵina Manase, Yoswa wanguti, 13“Kumbukani mazu gho Mosese mteŵeti waAmbuya wangumulanguliyani imwe, kuti, ‘Ambuya Chiuta winu watumupaskani malo gha chipumulu, wakamupaskaninga charu ichi.’ 14Ŵawoli ŵinu, ŵana ŵinu ŵamanaŵamana, ndi ng'ombe zinu vikajanga mu charu cho Mosese wakukupaskani ku Yordane, kweni ŵanthu wose wo ndi zingwazi mukati mwinu ŵambukenge ŵakuskomaskoma paurongo pa ŵabali ŵinu kwachiŵawovya, 15mpaka po Ambuya apaska chipumulu ku ŵabali ŵinu ndipo so ndi kwaku imwe, ndipo nawo so ŵaŵa nacho charu cho Ambuya Chiuta winu waŵapaska; pavuli paku cho mukawerenga ku charu cho nchinu, ndipo mwa muja mwaku cho, charu cho Mosese Mteŵeti wa Ambuya wakukupaskani kusirgha ku Yordane kumatuli gha dazi.” 16Ndipo ŵangwamuka Yoswa, ŵanguti, “Tikachitanga chose cho watilanguliya, ndipo tikarutanga kose ko ukatitumanga. 17Nge ndimo tinguvwiya Mosese mu vinthu vyose, ndimu tikavwiyanga ndi iwe; kweni Ambuya Chiuta wako pe mphanyi waŵa nawe, mo wanguŵiya ndi Mosese! 18Yo yose wakagarukiyanga dangu lako ndi kureka kuvwiya mazu ghako, mwaku chose cho wamulanguliya, wabayike. Uŵi ŵaka wanthazi ndi wakukhwima.”
Currently Selected:
Yoswa 1: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
