Awaragasia 12
12
1Ng'ulu lu eminasi iponosio lukajokak, eminasi akijen.
Konye ni eng'erit akicorio erait ibang'ai.
2Elakara Lokapolon ka itung'a lu ejoka,
konye etubokini ng'ulu lu itemetemete asoma arokusio.
3Aronus mam kidari ijo, konye itung'a lu edolito icasito.
4Aberu na ejokuna einakini okilen keng' akibusesu, nepepe ka ailele;
konye aberu na eyauni asilut nama ka
okilen keng' eputosi ka abosus ka akojo ka okilen keng'.
5Itung'a lu emunokina ebunete ayaite ijo ka adolit;
lukarokok ekotosi aking'ala ijo.
6Akiro kalukarokok aariete,
konye akiro kalu edolito iyuunete ng'ulu lu itukurianio.
7Lukarokok edaunosi ka auri kes de,
konye auri kalu edolito itolosito akijar.
8Kicoo ijo, itamao ijo;
kibang'ana ijo, kitamamunete itung'a ijo.
9Ejokuna araus itwan nika ng'in paaran ni isomae asoma keng',
akilanya emole araus itwan ni epolo, konye koperi eteng'e.
10Itung'a lu ejoka idarete ibaren kes,
konye lukarokok ededeng' obaren kes.
11Lokakoruon lo ekukunyana ejaasi ka inyamata lu ipu,
konye erait abang'anut adaute akolong' ka asoma kanu emam adumunete.
12Akiro kere nu ekotosi itung'a lukarokok,
erait adumun iboro ka akiro nukarokok, konye lu edolito icasito.
13Lukarokok ikamunosi ka akiro kes ka ikulopek,
konye itung'a lu emonukina elomarete kocan.
14Eropit kon elomuni kamaka akiro kanu ilimuni ijo, kanu isomae ijo;
idumuni ijo nu itemokina ijo adumuni.
15Itung'a lu ebang'ak emunito ng'in pak idereete kesi.
Itung'a luka acoa epupete acorasia.
16Kenyunyurari ibang'ai, ejenuni nesi atipet.
Itung'a luka acoa etakinete tii araton.
17Kiner ijo abeite, isomakini abeite,
konye aliokonu eyari itwan nama erono.
18Akiro nu elimuno mam kewomoomoite ebeikinete aking'as bala ekileng',
konye akiro nu ewomoomoite, ebeikinete akitang'aleun.
19Ejaasi aliokonu ka apak na euriana,
konye abeite iboe ikaru kere.
20Ng'ulu lu itemetemete asoma arokusio, ileleba aliokonu otaon kes,
konye ng'ulu lu isomaete nu ejoka, edumunete alakara.
21Emam ibore nikaronon isomakini nama ka itung'a kalu edolito,
konye lukarokok emam ibore ipede adepar ican bon.
22Mam Lokapolon kemina ikaliokok,
konye elakara kang'ulu lu ericakito akiro kes.
23Itung'a lu ecoak etaasi kesi tii kuju ka akiro kanu ejenete,
konye itung'a lu ebang'aka itodunete awolite kes.
24Akukuranutu einakini ijo ajaakanut;
akalanyanut kitarauni ijo ibulesut.
25Akiyalolong' ebeikini ademar ijo alakara,
konye akiro nukajokak italakarete ijo.
26Itwan ni edolit eng'eri aronus,
konye eroto kalukarokok itapait kesi.
27Kikalanyana ijo, mam ijo atikere kidumuni ibore ni ikote ijo,
konye kikukurana ijo, idumuni ijo abara.
28Adolite erait eroto lo elosi akijar;
aronus erait eroto lo elosi atwanare.
Currently Selected:
Awaragasia 12: TESOP
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
