Awaragasia 22
22
1Koseu ekiror lo ejokuna akilanya abara na epolo noi,
bobo ejokuna asianut akilanya epuesa kere esawabu.
2Ni ebarit kani epalipalit emorete akirot na ape:
Lokapolon kesubuni kesi kere.
3Itwan nika acoa anyuni ican, kong'opi;
konye ni mam kewomowomoe itolosit, ka adumun ican.
4Eropit kanuka akiyapepera nepepe ka ayong'ite Lokapolon erait abara, ang'osibib ka akijar.
5Ileleba ikokua ka iregia oroto ka itwan kanikaronon;
ng'ini ni idari ejautene keng' ka ilope elwanikin kama kes.
6Kisisianaki ikoku kokipone kalo itemokina akitup,
kemojong' nesi mam kepayari awai.
7Ipugae nikabara nikapalapalan,
ni ilipanari erait ibulesut kani einanakini.
8Kiyek ijo ikinyomo luka arokusio ibuni ijo akidwenye ican,
bobo akisicana kon itung'a luce ebuni adaun.
9Ng'in ni edutana ka akimor kaluce;
isirereng'io, naarai emorete nesi inyamata keng' kalu epalipalito.
10Kireng'ia itwan nikepogi, edauni epeget loka ejie,
ang'olopa ka araton.
11Ng'in ni emina alaus ka etau, bobo kinapaara ejori keng',
erauni ejakait ipoupa keng'.
12Akonyen ka Lokapolon idarete akijen,
konye ibelonori nesi akiro kalu emam akiyuun.
13Ni ekalanyana ebala, “Ejii eng'atunyi king'a!
Kario eong' korotin!”
14Akituk kana edote erait adwi na iduloro;
ng'in ni itakadikit Lokapolon ibirokin toma adwi ng'ini.
15Emina ikoku akiro nuka abang'anut kotau keng',
konye ng'unu elemario ka aparik kana erwaarere nesi.
16Ng'in ni iimakit lukapalapalak kanuka akiyatikin abara keng',
kere de einanakin lu ebarito, ebuni apalapala.
Alimonoreta akaisauni nuka acoa
17Kidaki akit kon, kopup akiro kaluka acoa,
bobo kigwaaki adama kon akijen kang'.
18Naarai ejokunaar kipiak ijo akiro kes toma otau kon,
ka akiitunun kesi ng'in pak.
19Akote eong' ijo kipiak amuno kon nama ka Lokapolon,
ng'ini nes atenikina alosia eong' alimonokin ijo kesi kipokona.
20Adau eong' akigirakin ijo awaragasia akaisauni.
Ejaasi ka akijen ka acorasia nu ejooka.
21Bobo ebunete akisisianakin ijo nu ebala abeite cut.
Na ijukiarere ijo alosite akouni, iyauni ijo abong'okinet na edolit.
Alimoret nasodit
22Mam akideme nikapalapalan kanu epalipalitere nesi;
kere de akimik lu emam apedor abeite kama etubonokinere itung'a.
23Naarai ebuni Lokapolon akigang' kesi,
ka amudiar akijar kalu isicanete kesi.
Alimoret nakiyareit
24Mam aupa ka itung'a lu enyunyuraka.
25Ibeikini ijo akisisiaun iponesio kes komam ijo kibeikini akibelokin.
Alimoret nakiuniet
26Mam akisumunikin agwoikin apesen naka itwan kice.
27Kemam ijo kijaatatar ka ibore ka ipede ni itacia ijo, inyo eyarere apetetait kon na iperia ijo?
Alimoret nakiwong'onet
28Mam akisukunyikin eukoru lokisek,
lo kiraikito luka asonya kon.
Alimoret nakikanyet
29Iyanyuut ijo itwan ni ejeni asoma keng'?
Egwoi nesi koking'aren ka ijakaa;
mam nesi kegwoi kotung'a kalu emam adumunet apede.
Currently Selected:
Awaragasia 22: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
