Yoano 15
15
Yesu ye mung'anzang'anza wa kine
1Amiwa ne mung'anzang'anza wa kine, Bataata bo banjimi. 2Misampi yonse iji mwi amiwa ibula kupanga bipangwa, beifumyako, ne yonse misampi ipanga bipangwa, nayo beiwamisha, pakuba amba ipange byavula. 3Pano anweba mwatoka kala na mambo a byambo byo nemwambila. 4Ikalainga mwi amiwa, ne amiwa mwi anweba. Musampi kechi wakonsha kupanga bipangwa bunke bwanji ne, poso waikala mu mung'anzang'anza. Ne anweba pamo, poso mwikale mwi amiwa. 5Amiwa ne mung'anzang'anza, anweba mwi misampi. Awa waikala mwi amiwa, ne amiwa mwi aye, ye upanga byavula, mambo kwakubula amiwa kechi mwakonsha kuuba kintu ne. 6Inge muntu ne kwikala mwi amiwa ne, utaiwa nobe musampi, ne kuma wauma, kabiji beibungizha pamo, ne kwiitaya mu mujilo, ne kupya yapya. 7Inge mwaikala mwi amiwa, ne byambo byami byaikala mwi anweba, lombai kyo musaka nangwa ki ka, kabiji kikemubilwa. 8Monka mu kino mo batumbijikilwa bataata, pa kupanga bipangwa byavula anweba, byonkabyo mukekala ke baana bami babwanga. 9Amiwa nemutemwa anweba pamo byonka byo bantemwa Bataata. Ikalainga mu butemwe bwami. 10Umvwe mwalama mikambizho yami, mukekala mu butemwe bwami, byonka byo nalama mikambizho ya Bataata, ne kwikala mu butemwe bwabo.
11“Bino bintu nebyamba kwi anweba, namba lusekelo lwami lwikale mwi anweba, kabiji namba lusekelo lwenu lulumbuluke. 12#Yoa 13:34; 15:17; 1 Yoa 3:23; 2 Yoa 1:5Uno ye mukambizho wami, namba mwitemwe anweba bene na bene, byonka byo nemutemwa amiwa. 13Kafwako muntu uji na butemwe bwakila buno ne, amba muntu e beelele balunda nanji mweo wanji. 14Anweba mwi balunda nami, umvwe mwauba byo nemukambizha. 15Pano kechi nemutele namba bakalume ne, mambo kalume kechi wayuka kyuba nkambo yanji ne. Pakuba amiwa nemutela namba balunda nami, mambo bintu byonse byo naumvwine kwi Bataata, nebilumbulula kwi anweba. 16Anweba kechi yenu mwansalulwile ne, pakuba amiwa yami nemusalulwile anweba, ne kwimutongola, namba muyenga na kupanga bipangwa, kabiji abya bipangwa byenu bikekajikwe. Namba umvwe mukalomba kintu kwi Bataata mu jizhina jami nangwa kya byepi, bakemupakyo. 17Nemukambizha bino bintu, namba mwitemwe anweba bene na bene.”
Bushikwe bwa ba pano pantanda
18“Inge ba pano pantanda bemushikwa, mukavuluke amba, patanshi banshikilwe amiwa. 19Inge mwajinga ba pano pantanda inge ba pano pantanda bemutemwa, mambo batemwa babo bene. Pakuba anweba byo mwabula ba pano pantanda, ne amiwa nemusalulula mu ba pano pantanda, ba pano pantanda bemushikwa, 20#Mat 10:24; Lu 6:40; Yoa 13:16Vulukai byo nemwambijile namba, ‘Muzha kechi wakila nkambo yanji ne.’ Inge bampachile amiwa, kabiji bakemupata ne anweba, inge balamine byambo byami, bakalama ne byenu. 21Pakuba bakemuuba bino byonse na mambo a jizhina jami, mambo kechi bamuyuka aye wantumine ne. 22Inge kechi naishile na kwibambila ne, inge kechi baji na mambo ne, pakuba pano kechi baji na mwa kwibingishisha ku mambo abo ne. 23Awa wanshikwa amiwa washikwa ne bataata pamo. 24Inge kechi naubile mwi abo mingilo ibula kuubapo mukwabo ne, inge kechi baji na mambo ne, pakuba pano amiwa ne bataata betumona ne kwitushikwa. 25#Sala 35:19; 69:4 Abino byamweka amba, bifike abya byambo byanembwa mu buku wabo wa mizhilo, amba ‘Banshikwatu pakubula mambo.’ 26Mambo aye Nkwasho byo akeya, ye nkemutumina ukafuma kwi bataata, ye Mupashi wa bukine, ufuma kwi bataata, ye ukanshimuna. 27Ne anweba mukashimunanga, na mambo a amiwa mambo mwajinga ne amiwa ne ku ntendekelo.”
Currently Selected:
Yoano 15: KNTP
Highlight
Copy
Compare
Share
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
