Awaragasia 16
16
1Ibeikinete oni akitene akitemetemesio wok,
konye Lokapolon bon nes ejaasi ka akirot naka esial.
2Ibeikini ijo akiitununi ebe ng'in ibore ni isomae ijo ideere,
konye etubokini Lokapolon nu ikote ijo asoma.
3Kilip Lokapolon kisulwanyik akitemetemesio kon,
ebunete awomowomosia kon araun nuka abeite.
4Ng'ini ibore ni etene Lokapolon, ejaasi ka esial keng';
esial kalukarokok erait amudiaro.
5Ereit Lokapolon itwan kere ni itopoloro;
mam nesi kitukui kesi akitisilaro.
6Koyong'ara bobo komunokina, ebuni Akuju arimakin arokusio kon.
Koyong' Lokapolon, emam ibore nikaronon isomakin kama kon.
7Kitalaka ijo Lokapolon,
ibeikini ijo akitaraun ipading'atin kon ipoupatin.
8Ejokuna ajaus ka iboro idis, lu idumuut ijo ka abeite,
akilanya ajaus kalu ipu lu idumuut ijo ka akirod.
9Ibeikini ijo akiten akitemetemesio kon,
konye Akuju nesi eyait nu isomae ijo.
10Inera ejakait kapedor ka Akuju;
nu etiakunene nesi ideerete ng'in pak.
11Ekote Lokapolon alatirin koraito nuka amuno,
ng'olo egwelet koraite lo itemokina.
12Erait ilami ijakaa asoma nukarok,
naarai apugan kes egwoi kotoma abeite.
13Ekote ejakait akiirar abeite,
kosodi amina ng'ulu lu inerasi abeite.
14Itwan ni ecoo etamakini akitalakar ejakait;
kenyunyurari ejakait, ebeikini itwan atwanare.
15Amina ka ejakait eputosi ka idowon lu eyaunete akiru,
kapak kanaka akiru kana euriana ejii akijar.
16Ejokuna, bobo ejokuna noi ajaus ka acoa ka akijen,
akilanya esawabu ka epuesa.
17Ng'ulu lu ejoka elosete koroto kalo ipait arokusio;
kanuka ng'unu kitee nama ilosi ijo, ebeikini iyuuni akijar kon.
18Epogi kiyari ijo amudiaro, akitopoloro kibirori ijo.
19Ejokuna akiyapepera ka akideun ipalipalit,
akilanya araus ipe kamaka lu itopoloro ka adumuni atutubet ka iboro kalu ekokoito kesi.
20Kopup nu isisianakino ijo, ebunete akiro kon ajokar;
komunok Lokapolon, ibuni ijo alakari.
21Itwan ni ecoo, kopiriana ejenuna ka akijen keng'.
Ekipone lo ejokatatar akiro keng', nes ekipone ejenia nesi akimaima.
22Erait acoa ecor loka akijar kamaka lu ecoaka,
konye abang'anutu erait akitisilaro kalu ebang'aaka.
23Itung'a lu ecoaka iitunenete ering'a kinerakina;
nu elimunete kesi eraito akiro nuka akimaima noi.
24Akiro nuka asyanut eputosi ka esik,
ejijim bobo ejoka ka akijar kon.
25Nu iitunene ijo erait eroto lo ideere ebeikini ayar ijo atwanare.
26Einakit eteng'e itwan ni isomae akukuranut na asoma,
naarai ekote nesi akisimonikin eteng'e keng'.
27Itung'a lukarokok ekotosi irotin luka akikang'asa luce;
atikere akiro kes icwete ka aronus.
28Eyeete itung'a lukarokok elodo;
igurunete kesi ican ka akibil epaperone.
29Itung'a lu ededeng' ing'alaet ipoupatin kes,
ka ayar kesi ocan.
30Kocoikina ka itung'a lu kiyedanakinete ijo akonyen;
ejaasi kesi ka awomowomosia nu ibore nikaronon.
31Akijar na euja erait eropit kalu edolito;
akoruo eraito abokoki naka akibusesu.
32Ejokuna itwan ni mam ketapana anyunyurari akilanya nika agogong'u;
ejokuna ni eyait ejautene keng' ka ilope, akilanya ni eyari ere lokapolon kere.
33Ecakete itung'a ekura kanuka ajenuni nu ekote Akuju,
konye Akuju elope nesi etyakunene.
Currently Selected:
Awaragasia 16: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
