VAFILIPI 1

1Ninzi Paulu nende Timoteo, nu khuli varumishi va Yesu Kristo. Khuhandichilanga vandu va Nyasaye voosi vamenyanga mu litaala lia Filipi, vali mu vulala na Yesu Kristo, nu khumeetakhu Vabishopu#1:1 Vabishopu: Inoho vimilili vi likanisa nende vakhonyani vavo. nende Vatikoni.

2Nyasaye, uli Tata weru nende Mwami Yesu Kristo vamulolele tsimbavasi, khandi vamuhe milembe.

Lisaala lia Paulu khu Vasomi Veve

3Sanditsanga Nyasaye wanje shia khase khosi, lwa nganakananga munyi; 4khandi shia khase khosi lwa musaalilanga munyi voosi. Saalanga nu vuyaanzi 5khulondokhana khuli mwakhonya khwilwatsa Ivanjeli, khurula khulitukhu liu khuraanga khutukha nunundi. 6Khulwa yako, ndi ni lisuuvilitsa ndi Nyasaye wraanjitsa muhinzilu mulahi yuku mu munyi, alatsililila khukukhola khutukha lwa akurweshitsa Khulitukhu lia Yesu Kristo aliitsa khukalukha. 7Mwanyanzitsa muno! Nu vulahi muno khwinzi khumukanakanila, khuli nganakananga khulondokhana khu munyi. Munyi voosi musanganga ninzi mu tsimbavasi tsia Nyasaye yamba, khali nunundi, lwa navohwa mucheela khandi lwa ndi muvoholole khumanyinya havulavu ndi Ivanjeli ni yatoto, khandi khulomba vandu khusuuvila mu likhuva lia Ivanjeli ivoolanga. 8Nyasaye neye mushiahidi wanje ndi muvoolelanga kilikali, lwa mbolanga ndi vuyaanzi vwanje vwa ndi navwo khu munyi vurulanga mu mwoyo kwa Kristo mwene.

9Saalanga ndi vuyaanzi vwenyu vutsililile khumeetekha muno, halala nu vucheli vwatoto khandi likhalaka liu vuseletse, 10khu muve nu vunyali vu khurovola khukhola malahi; khu muliva vavoholole khurula mu vindu vionekha nende vutamanu vwosi, khandi muvuli khuva nu vwoni vwosi Khulitukhu lia Kristo aliitsa khukalukha. 11Limenya lienyu liliitsa khuva ni vindu vinyishi vilahi viatoto, via Yesu Kristo wonyene anyala khuhaana, khulu khuhaana vukhumi nu khwitsominya Nyasaye.

Khuli Mwoyo shichila Kristo

12Vasuuvili vashianje, nyenyanga mumanye nunundi ndi katoto vindu viakholekha khwinzi, viakhonyanila khwilwatsa Ivanjeli. 13Khulwa yako, valindi voosi valindanga inzu yu vwami na vandi voosi vali hanu vamanyi ndi navohwa mucheela, shichila ndi murumishi wa Kristo. 14Khuvohwa khwanje mucheela khuheele himbi vasuuvili voosi litinyilitswa mu Mwami; khwenya vatsililile khuva ni tsingulu tsiu khwilwatsa likhuva#1:14 likhuva: Mahandiko malala kakhale kali ni “Likhuva lia Nyasaye.” shia khase khosi, vuchila khuria.

15Ni kilikali, valala khuvo vilwatsanga Kristo, shichila vali ni lishiendekha khandi vayaanza vutswa khulembana. Navutswa vandi vilwatsanga Kristo nu mwoyo mulahi ku khwirulitsa. 16Yava vakholanga ndio khurulana khu vuyaanzi; shichila vamanya ndi navikhwaho khumanyinya Ivanjeli ni yatoto. 17Vandi yavo, shikali vilwatsanga Kristo nu mwoyo kwatoto tawe, navutswa nu mwoyo ku khwiyenyela vindu; vakanakananga ndi valiitsa khunomba nzililile khuvirila mu vutiinyu vunyishi, lwa navohwa mucheela.

18Navutswa makhuva kenako shikambenditsanga mwoyo tawe! Ndi nu vuyaanzi khulondokhana khu kenako -- shindu shikali nu khwenya Kristo, khwilwatswa shia havundu hosi munjila yosi nikanyalikha, kave khurulana khu mwoyo mutamanu inoho mwoyo kwi likhola liu vulunji. Natsililila khuva nu vuyaanzi, 19shichila namanya ndi khuvirila mu lisaala lienyu nende vukhonyi vurulanga khu Roho wa Yesu Kristo, niitsa khuva muvoholole. 20Likomba lianje likali, khandi lisuuvilitswa lili ndi mbuli khunyola tsisoni mu muhinzilu kwanje; navutswa shia isaa yosi, khandi khushila muno nunundi, mbe ni ikholo indinyu, khu nilirumishila liiva lianje liosi khuha Kristo luyali, khali kave shili mwoyo inoho niitsa khuva ninakhutsa. 21Khulwanje, khuva mwoyo ni Kristo, khandi khukhutsa nu vukhala. 22Navutswa niiva natsililila khuva mwoyo, nyala khukhola muhinzilu kuli nu vukhonyi muno khwinzi; nikhali, shinyala khumanya vulahi vwene kwanyala khurovola tawe. 23Mbulakhu shianyala khurovola khu vindu vivili yivi. Nzikombanga khukhutsa, nu khutsililila khuva mwoyo na Kristo, shichila nashio shindu shikali khwinzi; 24navutswa khutsililila khumenya mu mmbili, nashio shindu shilahi khu munyi. 25Lwa ndi ni lisuuvilitsa mu kenako, manyi ndi natsililila khuvaho khandi menya na munyi voosi; khumulomba mutsililile imbeli khandi muve nu vuyaanzi mu lisuuvila; 26khu, lwa niitsa khuva nindi na munyi, muliva ni shivune shikali shinyala khumukhola mwilole, shichila inzi mu limenya lienyu mu Yesu Kristo.

27Shindu shikali shili ndi khutukha mumenye khulondokhana khuli Ivanjeli ya Kristo yenyanga; khu khali niiva nyala khwitsa inoho mbuli khwitsa khumulola, nilihulila ndi mwasinjila ni tsingulu mu liiva lilala khandi muli ni likomba liu khukhola halala mihinzilu; shichila lisuuvila lirulanga khu Ivanjeli. 28Muvuli khuria vatsiku venyu. Muve ni ikholo shia khase khosi. Nalwo lwa valiitsa khumanya vulahi ndi valiitsa khukuurwa na munyi muliitsa khukuura; shichila Nyasaye neye umuheetsanga tsingulu tsiu khukuura. 29Mwaheelwa vwiyangu vu khurumishila Kristo, shikanyala khuva khusuuvila muye khwonyene tawe; navutswa khali khunyakhana shichila ye. 30Mukhonye mulinyakhana yili nunundi. Ni linyakhana lilala liele, lia mwalola nimbirilamu mumatukhu kavira; khandi khuli mwahulila, nalio lia nzilililanga khuvirilamu.

Currently Selected:

VAFILIPI 1: LLLCATHOLIC

Highlight

Copy

Compare