Awaragasia 11
11
1Ereit Lokapolon itung'a lu itosomaete imisaanin luka aliokonu.
Elakara nesi ka imisaanin luka abeite.
2Itung'a lu ipogasi aaputi akitisilikin.
Akiyapepera ejaasi ka acoa.
3Kijokuna ijo, kiyait ijo abeite.
Itung'a lu mam kemunokite emudiar kesi aliokonu kes ka ikulopek.
4Mam abara king'arakin ijo ibore apaaran naka atwanare kon,
konye ebeikini abeite akiyuun akijar kon.
5Abeite einakini akijar ka itwan etapana,
konye lukarokok emudiarosi ikulopek.
6Adolite iyiuni ng'ulu lu emunokina,
konye ng'ulu lu mam kemunokite ikamuni emwane kesi.
7Ketwakata itung'a lukarokok,
etwaani amuno kes de ka kesi.
Amuno na ipiakite abara emam adumunete.
8Lu edolito eyiuno kocan;
konye kobunete ican ng'ulu nama kalukarokok.
9Ebeikini ejori ka itung'a kalu mam kemunokito amunaun ijo,
konye acoa kalu edolito kiyiun ijo.
10Elakara ere lokapolon ebarito itung'a lu emunokina,
bobo ejii acela naka alakara etwakete lukarokok.
11Epolori ere lokapolon kisilwanyikisi itung'a lu edolito;
konye emudiarete akiro kalukarokok ere lokapolon.
12Erait abang'anut ejori nukarokok kuju kaluce.
Kijaasi ijo ka acoa, itauni ijo tii.
13Emam itwan ipede ni ilodoe ebeikino amunokini,
konye ibeikin ijo amunokini ng'in ni emunokina.
14Ibirori akwap kemam kejaasi ka ayaite na ejokuna.
Nama ejaasi luka acoa lu ipu ejii aipuc.
15Kisumunik ijo akitac apesen kilong'ait, ibuni ijo akimonyo.
Ejokuna kemam ijo kilomit akiro ng'unu.
16Aberu na erimana, eyong'ite,
konye aberu na mam kejaasi ka iponesio erait asilutu.
Itung'a lu ekalanyaka mam cut kedumunete ikabel,
konye itung'a lu ekukunyaka edumunete abara.
17Etwan lo itimono edumuni elope ajokusio.
Konye lo ekutukana ikang'asa elope.
18Itung'a lukarokok mam cut kedumunete ibore ipede,
konye kisoma ijo nu itemokina, idumuni ijo eropit.
19Itwan kere ni ekote asoma nu edolito ejari,
konye ng'in kere ni itolosit asoma nukarokok etwaani.
20Ereit Lokapolon itung'a lu ewomowomoete nukarokok,
konye emina nesi ng'ulu lu isomaete nu itemokina.
21Kojenete itung'a luka arokusio itisilaro,
konye lu edolito ekuyete.
22Aberu na itemelel komam acoa eputosi
ka egilutu loka esawabu kokume ka epege.
23Esial kanu ekotosi itung'a lukajokak ng'ini pak ejokuna;
kedumutu lukarokok nu ekotosi kesi, enyunyura ng'in itwan.
24Ni einanakini ka asyanut itolosi akibara.
Konye ni eninik, itolosi apalapala.
25Itwan ni esyana ing'aranakino,
ni itamasenene luce akipi itamasio nesi de.
26Ilamenenete itung'a itwan ni igwainene inyamata,
idarit etie kodoka kuju, konye itamaete kesi ni itegweli.
27Kejoka nu ikote ijo asoma, kiyong'io ijo,
konye kikote ijo ican, ng'in nesi ibore idumuni ijo.
28Ng'ini ni emunokit abara keng' ebuni akiriny,
konye ni edolit ecalicali bala akuyet.
29Ng'ulu lu eyauto ican oreria kes,
mam kedumunete ibore kosial.
Itung'a lu ebang'aka eraunete lukejaanakinak kaluka acoa.
30Adolite einakini akijar, konye adedeng'u elemari akijar.
31Ng'ulu lu ejoka eropio kokwap kane,
kanuka ng'unu kojeni ebe itisilaro itung'a lukarokok nepepe ka lukarokusio.
Currently Selected:
Awaragasia 11: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
