Isabulin 103
103
Amina ka Akuju
Ekiruke ka Daudi.
1Kitur Lokapolon, Okwai emoyo kang';
Ejautene kang' kere, kitur ekiror keng' ka Lokalaunan!
2Kitur Lokapolon, Okwai emoyo kang';
bobo mam akimuruokin ajokus keng' kere,
3nesi erimanakini arokusio kang' kere,
nesi imadi adekasinei kang' kere,
4nesi itukuye eong' katwanare,
ka akisulwanyikin eong' ka amina ka asianut.
5Nesi nes isimonikini eong' kiboro kalukajokak,
tetere iteteuno ajaus kang' nikatumunan kwape ka ekokom.
6Etubonokini Lokapolon igang'it nesi itung'a lu icikakiite
ka ainakin kesi nu itemokina kesi adumun.
7Abu nesi kopukoki Musa akitemetemesio keng',
ka akitodikin itung'a luko Israel asoma keng' nukapolok.
8Erait Lokapolon loka akisoni ka asianut,
mam ketapana nesi anyunyuraar bobo ileleba nesi amina na emam esial.
9Mam nesi ng'ini pak kiretanakini,
mam anyunyura keng' kideun ikaru kere.
10Mam nesi kitisilanari oni kwape itemokinare,
kere de atacanakin oni atupa ka arokusio wok ka apacanareta.
11Kwape elwanare kuju kokwap,
nes ekipone lo epolore amina keng' kamaka ng'ulu kalu eyong'ito nesi.
12Kwape elwanare kide alomun ko to,
nes ekipone lo elemara nesi arokusio wok.
13Kwape ejokunare papa kamaka idwe keng',
nes ekipone ejokunare Lokapolon kamaka ng'ulu kalu eyong'ito nesi.
14Ejeni nesi ekipone lo kijeitere oni;
ejeni nesi ebe iraito oni apua.
15Konye akijar wok erait bala inya.
Ipoloete oni ka akitolosite kojokan bala aturo nuko okitwi;
16kosodi ekatapiro akutarite wai loka aturo, kosodi adaun —
komam bobo itwan ni anyuni bobo.
17Konye ng'ulu lu eyong'ito Lokapolon, amina keng' itolosi ikaru kere,
bobo ebuni ajokun keng' akitolosite kauri kere
18kamaka ng'ulu kalu ebunete akidar akitutuket keng'
ka akiituute asoma acorasia keng'.
19Kebuu Lokapolon kigwaaki ekicolong' keng' loka akipuga kuju;
erait nesi ejakait ka itung'a kere.
20Kiturwoto Lokapolon, osi imalaikan keng',
osi lu isomaete nu ekote akirot keng',
ipupete eporoto loka akirot keng'!
21Kiturwoto Akuju, osi ajore kere nako kuju,
kiturwoto Lokapolon Akuju;
osi lukejaanakinan keng' lu isomaete lu ekote nesi!
22Kiturwoto Akuju osi isuban keng' kere;
kiturwoto nesi ka alarosinoi kere kanu ipugae nesi.
Okwai etau kang' kitur Lokapolon Akuju!
Currently Selected:
Isabulin 103: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
