Isabulin 102
102
Akilip ka nikatumunan ni Ejii Ocani
Akilip kani icana, epasit nesi kosodi abukun akimonyo keng' namaka Lokapolon
1Kiira akilip kang', Okwai Lokapolon,
bobo kiira akimonyo kang' naka akote aking'arasit!
2Na ecanare eong', mam ang'opikin eong'!
Kiira eong', bobo kinyakakine eong' atipet eworoe eong'!
3Etubitosi apaarasia kang' bala apuru;
inepiete akojo kang' bala akim.
4Ebirokin eong' kwap bala inya lu ewokete;
mam etau kang' kekote akinyama.
5Kanuka abilibila ketau kang',
edeun akwaan kang' erait akojo usa ka ejamu.
6Ajaikin eong' bala atarukot na ejii okitwi,
bala etukuri lo ejii ameje.
7Aperi eong' akwenyi;
ajii eong' bala ikwenyi ni telit ejii obibiru ka etogo.
8Karasete eong' ipading'atin kang' apaaran kere;
ng'ulu lu ekwenatatare eong' itosomaete ekiror kang' ilamasi.
9Ekuruon nes arau bala inyamen kang',
enyali eong' akiyo ka imaten kang',
10kanuka adedeng' kon kiton anyunyura kon,
iseku ijo eong' ka acakar eong' nama elwana.
11Erait akijar kang' bala etolibe loka ebong';
ajei eong' bala inya lu ewokito.
12Konye ijo, Okwai Lokapolon irait ijo ejakait ikaru kere;
ebuni auri kere akiitun ijo.
13Ibuni ijo anyoun ka akisoni Sayon;
naarai adolo apak naka akisomakin Sayon nukajokak;
adolo apak nakitemokiite.
14Eminasi lukejaanakinak kon akapongoru keng',
bobo isonie nesi apua keng'.
15Ebunete akwapin akiyong'o Lokapolon;
ebunete ijakaa kere luka akwapin akiyong'o akibusesu keng'.
16Ebuni Lokapolon akiduku bobo Sayon kiteteu,
ebuni nesi akitodiar akibusesu keng'.
17Ebuni nesi akiirar itung'a keng' lukinyekin,
ka akiirar alipasia kes.
18Kigirata nu esoma Lokapolon kanuka auri kana ebuut,
tetere ebunete itung'a lu ering'a kidouna akiturite nesi.
19Abu Lokapolon kong'oleu kwap alomun ka alaro keng' kanakalaunan kanako kuju,
abu nesi kong'oleu kwap alomun kokuju.
20Abu nesi kiira apipilu naka lukejaasi aenis;
kolacakini nesi kesi luketubokiite aario.
21Kanuka ng'un ebunio alimonor ekiror keng' ko Sayon,
bobo ebunio akiturite nesi ko Yerusalem,
22apaki na etukokinototor akwapin
ka ajakaanut kanuka akimaa Lokapolon.
23Ainaki Lokapolon akwana kang' anonoku aring'a eong' arait nikatumunan;
etuurian nesi akijar kang'.
24Okwai Akuju kang', mam ayaar eong' kipokona aring'a eong' arait nikatumunan.
Okwai Lokapolon, ijari ijo ikaru kere.
25Ibu ijo sek kojeu akwap, kuju erait asoma nuka akanin kon kelope.
26Ebunete kesi atubor konye ibuni ijo akideun;
ebunete kesi kere adaun bala inapen.
Ibuni ijo akinyekin kesi bala inapen, kosodete kesi atubor.
27Konye ijei ijo emam akibelosit,
bobo emam akijar kon esial.
28Ebunete idwe ka lukejaanakinak kon akiboi kojokan;
ebunete kesi akitolosite koking'aren keng'.
Currently Selected:
Isabulin 102: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
