Olelo 7
7
Bielo bia bitenelo biʼakambo jom
1Koko Yawe akela Mose, “Bala, njokila we mbilʼene nga Nzakomba ele Falo; ko Alona botomolo oke ifoyalema boteli oke. 2Sanga baoyi ba emʼokosisa bauma; ko Alona botomolo oke ifotefela la Falo wae oza bana ba Yisalaele limʼese ekae. 3Ko emi njifocilinganya botema wa Falo, ko mpuza ntaza ikami, ko la belemo bekami bia nkakamwa ndʼese ea Ejipeto. 4Lolo Falo afaokozʼinyo, ko emi njifafya likata likami ndʼEjipeto, ko ndoza beloiʼekami, bantoʼakami, bana ba Yisalaele, limʼese ea Ejipeto la biumbelo biʼenene. 5Ko Ba-Ejipeto bifea wae emi nde Yawe, a emʼosembola likata likami ndʼEjipeto, ko ndoza bana ba Yisalaele lima ntoku ekiyo.” 6Ko Mose la Alona bakelaki ngoko; o ngoki Yawe oasisaka, bakelaki elengʼeko. 7Akiʼyʼotefelaka la Falo, Mose aokita mbula ntuku mwambi, ko Alona aokita mbula ntuku mwambi Iʼisato.
8Koko Yawe atefelaki la Mose la Alona, akela, 9“Ae Falo otefela lʼinyo, ko akela, Leneya bolemo wʼofilo; we kela Alona, Kolʼonkandoʼoke ko usʼoko nda joso ja Falo wae bofaningwa njwa.” 10Ko Mose la Alona baolotswa ele Falo, ko baokela ngoki Yawe asisaka: ko Alona aolusʼonkandoʼokae ndʼase nda joso ja Falo la nda joso ja basaliʼakae, ko bofaningwa njwa. 11Nkako Falo aoleta banto ba wanya la nkanga yʼakunda, ko iyo, wete nkanga y a Ejipeto, bakelaki o ngoko lʼakundaʼakiyo. 12Ekiʼyʼusaka wengiʼonto bonkandoʼokae, beko beofaningwa njwa; ko bonkando wa Alona bomela benkandoʼekiyo. 13Ko botema wa Falo bocilingana, ko ende ntokozʼiyo; ngoki Yawe otefelaka.
14Ko Yawe akela Mose, “Botema wa Falo bocilingana, afimeza wae bana ba Yisalaele bakende. 15Kendʼele Falo la nkesa, bala aocwa ndʼasi; emala ndʼompempe wa ntando okumana lʼende: ko tomba bonkando bofaningwaki njwa nda likata like. 16Ko wʼosangele, Yawe, Nzakomba ea Ba-Ebele antomaki ele we: akela, Kela bantʼakami bakende wete bansaele ndʼete keleke: ko bala, we ntolanga jokoza mo! 17Yawe akelʼelengʼene, Wifea wae emi nde Yawe la joi line; bala njifokunda basi bale nda ntando lʼonkando bole nda likata likami, ko bako bifofaningwa balongo. 18Ko nse ile nda ntando ifowa ko ntando ifoza jei; ko Ba-Ejipeto bafaokuseya lomela basi ba ntando.”
Elo ea joso – basi baofaningwa balongo
19Ko Yawe akela Mose, “Sangela Alona, Kolʼonkandoʼoke ko sembola likata like ndʼasi ba Ejipeto, nda ntando ikiyo, la nda bekeji bekiyo, la nda bicima bikiyo, la nda baembo bakiyo bauma wae bafaningwa balongo: ko balongo bifoyala ndʼese ea Ejipeto euma, nda bijwa bia nganza la nda bijwa bia bikenje.”
20Ko Mose la Alona bakelaki ngoki Yawe asisaka; ko Alona aosangya bonkando ko aokundʼasi baki nda ntando, o nda joso ja Falo, la nda joso jʼasaliʼakae; ko basi bauma baki nda ntando baofaningwʼalongo. 21Ko nse iki nda ntando iwaki; ko ntando ozaki jei, ko Ba-Ejipeto ntabameleya basi ba ntando; ko balongo baoyala ndʼese ea Ejipeto euma. 22Ko nkanga ya Ejipeto bakelaki elengʼeko la bakundaʼakiyo, ko botema wa Falo bocilingana, ko ende ntokozakʼiyo, ngoki Yawe otefelaka. 23Falo aokengwana ko aolotswa ndʼilombe ikande, koko ntilʼotema nda joi line. 24Ko Ba-Ejipeto bauma bacimaki ntutama la ntando, basaki basi wae bamele; ekʼiyo ntabakuseya lomela basi ba ntando, 25Ko bembile beoleka nsambo limʼaki Yawe okundaka ntando.
Currently Selected:
Olelo 7: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
