Awaragasia 17
17
1Ejokuna akinyama imudud kojaasi ijo ka aipuc kotoma adama kon,
akilanya ajaus ka epucit ko otogo kalo ipu ican.
2Ekejaanakinan lo eco edumuni apedor akilanya okoku lokaronon loka ejakait,
kosodi adumun atutubet ka abara.
3Ajokusu ka esawabu ka epuesa etamio akitor akimi,
konye etami Lokapolon etau ka itwan.
4Itung'a lukarokok epupete akiro nukarokok,
bobo ikaliokok epupete akiro nuka aliokonu.
5Kikwenara ijo itung'a lukapalapalak, irasi ijo Akuju lo kesubi kesi.
Kitisilaro ijo kilakara ijo kanuka ican ka itwan.
6Ipogasi imojong' kanuka kitatai kes,
kwape ipogatatar idwe kanuka ikauriaka kes.
7Itung'a lu eyong'ite mam kinerasi aliokonu,
ibang'aisik emam ibore ipede ni elimunete ni ejokuna.
8Itunenete itung'a ice ebe asoya isomae bala amuruoto;
emunokito kesi ebeikini akisomakin ibore.
9Kikote ijo kominutu itung'a ijo, korimak kesi na kisomakinata ijo aronus.
Akiitunun adiakareta ebili epaperone.
10Itwan ni epiriana isisiauni akirot kiretakin katipe,
akilanya ibang'ai ni ibung'ao erwan akwatat.
11Ebuni atwanare bala ekiyakia lo ededeng' nama ka itung'a kalukarokok,
lu igurunenete ican ng'in pak.
12Ejokuna akiriamakin ka adubu na edemarite idwe keng',
akilanya akiriamakin ka ebang' lo erasi ka asoma nuka abang'anut.
13Kitac ijo ajokus ka aronus,
mam ijo kilemari aronus ko otogo kon.
14Ageun ang'olopa eputosi ka ang'akin akipi;
kanuka ng'unu kopalik ering'a ang'olopa kegeuna.
15Atubokin itwan ni emam akirot,
kere de akinyekin itwan nikaronon koika, ereit Lokapolon kere.
16Mam king'arakini ibang'ai akitosoma ikabel ka akisisia,
naarai mam nesi kebeikini akisisia.
17Ipoupatin itoduto amina kes ng'in pak.
Luka inyo konye ipajantin kemam kerait akimor ican?
18Erait itwan ni emam kisisiauni bon nesi ebeikini akisumunikin agwoikin apesen naka itwan ice.
19Amina aronus erait amina ayaute ican.
Kipoga ijo ng'in pak, ilipit ijo ican.
20Itwan kere ni iitunene kinera aronus mam kedumuni ibore ipede,
adepar ican bon.
21Emam ibore ipede adepar akituuru ka akitasiono kamaka ikauriak
kalu isomaete idwe kes iboro luka abang'anut.
22Ajaus ka alakara kiinakiit ijo akijar.
Akinyikokite ng'in pak eyaut atwanare nedio.
23Lukatubonokinak ikaliokok ecamuto kidadakine kesi asoya,
kosial mam abeite kisomakin.
24Itwan ni epiriana ekote asoma ibore nika acoa,
konye ibang'ai egeuni idirarit ng'olo wai.
25Idwe lu ebang'aka eyaunete akituuru nama kes ka papa kes,
ka apipilu nama kes ka toto kes.
26Mam kejokuna ainakin itwan ni emam akirot akitac efain; erono akipoto itung'a lukajokak.
27Ng'ulu lu ejenete ejautene kes ka ikulopek, mam kinerasi ng'in pak.
Itung'a lu ililing'ito ejaasi ka acoa naka abeite.
28Atikere ebang'ai de lo etaa ti imarakino nesi eco;
ketau nesi tii, imarakino nesi epiriana.
Currently Selected:
Awaragasia 17: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
