VAFILIPI 3

Likhola liu Vulunji Lirulanga khu Lisuuvila

1Mulimalila, vasuuvili vashianje, mwikhoyele mu Mwami! Shindolakhu nu vutamanu khukalushila khuhandika ka namuhandichila khale tawe; shichila kaliitsa khuva nu vukhonyi khu munyi, niiva niitsa khukhola ndio. 2Muchelihi khurula khu yavo vakholanga vindu vitamanu, vali khuli tsisiimbwa; yavo vavoolelanga vandu visalache mivili chiavo. 3Khutsi navo va khwanyola shishevo shiatoto, navutswa shivali vo vanyola tawe; shichila khusaalanga khu Nyasaye khuvirila mu Roho wewe; khandi khwikhoyelanga mu limenya lieru mu Yesu Kristo. Shiukhuvikhanga lisuuvilitsa lieru mu milukha chilondokhananga nu mmbili tawe. 4Nikava nindio, ni kilikali nakharele lisuuvilitsa lianje mu vindu khuli vienevo. Niiva mundu akanakananga anyala khuvikha lisuuvilitsa lielie mu milukha chilondokhananga nu mmbili, inzi ndi ni vivune vinyishi vichilanga ninganakana ndio. 5Nashevwa khulitukhu lia munane khurula ninzivulwa. Ndi Muisraeli mu vandu vu lwivulu, khurula mu vandu vuluhia lwa Benyamini, mundu wa masahi ka Vahebrania. Nali Mufarisayo khulondokhana na Malako ka Vayahudi; 6khandi nali nayaanzilila khutambitsa likanisa. Khuli mundu anyala khukholwa khuva wi likhola liu vulunji, lwalondanga ka Malako kenyanga, mbulakhu vutamanu vwosi. 7Navutswa vindu viosi via nalolanga khuli nu vukhala khwinzi, mbalitsanga ni shindu khwinzi tawe, shichila Kristo. 8Shivinyala khuva ni vindu vienevo vionyene vutswa tawe; navutswa mbaliitsanga vindu viosi khuvula khuva shindu khwinzi, shichila yeshio shili nu vukhonyi muno, nuvuli vucheli vu khumanya Mwami wanje Yesu Kristo. Nalekha khukhola vindu viosi shichila ye; vivalitsanga viosi khuli nu vuchiafu, khu nyole Kristo 9nu khutsililila khuva muye, vuchila khwikhola khuva wi likhola liu vulunji mwene shichila Malako; navutswa yovo vurulananga khu lisuuvila mu Kristo -- likhola liu vulunji lirulanga khu Nyasaye khandi lirulananga khu lisuuvila. 10Nyenyanga khumanya Kristo nende tsingulu tsiachila niyisimushitswa khurula mu likhutsa, khusanga mulinyakhana lielie, mambe khuli ye mu likhutsa lielie 11khu, nikanyalikha khali inzi mwene nilisimushitswa khurula mu likhutsa.

Khunyola Shihanwa Khurula khu Yesu Kristo

12Shinyala khuvoola namala khukuura khale, inoho namala khukholwa khuva museletse khale tawe. Nzilililanga khuchelitsa khuli nyala nyole shihanwa shia Kristo yangurila, lwa yanomba mulonde. 13Vasuuvili vashianje, shinyala khuvoola inzi mwene nanyola khale tawe. Navutswa shindu shilala shia kholanga ni yishi: nu khulekha kali inyuma wanje, nu khuchelitsa ni tsingulu khuli nyala, vuchila khuhaya haya, khu nyole shili imbeli wanje. 14Nzilukhakanga vulunji khutukha khushili imbeli wanje, khu nyole shihanwa, nishili mulaango kwa Nyasaye khuvirila mu Yesu Kristo mu vulamu vwi mihika ni mihika.

15Khutsi voosi va khwahindila, khuve ninganakani indala yeneyo. Navutswa niiva vandu valala khu munyi vali ninganakani yindi lukanu, Nyasaye aliitsa khumulomba mukamanye havulavu. 16Kenyekhanga khulonde mu limenya lieru malako malala mele, ka khwamala khunyola khale.

17Vasuuvili vashianje, mukhole ka inzi kholanga; khandi mulonde mwiima kwa vandu vamenyanga khulondokhana khu mwiima mulahi, kwa khwamumanyinya. 18Nali namuvoolelakhu hali khanyishi makhuva yaka; khandi nunundi ngalushilanga khumuvoolela nu vuveleli mu mwoyo kwanje. Khuliho na vandu vanyishi vamenyanga khuli vatsiku, shichila likhutsa lia Kristo khu musalaba. 19Vilitsa khumalilishila mu shihatisi, shichila musambwa kwavo, nakwo likomba liu mmbili. Vilolelanga ka venyekhanga valole ni tsisoni; khandi vakanakananga vutswa khulondokhana khu vindu vili mu shivala shinu. 20Navutswa khutsi khuli vandu valiitsa khumenya mwikulu. Khulindililanga nu mwoyo kwosi khulola Muhonyinyi weru, nali Mwami Yesu Kristo khwitsa khurula mwikulu. 21Aliitsa khukalukhanyinya mivili chieru miteteshelo chiu khukhutsa, khuchilomba khusasana nu mmbili kwekwe ku vukhumi, khuvirila mu tsingulu tsichilanga niyamiha shia shindu shiosi.

Currently Selected:

VAFILIPI 3: LLLCATHOLIC

Highlight

Copy

Compare