Awaragasia 21
21
1Eyait Lokapolon awomowomosia ka ejakait kabenenu
kwape eyaitere nesi eroto ka akipi.
2Ibekini ijo akitere ebe ng'ini ibore ni isomae ijo ideere,
konye kiitute ebe etubonokini Lokapolon awomowomisio kon.
3Asoma nu edolito kanu ejoka,
italakarito Lokapolon akilanya isuban.
4Itung'a lukarokok eyait akutukanut kes,
ka epogi, nu eraito arokusio.
5Akitemetemisio kani ekukurana eyauni abara,
konye ng'in itwan ni emarani ideun along'u ekote.
6Abara na idumuni ijo kaliokonu ewolie atipet,
erait euria loka aroti loka atwanare.
7Ebunete arokusio kalukarokok adaun kesi ikulopek,
naarai ang'ereto kesi ikulopek asoma nu ideerete.
8Epait eroto kani isomae arokusio,
konye iponosio kani ejokuna ideerete.
9Ejokuna akiboi ka asoto ka etogo,
akilanya akimor etogo ka aberu na eng'olopana.
10Etau ka itwan kanikaronon emina nukarokok;
mam epaduko keng' kedumuni akitim koking'aren keng'.
11Kitisilaar itwan ni ipoga, ecouni ni ebang'aana;
kisisianaki ijo ni eco, inaki ijo nesi akijen.
12Akuju na edolit, ejeni nu isomasi ko oreria ka itung'a kalukarokok,
bobo emudiari nesi kesi.
13King'ere ijo apupuun akimony naka lu epalipalito,
amonyatait kon ka ilope naka akote aking'arasit mam kepupuno.
14Kenyunyura itwan nama kon, edutat loka akiyeiya,
eculi anyunyura keng'.
15Kisomakin nuka abeite, elakarosi itung'a lukajokak,
konye itung'a lukarokok edumunete ican.
16Itwan ni epai awae koroto kaloka akijen,
ebuni akiyeng'un ka atukot ka lukatwak.
17Ng'ini ni emina akijar na tai, epalipali;
ng'ini ni emina ebino ka akinyete mam kebari.
18Lukarokok eyaunete nama kes ka ikulopek ican
lu etamakiito kesi ainakin itung'a lukajokak.
19Ejokuna akiboi komoding', akilanya akiboi ka aberu kana eng'olopana, bobo kisiali.
20Ideun abara ejii ore ka itwan kani eco,
konye itwan ni bang'ai itolotolori abara keng'.
21Kojaasi ka asianut ka amunokina, ibuni ijo akijar ikaru lu ipu;
ebunete itung'a luce akiyong' ijo, ka akisomakin ijo kojokan.
22Epedori itwan nika acoa ayaar ere lokapoloni lo idarete ikiliok lu egogong',
ka amudiar arwatan nu emunokito kesi.
23Ng'ini ni ecoikina kanu inera nesi,
ka ang'ajep keng', eyuuni akwana kocan.
24Itwan ni ejaasi ka edeli enyarite nesi Epogi;
asomisio keng' ileleba edel ka epogi.
25Itung'a lu ekalanyaka lu eng'erito asoma,
eyauto atwanare nama kes ka ikulopek.
26Nu isomaete kesi erait akiitunun nu ekotosi kesi adumun.
Lu edolito ebeikinete akileme, bobo alemuni kalakara noi.
27Mam Lokapolon kemina isuban kalukarokok,
kacut kelemete kesi katenikina kanakaronon.
28Alimoret ka ekeng'alan mam kemunokino,
konye akirot ka itwan kani ewomowomoe kotenan ecamute.
29Itung'a lu edolito ejenete ikulopek isomaete kesi nu ideerete;
konye lukarokok ejii emolee cut mam kesi kekuriaka.
30Emam acoa naka etung'anan,
ka akijene apede ebeikini akilanya Lokapolon.
31Ibeikini ijo alokokin afarasin kanuka ejie,
konye apedor naka akilanya erait naka Lokapolon.
Currently Selected:
Awaragasia 21: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
