Abaroma 7

Abapfanye na Kristo baba bahamburuwe ngo ntibaganzwe n’ivyagezwe

1Canke ga bene Data, ntimuzi yukw ivyagezwe biganza umuntu akiriho? mbgiye abazi ivyagezwe. 2Kukw ivyagezwe bihambirira umugore ku mugabo wiwe, akiriho: arik’ umugabo wiwe iy’ apfuye, umugore aba ahamburuwe ngo ntaganzwe na we. 3None rero, umugabo wiwe akiriho, yokwābīrwa n’uwundi mugabo, yokwitwa umusambanyikazi: arik’ umugabo wiwe iy’ apfuye, ntaba akiganzwa n’ivyagezwe, bituma atoba umusambanyikazi, naho yokwābīrwa n’uwundi mugabo.

4 # Kol 2:14. None rero namwe, bene Data, gukoranywa n’umubiri wa Kristo kwatumye mucika abapfuye ku vyagezwe, kugira ngo mwābīrwe n’uwundi, ni we yazutse mu bapfuye, twamire Imana imbuto. 5#Rom 6:21.Tukiganzwa n’akameremere kacu, ukwifuza kw’ivyaha kw’uburyo bginshi kwazanywe n’ivyagezwe kwakorera mu mibiri yacu, kugira ngo twamire urupfu imbuto. 6#Rom 8:1, 2; 6:2, 4.Ariko noneho ntitukiganzwa n’ivyagezwe, kuko twapfuye ku camye kidufashe, ni co gituma tuba abagurano, dukorera Mpwemu adukoresha uburyo busha, tudakoreshwa bga buryo bga kera bg’inyuguti.

Mbeg’ ivyagezwe n’icaha?

7 # Kuv 20:14, 17; Gus 5:18, 21. Nuko tuvuge iki? Mbeg’ ivyagezwe n’icaha? Eka na mba. Ariko simba naramenye icaha, iyo ntakimenyeshwa n’ivyagezwe; kuko ntaba naramenye ukwifuza, iy’ ivyagezwe bitavuga ngo Ntukifuze. 8#Rom 5:13.Arikw icaha kibonye urwitwazo mu vyagezwe, gikorera muri jewe ukwifuza kw’uburyo bgose: kukw icaha kiba gipfuye, ivyagezwe bitariho. 9Nanje kera nariho, ntafise ivyagezwe: maz’ icagezwe kije, icaha kirarabūka, nanje ndapfa; 10#Yak 1:15; Lew 18:5.kand’ ico cagezwe co kuzana ubugingo nakibona kinzanira urupfu. 11#Heb 3:13.Kukw icaha campendahenze, kibonye urwitwazo mu cagezwe, kandi kigitera kunyica. 12#1 Tim 1:8.None rer’ ivyagezwe n’ivyera, kand’ ibgirizwa n’iryera, rigororotse, ryiza.

13 # Rom 5:20. Mbeg’ iciza cambereye urupfu? Eka na mba! Arikw icaha ni co cārubaye, ngo kimenyekane kw ar’ icaha, kuko canyicishije iciza, ngw icagezwe gitume icaha kirushiriza kuba kibi.

Imitima ibiri ibūranira mu muntu

14 # Zab 51:5; Yoh 3:6. Kuko tuzi yukw ivyagezwe ar’ ivy’ impwemu; ariko jewe nganzwa n’akameremere kanje, naguriwe kuba umugurano w’icaha. 15Sinzi ico nkora; kukw ico ngomba atari co nkora, arikw ico nanka akaba ari co nkora. 16Ariko ko nkora ico ntagomba, mba nemeye ivyagezwe kw ari vyiza. 17None rero si jewe nkibikora, ariko n’icaha kimbamwo. 18#Ita 6:5; 8:21.Ndazi yuko muri jewe, mu kameremere kanje, ata ciza kimbamwo: kuko kugomba gukora iciza kubana nanje, ariko kugikora nta kwo. 19Kukw iciza ngomba atari co nkora, arikw ikibi ntagomba akaba ari co nkora. 20Ariko ko nkora ico ntagomba, si jewe nkigikora, ariko n’icaha kimbamwo.

21Ni ko mbona ikingera, yuko naho ngomba gukora iciza, ikibi kibana nanje. 22Nnezererwa ivyagezwe n’Imana mu mutima wanje, 23#Gal 5:17; Yak 4:1; 1 Pet 2:11.ariko mbona ikindi kingera kiri mu mubiri wanje kirwanya ikingera co mu mutima wanje, kikamfatira mpiri kuganzwa n’ikingera kiri mu mubiri wanje, ikingera c’icaha. 24Ewe jewe ndagowe! Ni nde yonkiza umubiri untera uru rupfu? 25#1 Kor 15:57.Imana ishimwe, kubga Yesu Kristo Umwami wacu. Nuko jewe mu mutima wanje njakariye ivyagezwe n’Imana, ariko mu kameremere njakariye ikingera c’icaha.

Currently Selected:

Abaroma 7: RUN1967

Highlight

Copy