Intembauzyo 91
91
1Ooyo uukkede akuyusila muli Sijulu wamajulu, uyoolyookezya mucimvule ca Singuzuzyoonse.
2Kuli Leza waamba kuti, “Nduwe matijilo acikwabilizyo cangu,
nduwe ngwesyoma.”
3Nguukuvuna kuzwa kukakole kauteya, nguukuvuna kuzwa kucuumo.
4Ulakuvumbilila amapepe aakwe, ulayuba kunsi aamababa aakwe.
Ntobo acikwabilizyo cako nkusyomeka kwakwe.
5Tokayoowi ziyoosya masiku, mivwi niibilima sikati tiikakuyoosyi.
6Tokayoowi nikuba kuti kukaboole mwiika mumudima,
niciba cuumo cinyonyoona ciindi caacilungu-lungu.
7Kumbali lyako bantu bali cuulu balawa, kujanza lyako lyalulyo bantu
balizyuulu zili kkumi balawa, pele yebo lwako tacikakugumi pe.
8Yebo lwako uyoolangilide buyo, uyoobona kusubulwa kwababi.
9Kuti Sijulu wamajulu waba ngamayubilo aako, ooyo Mwami Leza uuli ngamatijilo aako,
10masimpe taakwe ciyookucisa, taakwe mapenzi ngoyoobona munsi aanduwe kuŋanda yako.
11Nkaambo Leza uyoolailila bangelo bakwe kuti bakukwabilile,
kuti bakucingilizye munzila zyako zyoonse.
12Bayookujata akukunyamuna mumaanza,
kuti utafumpuli cituta cako abbwe.
13Uyoolyataula syuumbwa ankombola,
uyoolyataula cipile asyuumbwa wabutambo,
ayalo nzoka nkali uyooilyataula.
14Lino mukuti ulandiyanda alimwi ulizi zina lyangu, njoomukwabilila.
15Aakundiita njoomuvuwa, mumapenzi aakwe njooba aanguwe, njoomuvuna akumulemeka.
16Njoomucita kuti akoongole, ndiyoomufutula.
Currently Selected:
Intembauzyo 91: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
