Awaragasia 23
23
Alimoret nakikanyet ka ape
1Na iboikiner ijo kwap akinyam nenipe ka itwan nikang'osibib,
kojeni ebe erait nesi ng'ai.
2Kijaasi ijo ka emwane kirebok emwane kon.
3Mam aminanar ka inyamata kalu ipudokiite nesi;
naarai eraito inyamata lu elokitere ijo.
Alimoret nakikanyet kaare
4Kocoikina mam akitapasana, itamakiit ijo akote abara.
5Ebeikinete ikabel kon amamuun atipet,
bala kedumuuto abenonoka ka aporor bala ekokom.
Alimoret nakikanyet kauni
6Mam akinyama inyamen ka acele ka itwan kani etiono;
bobo mam aminanar ka inyamata kalu ipuduni nesi.
7Ebala nesi, “Kobuni konyam” konye mere ng'unu nes ekote nesi.
Nu iitunene nesi nes erait nesi.
8Ilekuni ijo iboro lu inyama ijo,
kosodete akiro kon kere nuka akiyalama arauni nuka along'u.
Alimoret naka Ikanyet kaung'on
9Mam atamakin alimokin ibang'ai akiro nukajokak;
mam nesi kiyalamikin.
Alimoret nakitomonet
10Mam akisukuny eukoru lokisek,
kere de ademar ikokiok emanikor kes.
11Lokapolon nes lokedaran kes loka apedor,
bobo ebuni nesi aking'arakin kesi na iwosa ijo kesi.
Alimoret nakitomonete ka ape
12Kopup lokesisianakinan kon,
bobo kisisiau akiro kere nu ibeikini ijo akisisia.
Alimoret nakitomonete kaare
13Mam aking'ere arwar idwe.
Akilece na ejokuna mam kaari kesi.
14Abeite erait, ebeikini akiyuun akijar kes.
Alimoret nakitomonete kauni
15Ikoku kang', kicoyari ijo, alakari eong' noi.
16Alakari eong' keira eong' ijo inera akiro nuka acoa.
Alimoret nakitomonete ka aung'on
17Mam alilit kanuka itung'a lukarokok;
kinyek acoit Lokapolon korau nu ikote ijo ka akijar kon.
18Kerait kong'in, ijaasi ijo ka akijar na ejokuna koking'aren.
Alimoret nakitomonete ka akany
19Kopup ikoku kang', kocoo bobo kowomowomo kojokan ekipone lo ijaria ijo.
20Mam aupa ka itung'a lu emasete ebino cut,
kere itung'a luka emwane.
21Lukamerak ka luka emwane eraunete lukapalapalak.
Kerait nu ibeikini ijo asoma bon erait akinyam ka apero,
apu ijo akinapa apugoi.
Alimoret nakitomonete ka ikanykape
22Kopup papa kon; kepit nesi, kere kemam nesi tiya mam ijo kijii.
Emojong'it toto kon, kitodik nesi iyalama ijo.
23Abeite, acoa, akisisia, ka akijen,
ilesikina akitaca kanuka adumun kesi,
konye ejokuna noi, mam kitemokina agwelar.
24Papa keng' ka etwan kalo edolito, ejaasi ka atenikina naka alakara.
Ibeikini ijo epoga kanuka ikoku kani eco.
25Kinyek papa kon ka toto kon kipogasi kanu kon;
koinak toto kon alakara ng'in.
Alimoret nakitomonete ka ikanykaare
26Okoku kang', kopupok kotenan noi,
bobo kotup ejautene ka akijar kang'.
27Amalayai nepepe ka aberu nuka iponosio lukarokok eraito aroti nakaaran.
28Idarito kesi ijo bala lukademak,
ka ainakin ikiliok lu ipu emam kemunokina.
Alimoret naka Itomonete ka ikanykauni
29Kesi ka ng'ai emonyete?
Kesi ka ng'ai ituuriete?
Kesi ka ng'ai eng'olopasi?
Kesi ka ng'ai ikilikilasi?
Kesi ka ng'ai ejaasi ka ajimi emam atenikina?
Kesi ka ng'ai ereng'aka akonyen?
30Ng'ulu lu itumoro kakimata ebino,
ng'ulu lu elosete akiir ebino lo inyalite.
31Mam ajalakin ebino akitama ijo, atikere kereng',
atikere kekulae kokikopot, kolosi kwap kojokan.
32Kosial, ekonyi bala emun, bala emun loka asorit.
33Ebunete akonyen kon atere ikatiti,
bobo mam ijo cut kibeikini akiitunun kere de ejori kojokan.
34Irauni ijo bala itwan ni eperi kokiding' ka akare,
bala itwan ni eperi kuju ka ataker.
35Ibuni ijo atemar, “Keposito kesi eong',
konye mam eong' kikang'asite;
Kebung'ato kesi eong' konye mam eong' keirarit apipilu?
Iwori anyouna eong'?
Aikari eong' akote ebino ace.”
Currently Selected:
Awaragasia 23: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
