Yoano 14
14
Yesu ye jishinda ja kuya kwi Taata
1“Michima yenu kechi ilukute ne, itabilai mwi Lesa, kabiji mwitabile ne mwi amiwa. 2Mu nzubo ya Bataata muji mwa kwikala mwavula, inge kechi kyaji byo byo ne, inge nemubuula. Pakuba mbena kuya na kwimunengezhezha mpunzha kwa kwikala. 3Kabiji inge naya na kwimunengezhezha mpunzha, nkabwela jibiji, ne kwimutwala kwami amiwa mwine, namba akwa konji amiwa, ne anweba mukekale konka. 4Kabiji ne anweba mwayuka jishinda ja kombena kuya amiwa.”
5Tomase wamwipwizhe amba, “Nkambo, kechi twayuka ko mubena kuya ne, twakonsha kwijiyuka byepi jishinda?”
6Yesu wamukumbwile amba, “Amiwa ne jishinda, ne bukine, ne bumi, kafwako wakonsha kwiya kwi Bataata ne, poso pe amiwa. 7Inge mwangyukile amiwa, inge mwibayuka#14:7 Inge mwangyukile amiwa: mu ma buku akwabo amu kigiliki banemba, byo mwangyuka amiwa, mukebayuka ne bataata ne Bataata. Kabiji kufuma ku kyo kino kimye mwibayuka, ne kwibamona.”
8Kepo Filipa a mwambijile amba, “Nkambo, tubulai bashenu, kabiji ne atweba kituwamine.”
9Kumvwa Yesu wamukumbwile amba, “Nabanda nenu byonkabye, ne anweba Filipa ne kungyuka nenyi? Awa wammona amiwa wamona ne bataata, ne anweba mwa ambilaka amba, ‘Tubulai bashenu’? 10Kechi mwaitaba byo nji mwi bataata, ne bataata byo baji mwi amiwa nenyi? Byambo byo nemwambila kechi nebyamba bunke bwami ne. Pakuba Bataata bekala mwi amiwa bo boba mingilo yabo. 11Ngitabilai byo nji mwi bataata, ne Bataata byo baji mwi amiwa, nangwa ngitabilai na mambo a mingilo yonka. 12Kine, kine nemwambila namba, awa wangitabila amiwa, mingilo yo nguba amiwa naye ukeyuba, ne yakila ino ukeyuba, mambo mbena kuya kwi Bataata. 13Kabiji byonse byo mukalomba mu jizhina jami, nangwa bya byepi, amiwa nkebyuba, namba Bataata batumbijikilwe mu Mwana. 14Kabiji inge mukalomba kintu mu jizhina jami, nangwa kya byepi, amiwa nkekyuba.”
Mulaye wa kutuma Mupashi Wazhila
15“Inge mwantemwa, mukalama mikambizho yami. 16Ne amiwa nkalomba Bataata, ne abo bakemupa Nkwasho mukwabo, ye ukekala nenu myaka yonse. 17Ye Mupashi wa bukine,#14:17Ye Mupashi wa bukine: ma buku akwabo mu kigiliki banemba, “Ye Mupashi usolola bukine bwa kwa aye Lesa” ye babula kukonsha kutambula ba pano pantanda, mambo kechi bamumona ne, nangwa kumuyuka ne. Anweba mwamuyuka, mambo aye wikala nenu, kabiji ukekalanga mwi anweba.”
18“Kechi nkemusha bwana bwa kishale#14:18 Bwana bwa kishale: kyalumbulula amba, “Kushalatu bunke kwakubula wa kwibakwasha.” ne, nkeya jibiji ko muji. 19Kwashala ka kimye kacheche ba pano pantanda kechi bakammona jibiji ne, pakuba anweba mukammonanga, byo naikala na bumi amiwa, ne anweba mukekalanga naabo.”
20“Mu joja juba anweba mukayuka byo nji mwi bataata, ne anweba mwi amiwa, ne amiwa monka mwi anweba.”
21“Awa uji na mikambizho yami ne kwiilama ye wantemwa, ne awa wantemwa ye bakatemwa kwi bataata, ne amiwa nkamutemwa, ne kwimwesha amiwa mwine kwi aye.”
22Kumvwa Yudasa (kechi Isakaliota ne) wamwipwizhe amba, “Nkambo, mambo ka o mukemweshesha kwi atweba, bino ku ba pano pantanda ne?”
23Yesu wamukumbwile amba, “Inge muntu wantemwa, ukalama byambo byami ne bataata bakamutemwa, ne atweba tukeya ko aji, ne kwikala monka mwi aye. 24Awa wabula kuntemwa kechi ulama byambo byami ne, kabiji ne byambo byo nemufunjishe kechi byami amiwa mwine ne, byo bya bataata bantumine.”
25“Bino bintu nemwambila byonkiji nenu. 26Pakuba Nkwasho, aye Mupashi Wazhila, ye bakatuma Bataata mu jizhina jami, ye ukemufunjisha bintu byonsetu, ne kwimuvulula byonse byo na ambile nenu.”
27“Nemushiila mutende, nemupa mutende wami. Kechi mpana byo bapana ba pano pantanda ne. Michima yenu kechi ilukute ne, nangwa kuuba moyo ne.” 28“Anweba mwaji kumvwa byo naji kwimwambila namba, ‘Amiwa mbena kuya, kabiji nkabwela kwi anweba.’ Inge mwantemwa, inge mwasekela, mambo mbena kuya kwi Bataata, mambo Bataata bo bankila. 29Pano nemubujila jimo kasa kikyangye kumweka, namba byo kikamweka muketabile. 30Pano kechi ng'ambe nenu byavula ne, mambo mfumu wa pano pantanda kaiye. Aye kechi uji na luusa pe amiwa ne, 31pakuba amiwa nguba byonka byankambizha Bataata namba, ba pano pantanda bayuke byo nebatemwa Bataata.”
“Imanai, twayai tufume pano.”
Currently Selected:
Yoano 14: KNTP
Highlight
Copy
Compare
Share
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
