Awaragasia 14
14
1Aberu na ejaasi ka acoa eduki ere keng',
konye na ebang'ana ebili ka akanin keng' ka alope.
2Ni emunokina eyong'it Lokapolon;
konye ni emam amuno mam keyong'it nesi.
3Ekiner ka ebang'ai erait aparik kanuka akaulo keng';
konye akiro kalu ecoaka idarete kesi.
4Nama emam imong'in, emam inyamata,
konye inyamata lu ipu ebunete ka agogong'u ka imong'in.
5Nikajenan nika abeite inera abeite ng'in pak,
konye ni mam kemunokina inera aliokonu bon.
6Itung'a lu ipogasi mam kebeikinete araun luka acoa,
konye itung'a luka acoa isisiaunete atipet.
7Kikunyarite kamaka itung'a kalu ebang'aka;
emam ibore ipede ebeikinete kesi akisisiakin ijo.
8Inyo eco itwan ni epiriana?
Naarai ejeni nesi nu itemokina asoma.
Inyo ebang'anar itwan ni ibang'?
Naarai iitunene nesi bon ebe ejeni nesi.
9Itung'a lu ibang'aisik mam kepodosi kisomata kesi aronus,
konye itung'a lu ejoka ekotosi kitimoi kesi.
10Alakara kon erait nakon; apipilu kon naka etau erait nakon.
Emam itwan emorete ka ijo.
11Etogo ka itwan kani ejokuna ideun egwoi kedaun amudiar etogo kanikaronon.
12Nu iitunene ijo erait eroto lo ejokuna, ebeikini ayar ijo atwanare.
13Akwena ebeikini igwait akituur.
Kedaun alakara, ejii akituur ng'in pak.
14Itung'a lukarokok edumunete nu itemokina kesi.
Itung'a lukajokak eropio ka asomisio kes.
15Ebang' emunokini ng'ini ibore;
itung'a luka acoa iteete nama itorito.
16Itung'a luka acoa ecoikina mam adumun ican,
konye itung'a lu ebang'aka mam kecoikina bobo eriapanakinosi kes akiro.
17Itung'a lu ededeng' isomaete iboro luka abang'anut;
itung'a luka acoa ideunosi etaasi tii.
18Itung'a lu mam kejenete, edumunete nu itemokina abang'anut kes adumun,
konye lu epiriaka eropio kesi ka akijen.
19Itung'a luka arokusio ebunete aluruokin lu edolito,
ka akimaima ka akiyapepera aking'arasit.
20Emam itwan emina nikapalapalan, atikere ipaduko kes,
konye lu ebarito ejaasi ka ipoupatin lu ipu noi.
21Kikote ijo alakara, kojaasi ka asyanut kamaka lu epalipalito;
erait aronus akinwang'a itwan kere.
22Idumuni ijo amunokina ka ayong'ara kamaka luce kisomae ijo nukajokak;
kisomae ijo nukarokok, idiakarit ijo.
23Kisoma kosodi ijo adumun ibore ni ijaria ijo;
kiboe ijo ka ejori along'u ipalipali ijo.
24Itung'a luka acoa eropio abara,
konye ibang'aisik ejenuno ka abang'anut kes.
25Nikajenan eyuuni akijar ka itung'a kelimo nesi abeite;
na elimoro nesi aliokonu, egwelari nesi itung'a.
26Ayong'ite Lokapolon einakini itwan ka ekale keng' akicasite, ka akidario.
27Ikote ijo akerite atwanare?
Ayong'ite Lokapolon nesi ecor loka akijar.
28Apolou ka ejakait etupasi ka akipuasu ka itung'a kalu ipugae nesi;
emam kesi mam nesi adumunete.
29Kitau ijo tii, icoo ijo, konye kidedeng' ijo,
itoduni ijo abang'anut kon.
30Akinapakina ka adama einakini akwan akijar,
konye eding' itobosi adeka.
31Kiroikit ijo itung'a lukapalapalak, irasi ijo Akuju lo asubi kesi;
konye asyanut na itodikino lukapalapalak, erait akimaa Akuju.
32Itung'a lukarokok ibirorosi ikulopek ka arokusio kes,
konye itung'a lukajokak idari ejautene kes lo ideere.
33Ejii acoa toma awomowomosia ka itung'a kalu epiriaka;
ibang'aisik mam kejenete ibore ipede kuju ka acoa.
34Adolite itopolori akwap;
aronus erait asilutu kakwap kere.
35Elakara ijakaa ka lukapolok lu ejenete asoma,
konye itisilarete kesi ng'ulu lu ibirorito kesi.
Currently Selected:
Awaragasia 14: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
