Izaya 1

1Mubbuku eeli kulembedwe makani aamba zyacisi ca Juda alimwi amunzi wa Jelusalemu, mbubonya mbuli Leza mbwaakaayubunwida Izaya mwana wa Amozi muciindi cakulela kwa Uziya, Jotamu, Ahazi, alimwi a Hezekiya.

Leza mbwaakatapatila bantu bakwe

2“Yebo ojulu, ayebo onyika, amundiswiilile, mumvwe makani ngendaamba. Bana bangu mbindakalela akubakomezya bandizangila. 3Ŋombe ilimuzi simalelo ayo ayalo mbongolo ilimuzi uuisanina. Pele bantu bangu Baisilayeli tabandizi, bantu bangu tabateeleli.” 4Nywebo nocisi cisofweede, nywebo nobantu nomulemedwe zinyonyoono, nywebo nobamucita zibi. Mwasiya Mwami Leza, mwasampaula Uusalala wa Isilayeli, mwamufutatila. 5Ino nkaambo nzi ncomuciyanda kuumwa? Nkaambo nzi nomuzumanana kuzanga? Amubone mitwe yanu ilaunguma, myoyo yanu yoonse yacisigwa. 6Taakwe mpomuli baumbulu pe, muli azilonda kuzwida kutulolomi mane do kumutwe, mubili woonse uzwide buyo zilonda, nguma azicisa. Tazisanzidwe nikuba kuzambailwa, nikuba kubombekwa mafuta. 7Cisi canu canyonyoonwa minzi yanu yaumpwa, myuunda yanu yasaalwa abazwamasi, kamulibwenene, yaba lukula mbuli livulula bazwakule. 8Munzi wa Ziyoni wasyaala mbuli katungu kali mumuunda wamisaansa, mbuli ciyaminino mumuunda wabanamunywa, mbuli munzi uusinkilizidwe. 9Mwami Leza naatakaleka bacisyeede aswebo nitwakaloba mbuli Sodomu, nitwakaloba mbuli Gomola. 10Amumvwe majwi aa Mwami Leza nywebo nobasololi ba Sodomu, amuswiilile mulawo wa Leza wesu nywebo nobabi mbuli baku Gomola! 11“Zipaizyo zinji nzyomupa, ino ncinzi kulindime? Mbwaamba Mwami Leza. Ndasunkwidwa zipaizyo zyanu zyakutenta, mafuta aabagutu aabanyama baneneede anditinka nsiciyandi bulowa bwabapoho bwambelele abwampongo. 12Ino nguni wakamwaambila kuti kamuleta zyoonse eezi kulindime? Nguni uumwaambila kuti kamweendeenda mumabbuwa aaŋanda yangu? 13Mutanoocileti zipaizyo zyanu zyabuyo! Atwalo tununkilizyo twanu tundivundausya kumoyo. Nsiciyandi mapobwe aakukkala kwamwezi, masabata akubungana kwanu, zyoonse eezi nsiciziyandi, zilandicima. 14Ndilaasulide mapobwe aanu aakukkala kwamwezi amazuba amwi aamapobwe aabikkidwe. Alandikatazya kapati ndaliwo ono ndalema.

15“Nomutandabika maanza aanu mukundikomba, nsikamulanganyi pe, nikuba kuti mukakombe kwaziindi zinji zili buti nsikamuswiilili pe. Maanza aanu atila bulowa bunji. 16Amusambe musalale. Amuleke kucita bubi oobu mbomucita nkembwene. Ncobeni, amuleke kucita zitaluzi, 17amucite zibotu. Amuyandisye ziluzi, amubagwasye badyaminidwe. Amubakwabilile bamusyaala, amubaiminine bamukabafu. 18Amuboole twaambilane, mbwaamba Mwami Leza. ‘Nikuba kuti zibi zyanu zibe mbuli nkandamalowa ziyootuba buu mbuli buluba, nikuba kuti kazisalala mbuli cisila ziyootuba mbuli lukobo. 19Kuti naa kamuyandisya kuswiilila muyoolya bulotwe bwanyika. 20Pele kuti kamukaka akundizangila, muyoolobezegwa apanga.’” Mwami Leza mwini nguukanana eeci.

Munzi wazinyonyoono

21Amubone bamunzi ooyu mbubakali kusyomeka sunu baba munzi wabakomba mituni! Bakali batasalululi, bakali kucita ziluleme zyalo, pele sunu baba bajayi. 22Langa Jelusalemu, cimwi ciindi wakali mbuli nsiliva, pele ono tocikwe ambobede, wakali mbuli waini mubotu, ono wavwelwa maanzi. 23Basololi bako mbazangi mbalongwe bababbi, boonse bayandisya masinkamulomo bayandisya kutambula zipego. Tabakwabilili bamusyaala, mukamufu tabamulanganyi. 24Nkaako Mwami Leza, Mwami Leza Singuzuzyoonse, Singuzu wa Isilayeli waambilizya kuti, “Ndaleka kukatazigwa abaabo bandilwana ndabweedezya nkoto kulibasinkondoma. 25Ndiyoomuvuumukila, kwamana ajanza lyangu ndiyoomuminununa kugwisya makanci, nkagwisye dibbwi-dibbwi. 26Ndiyoomupa babetesi mbubonya mbuli kuciindi cakale-kale, balailili mbuli bakumatalikilo. Kumana waawo muyootegwa munzi wabalulami, munzi wabasyomeka.” 27Mukuti Leza uliluleme uyoonununa Ziyoni, mukuti ulilondokede uyoolekelela beempa. 28Pele bazangi antoomwe abasizibi bayoonyonyoonwa, aabo baleka Leza uuli ngo Mwami alikke bayooloba. 29Uyoofwa nsoni akaambo kamikamba yamalende aako, uyoousa akaambo kamyuunda eeyo njookasala. 30Uyooba mbuli mukamba ulaamatu aakunkumuka, uyooba mbuli muunda uutatililwi. 31Mbubonya mbuli butonje mbobunga bwatentwa ansasi yamulilo, mbubonya oobo abalo basintanze mbubayoonyonyoonwa amilimo yabo mibi beni. Nkabela taakwe muntu uutikakonzye kulesya lunyonyooko oolo.

Currently Selected:

Izaya 1: Tonga96

Highlight

Copy