VAFILIPI 2

Khwichehitsa khwa Kristo nende Tsingulu Tsietsie

1Vulamu vwenyu mu Kristo, vumukholanga khuva ni tsingulu, khandi vuyaanzi vwevwe vumuleminyanga mwoyo. Muli nu vulala na Roho; khandi muli nu mwoyo mulahi nende tsimbavasi khu vandi. 2Musayanga numuyaanza, munombe mbe nu vuyaanzi vunyishi muno, lwa muli ninganakani indala, lwa muli nu vuyaanzi khu shia mulala khandi lwa muli nu mwoyo mulala ni lienya lilala. 3Muvuli khukholakhu shindu shiosi khulondokhana khu likomba liu khwiyenyela vindu inoho likomba liu khwichinjilila vutswa; navutswa muve vichehitsi khu vandi, vuchila khukanakana muli valahi muno khuvira vandi. 4Shia mulala khu munyi avuli khwiyenyela vulahi vwevwe mwene wonyene; navutswa yenyelekhu khandi vandi vulahi. 5Muve ni liiva khuli lia Kristo yali nalio mu munyi vene:

6Kristo yali ni liiva lia Nyasaye shia khase khosi;

navutswa shiyenya khwilekhanyinya khu Nyasaye,

khuvirila khu tsingulu tsietsie tawe.

7Navutswa yalekha shia shindu shiosi

shia yali nashio khurulana khu lienya lielie mwene,

nava ni liiva khuli liu murumishi.

Yivulwa khuli mundu, khali nalolekha khuli mundu.

8Niyakhalolekha khuli mundu,

yali mwichehitsi khutukha khu likhutsa --

khali khu likhutsa liu khu musalaba.

9Khulwa yako, Nyasaye yamuvikha havundu hali nu luyali mwikulu

khandi wamuha lira liu vunyali muno khuvira mira kandi koosi.

10Khulwa yako, khulu khuha lira lia Yesu luyali,

shia shindu shiosi shili mwikulu, khulilova khandi hasi mu lilova#2:10 mu lilova: inoho mushihatisi.

viliitsa khumusikamila.

11Shia shindu shiosi shilitsa khuvoola havulavu

ndi Yesu Kristo neye Mwami, khulu khuhaana vukhumi khu Nyasaye, uli Tata.

Mwang'ang'e khuli Vulavu khu Vandu mu Shivala

12Khulwa yako, valina vaanje va nayaanza, lwa namenyanga na munyi, shia khase khosi mwalondanga malako kaanje; khali vuliitsa khuva vulahi muno, niiva mulalonda malako kaanje nunundi lwa mbulaho. Mutsililile khukhola mihinzilu numuria khandi numutechela khu muhonyinywi mu vwatoto; 13shichila Nyasaye akholanga mihinzilu chiechie mu munyi shia khase khosi, khumulomba khuva ni lienya khandi khukhola ka yenyanga mukhole.

14Mukhole shia shindu shiosi, vuchila khwililila inoho khuhangalitsana mulilomoloma, 15khu muvuli khuva nu vutamanu vwosi, khandi muve vanihu khuli vaana va Nyasaye vaseletse, vamenyanga mu shivala shia vandu vakoyana khandi vakholanga vwoni. Khutukha mwang'ang'e muvo, khuli tsinyining'ini tsiang'ang'anga mwikulu, 16lwa muvavoolelanga likhuva lihaananga vulamu. Niiva muliitsa khukhola ndio, niitsa khuva ni shivune shinyala khukhola nzilole, shichila munyi Khulitukhu lia Kristo aliitsa khukalukha; shichila kaliitsa khumanyinya ndi tsingulu tsianje nende muhinzilu kwanje shiukwali kwi shikhaya tawe.

17Haundi, masahi kaanje kachilanga nimba nu vulamu, kaliitsa khusuundulwa khuli shihanwa khu musango kwi lisuuvila lienyu lihaananga khu Nyasaye. Niiva kaliitsa khwikholekha kario, ndi ni lisangala khandi sanganga mulikhoya lianje na munyi voosi. 18Khulwa yako, khali munyi khandi khutukha musangale, khandi mwikhoye ninzi.

Timoteo nende Epafrodita

19Niiva ni lienya liu Mwami, suuvilanga niitsa khuruma Timoteo khu munyi vwangu yuvu, khu makhuva khulondokhana khu munyi kandinyilitsi. 20Mbulakhu mundu wundi wanyala khushelenyinya naye, khandi unyala khumuheendelakhu mwoyo, navutswa ye wonyene. 21Shia mundu wosi yiyenyelanga vindu vievie mwene, navutswa vuchila khwiyenyela via Yesu Kristo. 22Navutswa munyi vene mwamanya ndi Timoteo wamanyinya havulavu watushila, shichila yakhola muhinzilu ninzi khwilwatsa Ivanjeli, khuli mwana akholanga muhinzilu na tata wewe. 23Nganakananga khumuruma khu munyi vwangu yuvu, lwa niitsa khuva nimanyi katsitsanga khwikholekha khwinzi. 24Ndi ni lisuuvilitsa mu Mwami ndi khali inzi mwene, niitsa khumuchendelela vwangu yuvu.

25Nganakane nu vulahi muno khumurumila munyi musuuvili washieru Epafrodita, wakhola muhinzilu ninzi khandi wa khwakhonyana naye khukwanila Mwami; khandi wali khuli murumwa wenyu lwa yakhonyanga. 26Yikombanga nu mwoyo kwosi khumulolakhu munyi voosi; khandi avula vuyaanzi vwosi muye, shichila mwahulila nu mulwale muno. 27Ni kilikali kene, yali mulwale muno, khali nava himbi khukhutsa. Navutswa Nyasaye yamuvela tsimbavasi; khandi shikanyala khuva ye wonyene tawe, navutswa khali inzi khandi, shichila yandulitsilaho vuveleli vunyishi vu mu mwoyo, lia nali nyole. 28Nzikombanga nu mwoyo kwanje kwosi khumuruma khu munyi, khu musangale, lwa muliitsa khumulola khandi; khu mbuli khuvelela khandi. 29Mumwinjilitsi nu vuyaanzi, khuli musuuvili washieru mu Mwami. Muhe vandu vali khuli ye luyali, 30shichila yihonolokha, khali nava himbi khukhutsa, shichila muhinzilu kwa Kristo, niyenyanga khumba vukhonyi, vwa munyi mwakhambele tawe.

Currently Selected:

VAFILIPI 2: LLLCATHOLIC

Highlight

Copy

Compare