Yoano 16
16
1Bino bintu nemwambila namba, mwakeya kwituntula. 2Bakemupanga mu mashinagoga, kine ne juba jibena kwiya jo bakalanguluka bonse bemwipaya amba babena kwingijila Lesa. 3Ne bino bintu bakebyuba, mambo kechi bebayuka bataata nangwa amiwa ne. 4Pakuba nemwambila bino bintu, namba mwaka wabyo pakufika, mukavuluke byo nemubujilebyo amiwa. Kabiji bino bintu kechi nemwambijile ku ntendekelo ne, mambo nakijinga nenu. 5Pakuba pano kangye kwi aye wantumine, bino kafwako nangwa umo wa mwi anweba wangipuzha kombena kuya ne. 6Byo naamba nenu bino bintu, bulanda bwayula mu michima yenu. 7Nangwa byonkabyo nemubula bya kine, kimuwamina amiwa kufumapo, mambo inge amiwa ne kufumapo ne, Nkwasho kechi akeye kwi anweba ne. Kabiji inge naya, amiwa nkamutuma kwi anweba. 8Ne aye, byo akeya, ukebashiina ba pano pantanda na mambo a bundengamambo, ne a bololoke, ne a bunchiba mambo. 9Na mambo a bundengamambo, mambo kechi bangitabila amiwa ne, 10na mambo a bololoke, mambo amiwa mbena kuya kwi bataata, ne anweba kechi mukammone jibiji ne, 11na mambo a bunchiba mambo, mambo mfumu wa pano pantanda wachibilwao ne kuzhatwa.
12Amiwa nji na bintu byavula bya kwimubula, bino kechi mwakonsha kwibitambula katataka ne. 13Pakuba aye Mupashi wa bukine, byo akeya ukemutangijila mu byonse bya kine, mambo aye kechi ukambanga byanji mwine ne, pakuba byonkabya byo akomvwa, byo byonka byo akamba, ne aye ukemubuula bintu bikamweka. 14Aye ukantumbijika amiwa, mambo aye ukatambula bya kwami, kabiji ukemubulabyo. 15Byonse bintu bya bataata byo byami, kyo kyo naambila namba, aye ukatambula byami, kabiji ukemubulabyo.
Bulanda ne Lusekelo
16Kwashala pacheche, ne anweba kechi mukammona ne, kabiji pa kimye kikwabo palutwe pacheche, mukammona.
17Ponkapo bamo baana banji babwanga beipwizhenga bene na bene amba, “Nanchi kino kyayila mu ka kyo e twambila amba, pashala pacheche, ne anweba kechi mukammona ne, kabiji pa kimye kikwabo kicheche, mukammona, kabiji amba, mambo ngya kwi bataata?” 18Ba ambile amba, “Nanchi kino kyayila mu ka, kyo a amba amba, ‘Pashala pacheche?’ Atweba kechi twayuka kyo a amba ne!”
19Yesu wayukile byo basakile kumwipuzha, ne aye wibambijile amba, “Anweba mubena kwiipuzha anweba bene na bene na kino kyo naamba namba, ‘Pashala pacheche, ne anweba kechi mukammone ne, kabiji pa kimye kikwabo kicheche, mukammona’ nyi? 20Kine, kine nemwambila namba, anweba mukajila ne kuwowakana mabingo, pakuba ba pano pantanda bakasekela, anweba mukekala na bulanda, pakuba bulanda bwenu bukaaluka ke lusekelo. 21Mwanamukazhi byo afung'ama uji na bulanda, mambo kimye kyanji kyafika, pakuba byo asema mwana kechi avuluke misongo ne, mambo a lusekelo mambo muntu wasemwa pano pantanda. 22Byonkabyo ne anweba, pano mwauba bulanda, kabiji amiwa nkemumona jibiji, ne michima yenu ikasekela, ne lusekelo lwenu kafwako ukemwangatalo ne.”
23“Kabiji mu joja juba kechi mukangipuzha kintu ne. Kine, kine nemwambila namba, umvwe mukalomba kintu kwi Bataata, mu jizhina jami nangwa kya byepi, bakemupakyo. 24Kala kechi mwalombele nangwa kintu mu jizhina jami ne, lombai kabiji mukatambula, namba lusekelo lwenu lufikile.”
25“Nemwambila bino bintu mu bishimpi. Bino juba jibena kwiya, jo nkabula kwimwambila mu bishimpi, pakuba nkemwambila bulongo mukomvwishe bya bataata. 26Kabiji mu joja juba mukalomba mu jizhina jami, kabiji amiwa kechi nemwambila namba, nkemulombela kwi bataata ne, 27mambo bene bataata bemutemwa mambo anweba mwantemwa, ne kwitabila byo nafumine kwi bataata. 28Amiwa nafumine kwi bataata, naiya pano pantanda, kabiji mbena kufuma pano pantanda, ne kuya kwi bataata.”
29Ne baana banji babwanga ba ambile amba, “Ee, pano mwa ambatu bulongo, kechi mwa amba mu kishimpi ne. 30Pano twayuka namba anweba mwayuka byonse, kabiji kechi musakiwa muntu kwimwipuzha ne. Kino kitulengela kwitabila namba anweba mwafumine kwi Lesa.”
31Kumvwa Yesu wibambijile amba, “Kine pano mwaitabila nyi? 32Talai, juba jibena kwiya, kine, jafika kala, jo mukapalang'enamo mpala mpala kwenu, ne kunsha bunke bwami. Kabiji byonkabyo kechi nji bunke ne, mambo bataata bo baji ne amiwa.”
Amiwa nepashinda pano pantanda
33“Bino bintu nemwambila namba mumwene mutende mwi amiwa. Pano pantanda kumanama ko kwenu. Byonkabyo koseshai michima yenu, amiwa nepashinda pano pantanda.”
Currently Selected:
Yoano 16: KNTP
Highlight
Copy
Compare
Share
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
