Marangu 34

Nyifwa yaku Mosese

1Ndipo Mosese wangukwera kutuwa ku madambo ghaku Moabu kuya ku phiri Nebo, pachanya pa Pisiga lo lithyana ndi Yeriko, ndipo Ambuya angumurongo charu chose, Gileada kwachifika kwaku Dani, 2Naftali yose, charu chaku Efraimu ndi Manase, charu chose chaku Yuda kwachifika ku nyanja yaku zambwe. 3Negebu ndi Dambo, lo ndilo dambo la Yeriko, wo ndi msumba wa mingwalangwa, kwachifika ku Zoari. 4Ndipo Ambuya anguti kwaku iyo, “Ichi ndicho charu ndingurapiya Abrahamu, Yisaki, ndi Yakobe, kuti, ‘Ndikachipaskanga ku mphapu zinu.’ Ndakuzomerezga kuchiwona ndi maso ghako, Kweni Kuti ukayangako kuwa cha.” 5Viyo Mosese mteŵeti wa Ambuya wangufwiya penipa mu charu chaku Moabu, kwakuyana ndi mazu gha Ambuya, 6ndipo ŵangumuŵika mu dambo mu charu chaku Moabu kuthyana ndi Betepeori, kweni palivi munthu yo waziŵa malo gho wakuŵikapo mpaka zuŵa lino. 7Mosese wenga wa virimika machumi pe chumi pachanya machumi ghaŵi (120) pa ura wake wachifwa. Jiso lake lengavi kuchita ndandi chingana ndi nthazi yake yengavi kugowoka. 8Ndipo ŵaYisraele ŵangumutenje Mosese mu madambo ghaku Moabu mazuŵa machumi ghatatu (30), ndipo mazuŵa ghakumutenjere ghangumara.

9Ndipo Yoswa mwana munthurumi waku Nuni wanguzazika ndi mzimu wachinjeru, pakuti Mosese wanguŵikapo manja paku iyo, ndipo ŵaYisraele ŵangumuvwiya kuchita uli ndimo Ambuya angulanguliya Mosese. 10Ndipo mulivi kuyukamo mchimi mu ŵaYisraele wakulingana ndi Mosese, mweniyo Ambuya anguziŵa chisku ndi chisku. 11Palivi nanga njumoza wakukozgana nayo ku visimikizgu vyose vyo Ambuya angumutumiya kuvichita mu charu cha Egipiti, kwaku Farao ndi ku ŵateŵeti ŵake wose ndi ku charu chake chose, 12ndi ku nchitu zose za nthazi ndi ku machitidu ghakuru ghose ndi ghakofya ghenigho Mosese wanguchita pa maso pa ŵaYisraele wose.

Currently Selected:

Marangu 34: TongaMw

Highlight

Copy

Compare