Awaragasia 15
15
1Abong'okinet na inapaara eculi anyunyura,
konye naka adedeng'u itunyokini anyunyura.
2Inerasi itung'a luka acoa, itijimito kesi akijen,
konye itung'a lu ebang'aka inerasi aronus.
3Itee Lokapolon nu isomasi kang'in laro;
itee nesi oni, atikere esomaete oni nu ejoka kere nukarokok.
4Ang'ajepe na inapaara erait ekitoi loka akijar,
konye akiro nukarokok ebilete emoyo.
5Erait abang'anut aking'ere akisisianakino ka papa kon;
erait acoa acamun acorasia keng'.
6Itung'a lu edolito ericakito abara kes,
konye lukarokok itolikinete abara kes kedolutu ican.
7Ipono kalu ecoaka isiarakito akijen,
mere itung'a lu ebang'aka.
8Isuban kalukarokok itakadikito Lokapolon,
konye alipasia nuka lukajokak italakarito nesi.
9Ereit Lokapolon irotin kalukarokok,
konye emina ng'ulu lu isomaete nu edolito.
10Kisoma ijo nukarokok, kitisilaro ijo noi;
itwani ijo king'ere ijo koruare ijo.
11Atikere akwap ka lukatwak mam kirebokini Lokapolon ajenuni nu ejaasi neni;
ikote konye itung'a igwaete awomowomosia kesi kamaka Akuju ai?
12Itung'a lu ipogasi mam keminasi koruare kesi;
mam kesi kilipete acorasia kamaka ng'ulu kalu ecoaka.
13Elakara itung'a, ibusakito akwena,
konye ituriete kesi, ekadakito.
14Itung'a lu epiriaka ekotosi akisisia,
konye itung'a lu ebang'aka imokosi abang'anut.
15Akijar ka lukapalapalak erait naka auta ng'in pak,
konye itung'a lu elakara elelakito akijar.
16Ejokuna apalupalut ka ayong'ite Lokapolon,
akilanya ajaus ka abara kotoma ocani.
17Ejokuna akinyam edia loka akwii ka itung'a lu imina ijo,
akilanya akinyama akiring' kalaro kana ejii eding'.
18Apipilu ka etau eyauni ang'olopa,
konye akinapaara eyauni aipuc.
19Kikalanyana ijo, idumuni ijo akekesu kong'olo wai,
konye kimunokina ijo, mam ijo kidumuni icani.
20Idwe lu ecoaka italakarito ikauriak kes.
Konye idwe lubang'aisik enwang'ito kes ka toto kes.
21Itung'a lu ebang'aaka elakara ka abang'anut kes,
konye lu ecoaka isomaete nu idereete.
22Kodumutu acorasia kere nu ibeikini ijo adumun,
ibuni ijo asoma kojokan; kemam, ibiror ijo.
23Abong'okinete na ideere italakarit ng'in itwan.
24Itung'a lu ecoaka elosete koroto kalo elosi kuju akijar,
mere eroto lo ijesar kwap atwanare.
25Emudiari Lokapolon ireria ka itung'a kalukarokok,
konye idari nesi abara ka apuserut.
26Ereit Lokapolon awomowomosia nukarokok,
konye elakara nesi ka akiro nukajokak.
27Kitene ijo ameda kokipone kaloka aliokonu,
idupori ijo ekale kon elomi ocani.
Mam akidianar asoya, ijari ijo ikaru lu ipu.
28Itung'a lu ejoka, ewomowomoete ering'a kesi kinyakuna akirot.
Itung'a lukarokok ebong'onokinete atipet, konye eyauni icani.
29Na ilipata itung'a lukajokak, epupi Lokapolon,
konye eng'eri nesi apupun ng'ulu lukarokok.
30Ireeta lu ebusakito akwena italakarete ijo,
akiro nukajokak einakinete ijo alakari.
31Kipupu ijo akiro nakiruarere ijo, icoo ijo.
32King'ere ijo akisisia, ikang'asikin ijo ilope.
Kicam ijo aruaro, ibuni ijo araun nika acoa.
33Ayong'ite Lokapolon erait akisisia alope.
Tar ijo akiyapepera ering'a ijo kidumuna akibusesu.
Currently Selected:
Awaragasia 15: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
