Olelo 8
8
Elo ea bife – bangeele
1Koko Yawe aotefela la Mose, akela, “Otswʼele Falo, wʼokele, Yawe akela ngone, Kela bantoʼakami bakende wae bansaele. 2Ko nkina ofeka lʼiyo wae bafokende, bala, njifosisoza ese eke euma la bangeele; 3ntando ifoota bangeele ko bifosafwa, ko baoya ndʼilombe ike, la nda ntena eke ea ntange, la nda ntange eke, la ndʼilombe yʼasaliʼake ko lʼele bantoʼake, ko la bitumbelo bike bia toma, ko la nda eoka eke ea nyanyila ea mampa; 4ko bangeele bako bifoyʼele we lʼantoʼake, ko lʼele basaliʼake bauma.” 5Ko Yawe aokela Mose, “Sangela Alona, Sembola likata like lʼonkandoʼoke nda ntando, la ndʼekeli, la nda bicima, ko wieza bangeele wae basafwa ndʼese ea Ejipeto!” 6Ko Alona aosembola likata likae ndʼasi ba Ejipeto; ko bangeele baosafwa, ko baokuka ese ea Ejipeto. 7Ko nkanga bakelaki elengʼeko la bakundaʼakiyo, iyo baolieza bangeele ndʼese ea Ejipeto.
8Limʼako Falo aoleta Mose la Alona, aolakela, “Loonda Yawe wae imole bangeele limʼelʼemi ko limʼele bantoʼakami; kela nkaya bantoʼako elekelo wae bakende wete balekya mbeka ele Yawe.” 9Mose aokela Falo, “Wʼambonsise ekeke e emʼokoondela we lʼasaliʼake ko lʼantoʼake, wete bangeele bimane limʼele we la tolombe toke, ko bayala nda ntando kika, ekeke na?” 10Akela, “O lobi.” Ko Mose akela, “O ngoko, joi likelame ngoki joi like: wae wea nkʼosongi la Yawe Nzakomba ekiso. 11Bangeele bifimana limʼele we, la lima tolombe toke, lʼasaliʼake, lʼantoʼake; bayale nda ntando kika.” 12Ko Mose la Alona baolofa limʼele Falo; ko Mose aoonda Yawe ndʼewela ea bangeele bakiʼndʼiezaka ele Falo. 13Ko Yawe aokela elengʼele joi ja Mose; ko bangeele baowa nda tolombe la nda belongo la ndʼasala. 14Ko baotakanya bako, baotoza betole, ko bokili boloza jei. 15Lolo aki Falo ene jomo, aocilinganya botema bokae, ko ntokozakʼiyo; ngoki Yawe okelaka.
Elo ea bisato – nsili
16Koko Yawe aokela Mose, “Sangela Alona, Sembola bonkandoʼoke, kunda wucu wʼokili wete boko bofaningwa nsili ndʼese ea Ejipeto euma.” 17Baokela ngoko; Alona aosembola likata likae lʼonkandoʼokae, aokunda wucu wʼokili, ko boko bofaningwa nsili elʼanto la nyama; wucu wʼokili bouma bofaningwa nsili ndʼese ea Ejipeto euma. 18Ko nkanga baomeka jieza nsili la bakundaʼakiyo, lolo ntabakuseya: ko nsili iki elʼanto la nyama. 19Limʼako baokela Falo, “Bone wete bosai wa Nzakomba.” Koko botema wa Falo bocilingana, ko ende ntokozʼiyo, ngoki Yawe okelaka.
20Ko Yawe aokela Mose, “Betswa la nkesa mongo, ko emala nda joso ja Falo; bala, aoya ndʼasi; wʼosangele, Yawe akela ngone, Kela bantoʼakami bakende wae bansaelʼemi. 21Nkina ofimeza wae iyo bakende, bala, njifokotomela bitukuluku bia belanza ele we, lʼele basaliʼake, ko lʼelʼantoʼakawe, la nda tolombe toke: ko tolombe ta Ba-Ejipeto tifokama la bitukuluku bia belanza, ko lʼokili boyalʼiyo ngoko. 22Ko emi njifotenʼolelo ndʼese ea Ngosena efetsa bantoʼakami, wete bitukuluku bia belanza bifaokitʼeko wete wea wae emi nde Yawe ndʼokili. 23Njifotenʼolelo ndatsa bantoʼake la bantoʼakami; lotaza lone lifiela lobi.”
Elo ea binei – belanza
24Koko Yawe aokela ngoko: bitukuluku biuke bia belanza bioya ndʼilombe ya Falo, la nda tolombe tʼasaliʼakae; ko ndʼese ea Ejipeto euma, bokili bofitana la ncina ea bitukuluku bia belanza.
25Falo aoleta Mose la Alona, aolakela, “Locwʼolekya mbeka ele Nzakomba ekinyo, ndʼese ene.” 26Mose akela, “Afoonge wae tokela ngoko; nga tokela ngoko, tifolekeza Yawe Nzakomba ekiso mbeka ile linyamo ndʼaiso ba Ba-Ejipeto: bala nga tolekya mbeka itangema linyamo la Ba-Ejipeto nda joso jʼaisoʼakiyo, iyo bafaotonya bikenje nde? 27Tifocwa lokendo ja bembile besato ndʼete keleke, ko tolekya mbeka ele Yawe Nzakomba ekiso elenge e endʼotosisa.” 28Falo akela, “Njifokayʼinyo elekelo wae lokende lolekya mbeka ele Yawe Nzakomba ekinyo ndʼete keleke; lolonde talocwake esi mongo; lombondele.” 29Ko Mose akela, “Bala, ndole limʼele we, ko njifoonda Yawe wete bitukuluku bia belanza bimane limʼele Falo, la limʼele basaliʼakae, ko limʼele banto bakande, o lobi: lolonde Falo atakelake lenkina bofombo wae asuke bantʼako wae bafokende olekya mbeka ele Yawe.” 30Ko Mose aolola limʼele Falo, ko aoonda Yawe. 31Koko Yawe aokela ngoki joi ja Mose; aolimola bitukuluku bia belanza limʼele Falo, la limʼele basaliʼakae, la limʼelʼantoʼakande; nko bolanza bomoko bokociki. 32Koko Falo aocilinganya lenkina botemaʼokae ndʼekekʼene ko afimeza wae bantʼako bakende.
Currently Selected:
Olelo 8: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
