Yoswa 2

Yoswa watuma ŵanthu ŵaŵi kuskola Yeriko

1Ndipo Yoswa mwana waku Nuni wangutuma ŵanthu ŵaŵi mwakubisika kutuwa ku Shitimu kuskola charu, wanguti, “Rutani, kaskoleni charu, ukonga viŵi Yeriko.” Ŵanguruta ŵangufika ku nyumba ya munthukazi mureŵi yo wadanikanga Rahabe, ndipo ŵangugona kwenikuwa. 2Ndipo kunguneneka ku karonga waku Yeriko, “Awona, ŵanyake ŵa ŵaYisraele ŵaza kunu usika uno kuzachisola charu.” 3Sono karonga waku Yeriko wangutuma kwaku Rahabe, wakuti, “Tuzga ŵanthu wo ŵaza kwako, wo ŵemu nyumba yako; pakuti ŵaziya kuskola charu chose.” 4Kweni munthukazi yo wanguto ŵanthu ŵa ŵaŵi wanguŵabisa; ndipo wanguti, “Mbuneneska, ŵanthu ŵanguza kwangu, kweni ko ŵangutuliya ndengavi kuziŵa; 5ndipo po likomo lenga pafupi kujarika, kuchifipa, ŵangutuwa; ndipo ko ŵanthu wo ŵakulazga kuti ndiziŵa cha, muŵarondo ruŵi, makaŵasaniyanga.” 6Kweni iyo wanguŵatore pa bagha pachanya, wanguŵabisa mu mapesi gha magumbwa gho ghanguyalikika umampha pa bagha. 7Viyo ŵanthu ŵanguŵarondo mu thowa yaku Yordane kufika ku madowoko; po ŵangutaka ruti ŵakuŵarondo, likomo lingujarika.

8Ŵenga ŵandagone tulo, wangukwere kwaku iwo munthukazi yo, 9wangunena nawo, “Ndiziŵa kuti Ambuya ŵakupaskani charu ichi, ndikuti chofyo chinu chasikiya paku ifwe, wose ŵakuja mu charu ichi ŵasongonoka paurongo pinu. 10Chifukwa tikuvwa mo Ambuya angukamuskiya maji gha Nyanja Yiyera paurongo pinu muchituwa mu Egipiti, ndipo ndi vyo munguchita ku ŵakaronga ŵaŵi ŵa Amori wo ŵenga kusirgha ku Yordane, kwaku Sihoni ndi Ogi, wo mukuŵaparghang'a tetete. 11Ndipo tinguti tavwa ghenigho, mitima yidu yingusongonoka, ndipo pengavi munthu nanga njumoza yo wangujako wakukhwima, chifukwa chine; pakuti Ambuya Chiuta winu ndiyo Chiuta wa kuchanya ndi charu chapasi. 12Iku sono, mundirapiye ku Ambuya kuti nge ndimo ndamuchitiyani wezi, namwe so muchitiye wezi nyumba ya ada, mundipaske chisimikizgu cha uneneska, 13muŵasunge ŵamoyo ada ndi ama, ŵabali ndi ŵazichi ŵangu, ndipo ndiŵawo wose, ndipo pozomoskani maumoyo ghidu ku nyifwa.” 14Ndipo ŵanthurumi wo ŵangunena nayo, “Umoyo widu utaska umoyo winu! Asani urekenge kusumuwa vyo tachita, po ndipo nafwe Ambuya ŵatakuti ŵatipaska charu ichi, tikakuchitiyanga wezi ndi ukongorekwa.”

15Ndipo wanguŵasiskiya pasi kuporota pa dangazi ndi chingwe, pakuti nyumba yake yinguzengeka mu linga la msumba, viyo kuti wajanga mu linga. 16Sono wangunena nawo, “Kaninga mu mapiri vinu ŵakumurondoni ŵangakumana namwe; mukabisami kwenikuwa kwa mazuŵa ghatatu mpaka po ŵakumurondoni ŵawe; sono pavuli ndipo murutenge.” 17Ŵanthurumi ŵa, ŵangunena nayo, “Tikaŵanga ŵambura kafukwa pachifukwa cha rapu lo watirapiska. 18Awona tichazamusere mu charu wazamumanga kachingwe kayera yaka pa dangazi lo watisiskiyapo; sono ausu, anyoko, ŵabali ŵako pamoza ndi wose ŵamu nyumba ya ausu, uŵatoriyenge mu nyumba yako. 19Asani yumoza wakatuwanga mu nyumba yako kuruta ku bwalo, ndopa zake zikaŵanga pamutu wake, ifwe tikaŵanga ŵambura mlando; kweni asani janja lamuŵikika paku yose yo wendi iwe mu nyumba mo, ndopa zake zikaŵanga pa mutu widu. 20Viyo asani ukasumuwanga vyo tachita, po ifwe tikaŵanga ŵambura mlando pa rapu lenilo watirapiska ifwe.” 21Rahebe wanguti, “Kwakuyana nge ndimo mwakambiya kuŵi viyo.” Sono wanguŵalayira, ŵanguruta, ndipo wangumanga chingwe chiyera pa dangazi.

22Ŵanguruta, ŵangurata, ku mapiri, ŵanguja kuwa kwa mazuŵa ghatatu mpaka po ŵakuŵarondo ŵanguweko; pakuti ŵakuŵarondo wo ŵanguŵapenjapenja mu nthowa yose, ŵengavi kuŵasaniya. 23Viyo ŵanthurumi ŵaŵi wo ŵangupaukako ku mapiri, ŵanguyambuka, ŵanguza kwaku Yoswa mwana waku Nuni; ndipo ŵangumukonkhoske vyose vyo ŵanguwona. 24Ŵangunena ndi Yoswa, “Kwakuneneska Ambuya apaska charu chose chiya mu manja ghidu; chakuruskako nchakuti wose ŵakuja mu charu cho mitima yawo njakulakatuka chifukwa chidu.”

Currently Selected:

Yoswa 2: TongaMw

Highlight

Copy

Compare