Izaya 2

Luumuno akutamani

(Mika 4.1-3)

1Ngaaya makani Izaya mwana wa Amozi ngaakaamba kujatikizya zya Juda a Jelusalemu.

2Kumazuba aamamanino, cilundu caŋanda ya Mwami Leza

ciyookkazikizigwa akulemenena akati kazilundunyina,

ciyoosumpulwa kwiinda tulundu toonse

nkabela misyobo yoonse iyoowuumukila kulincico.

3Lino bantu banji bayooboola akwaamba kuti,

“Amuboole tuunke kucilundu ca Mwami Leza kuŋanda ya Leza wa Jakobo.

Uyootwiisya nzila zyakwe, kutegwa katweenda mulinzizyo.

Mulawo wakwe uuyoozwida ku Ziyoni ncobeni njiisyo zyakwe ziyoozwida ku Jelusalemu.”

4Uyoobeteka bamasi akukosweda bantu banji twaambo twabo.

Bayoofula aali mapanga aakulwanya kuba maamba,

amasumo aabo kuba tukwezuzyo. Cisi tacikalwani limbi acisinyina,

kunoonyina kwiisya zyankondo pe.

5Lino nywebo nolunyungu lwa Jakobo

amuboole tweendele mumumuni uutupa Mwami Leza!

Zyabuzuba bwa Mwami Leza

6Wafutatila balunyungu lwa Jakobo, bantu bako, O Leza, balaaziyanza zyabakujwe. Balasonda mbuli Bafilisiti, bayanzana aabakunze. 7Nyika yabo izwide buyo nsiliva angolida, lubono lwabo ndunji. Nyika yabo izwide mabbiza, nkalaki tazibaliki. 8Nyika yabo izwide mituni. Bakomba zintu nzibakalipangila amaanza aabo beni. 9Nkaako bantu bayoofwiinsigwa, bantu bayooletwa ansi, nikuba boobo O Leza, utabalekeleli pe!

10Kamunjila mumpangala kamuyuba mumalindi. Amutije bukali bwa Mwami Leza buyoosya, abulemu bwabupati bwakwe. 11Muntu uulisumpula uyoofwiinsigwa, bantu balibikka aantu bayooletwa ansi! Mubuzuba oobo Mwami Leza alikke nguuyoolumbaizigwa.

12Mwami Leza Singuzuzyoonse wakabamba buzuba bwabaabo balibikka aantu balisumpula, antoomwe abaabo boonse balikankaizya. 13Uyoonyonyoona milombe yoonse yaku Lebanoni, mikamba yoonse yaku Basyani, 14zilundu zyoonse zilamfu, antoomwe atulundu toonse. 15Maanda malamfu oonse, nkwakwa zyoonse, 16mato aamakwebo aaku Taasyisyi oonse, azyoonse eezyo zipangidwe cabuuya. 17Muntu sikasampu-sampu uyootolwa ansi akantu-kantu kabo kayoomana, Mwami Leza alikke nguyoolumbaizigwa mubuzuba oobo. 18Mituni iyooloba taikabonwi limbi pe. 19Bantu bayootijila mumpangala amumalindi. Nkaambo kakuyoosya kwa Mwami Leza abulemu bwakwe bupati aakuboola kuzoozungaanya nyika. 20Mubuzuba oobo bantu bayooyumbila mituni yabo basikoswe akutumpaafwa. Bayooyumba mituni yabo yansiliva ayangolida eeyo njibakalipangila kuti kabakomba. 21Bayootijila kumampangala akumajeleele kusola kuyuba kuzwa kubukali bwa Mwami Leza akubulemu bwabupati bwakwe, aakuboola kuzoozungaanya nyika. 22Amuleke kusyoma muntu uulya maila. Ino ugwasya nzi?

Currently Selected:

Izaya 2: Tonga96

Highlight

Copy