Ab’i Galatiya 3

Ukwizera ni kwo gutuma twemerwa n’Imana

1Yemwe Bagalatiya b’ibijuju, ni nde yabaroze, kand’ ari mwebge mweretswe Yesu Kristo abambge, mu maso yanyu? 2Iki conyene ni co ngomba ko mumbgira: mbega Mpwemu mwamuronkeshejwe n’ibikorwa vy’ivyagezwe, canke n’ukwumva gufatanije n’ukwizera? 3Mbega mwakabaye mur’ ibijuju murtyo? Mwatanguye mu vya Mpwemu, mbega none musozereye mu vy’umubiri? 4Mbeg’ ayo yose mwayaboneye ubusa? Namba yar’ ay’ ubusa koko! 5Ībaha Mpwemu, igakorera ibitangaza muri mwebge, mbeg’ ibikoreshwa n’uko mukora ibikorwa vy’ivyagezwe, canke n’uko mwumvise mukizera? 6#Ita 15:6.Nk’uko Aburahamu yizeye Imana, akabiharūrwako nk’ukugororoka. 7Mumenye rero yukw abīshimiye ukwizera ari bo bana ba Aburahamu. 8#Ita 12:3; 18:18; Ivyak 3:25.Kand’ ivyanditswe vyabimenye bitaraba yukw Imana izotsindanishiriza abanyamahanga kubg’ ukwizera, bibarira Aburahamu ubutumwa bgiza bg’ibitaraba, biti Muri wewe ni ho amahanga yose azohērwa umugisha. 9#Rom 4:16.Nukw abīshimira ukwizera bahabga umugisha hamwe na Aburahamu yizera.

10 # Gus 27:26. Abishimira ibikorwa vy’ivyagezwe bose bari n’umuvumo: kuko handitswe ngw Azoba avumwe umuntu wese adashishikarira ivyanditswe vyose mu gitabo c’ivyagezwe, ngw avyitondere. 11#Hab 2:4; Rom 1:17; Heb 10:38.Biraseruka yukw ata muntu atsindanishirizwa n’ivyagezwe imbere y’Imana, kuko handitswe ng’ Umugororotsi azobeshwaho n’ukwizera. 12#Lew 18:5; Rom 10:5.Arikw ivyagezwe ntibiva ku kwizera, yamara ng’Ūzovyitondera ni vyo bizomubeshaho. 13#Rom 8:3; Gus 21:23; 2 Kor 5:21.Kristo yaducunguye umuvumo w’ivyagezwe, yacitse ikivume kubgacu; kuko handitswe ngw Azoba avumwe umuntu wese amanitswe ku giti: 14kugira ng’umugisha wa Aburahamu ushike ku banyamahanga, bawuheshejwe na Yesu Kristo, kugira ng’ukwizera kuturonkeshe Mpwemu twasezeraniwe.

15Bene Data, ibi ndabivuga nk’imvugo y’abantu. Isezerano, naho ryoba iry’ umuntu gusa, iyo rishinzwe nta muntu arikūraho cank’ aryongerako. 16#Ita 12:7; 13:15; 17:7; 22:18; 24:7.Nuko Aburahamu ni we yasezeraniwe amasezerano, bo n’uruvyaro rwiwe. Ntiyavuze, it’ Imvyaro; nk’ūvuga benshi: yamara yavuze nk’ūvuga umwe, iti N’uruvyaro rwawe; ni rwo Kristo. 17#Kuv 12:40.Arikw ico mvuze n’iki: isezerano ryabanje gushingwa n’Imana, ivyagezwe vyaje hashize imyaka amajana ane na mirongwitatu, ntivyorikūraho ngo bihindure ubusa iryo sezerano. 18#Rom 11:6.Kukw iy’ umwandu uzanwa n’ivyagezwe, woba utazanywe n’isezerano: arikw Imana yawuhaye Aburahamu, iwumusezeraniye.

Igituma Imana yashinze ivyagezwe

19 # Rom 5:20; Heb 2:2; Ivyak 7:38, 53. Nukw ivyagezwe n’ibiki? Vyageretsweko kubg’ ibicumuro, ngo bigumeho kugeza ah’ uruvyaro ruzozira rwasezeranywe ivy’ isezerano: kandi vyahawe abamarayika kubigera, na bo babiha umushikirwa w’amajambo. 20Arik’ umushikirwa ntaba uw’ umwe, yamar’ Imana n’imwe.

21 # Rom 8:2-4. Mbeg’ ivyagezwe birwanya amasezerano y’Imana? Eka na mba! Iyo haba harih’ ivyagezwe vyashinzwe bishobora kubeshah’ abantu, n’ukuri ukugororoka kuba kwarazanywe n’ivyagezwe. 22#Rom 3:9-19; 11:32.Arikw ivyanditswe bivuga yuko vyose vyugaranywe ngo biganzwe n’icaha, kugira ngw abizera bahabge ivyasezeranywe biheshwa no kwizera Yesu Kristo. 23#Gal 4:3; 1 Pet 1:5.Arik’ ukwizera kutaraza, twarindwa n’ivyagezwe, twugaranywe turindiriye ukwizera kwagira kuze guhishurwe. 24Uko ni kw ivyagezwe vyatubereye umurezi aturera akadushikiriza Kristo, ngo dutsindanishirizwe n’ukwizera.

Ibiva ku kwizera

25 # Rom 10:4. Arik’ ukwizera ko kwaje, ntitukirerwa n’umurezi. 26#Yoh 1:12; Rom 8:17.Mwese mur’ abana b’Imana kubgo kwizera Kristo Yesu: 27#Rom 6:3; 13:14.kuko mwese ababatirijwe kuba aba Kristo mwanbaye Kristo. 28#Rom 10:12; 1 Kor 12:13.Ntihashobora kuba Umuyuda cank’ Umugiriki, ntihashobora kuba umugurano cank’ uwidegemvya, ntihashobora kuba umugabo cank’ umugore; kuko mwese mur’ umwe muri Kristo Yesu. 29#Rom 9:7.Ko mur’ aba Kristo, mur’ uruvyaro rwa Aburahamu, mur’ abaragwa nk’uko vyasezeranywe.

Currently Selected:

Ab’i Galatiya 3: RUN1967

Highlight

Copy

Compare