Olelo 6
6
Elaka ea Nzakomba ea njelola
1Ko Yawe akela Mose, “Aeyoko wena elenge e emʼokeela Falo elʼende ifofanga wae Ba-Yisalaele bakende o la likata ja mpamba, ifaita limʼese ekae la likata ja mpamba.”
2Koko Nzakomba atefela la Mose, aolokela, “Emi wae Yawe: 3ko njenyaki ele Abalayama, ele Yisaka, ko lʼele Yakoba la lina ja Nzakomba ea mpamba euma; lolo nceanaki elʼiyo fa lina likami Yawe. 4Ko nkemyaki bokolo bokami lʼiyo wae ndakaya ese ea Kanana, ese ea lifaya likiyo ekiʼyʼokendaka bafaya. 5Ko ndokaki bameko ba bana ba Yisalaele bae Ba-Ejipeto otuka lotuko; ko njolofwa elembelo eʼokolo ekami. 6La ncinʼeko, sangela bana ba Yisalaele, Emi wae Yawe; njifimolʼinyo limʼase bʼelemo bia Ba-Ejipeto, ko ndimolʼinyo lima lotuko lokiyo, ko nsikolʼinyo la lo ja nsembola, ko la biumbelo biʼenene; 7ko njifokolʼinyo elʼemi wae loyaleme bantoʼakami, ko emi njaleme Nzakomba ekinyo: ko lifea wete emi nde Yawe Nzakomba ekinyo ondozakʼinyo limʼase bʼelemo bia Ba-Ejipeto. 8Ko njifotombʼinyo ndʼese ekiʼmʼocikelaka Abalayama la Yisaka la Yakoba elaka wae ndakaya, ko njifokayʼinyo ese eko Iisango. Emi nde Yawe.” 9Ko Mose atefelaki la bana ba Yisalaele ngoko, lolondʼiyo ntabokoza Mose ndʼewela ea lokeseli jʼete maʼekiyo, ko la jombo ja lotuko.
10Yawe atefelaki la Mose, akela, 11“Otswa ele Falo, roi ea Ejipeto, wʼosangele wae akaya bana ba Yisalaele elekelo wae bakende Iimʼese ekae.” 12Ko Mose aotefela la Yawe, akela, “Bala, bana ba Yisalaele ntabokozaki baoyiʼakami: Falo andokozʼemi, emi ofa la nkaso ndʼete feelo ngamo?” 13Ko Yawe aotefela la Mose la Alona, ko aolasisa ndʼeloko ea bana ba Yisalaele ko la Falo roi ea Ejipeto, wete oza bana ba Yisalaele limʼese ea Ejipeto.
Biotswelo bia Mose la Alona
14Bane bale bingambi bia tolongo ta baise: bana ba Lubena, nsomi ea Yisalaele; Anoka la Palu, la Ezelone la Kalumi; bane wete baoci ba Lubena. 15Koko bana ba Simona; Yemuele, la Yamina, la Oada, la Yakina, la Soala, la Saula bona owa bomoto owa Kanana: bane wae baoci ba Simona. 16Koko bane wete baina ba bana ba Lewi elengʼele biotswelo bikiyo: Ngelusona la Koata la Melali: ko mbula ya loiko ja Lewi iki mbula bonkama la ntuku isato la nsambo. 17Bana ba Ngelusona; Libini la Simei elengʼele baociʼakiyo. 18Ko bana ba Koata; Amulama, la Yisala, Ebulone la Uziele: ko mbula ya loiko ja Koata iki wete mbula bonkama la ntuku isato lʼisato. 19Ko bana ba Melali; Mali la Musi. Bane wae baoci ba Lewi elengʼele biotswelo bikiyo. 20Koko Amulama akolaki Yokebede, nkana ea ise ekae waji, ko ende aolootela Alona la Mose: ko mbula ya loiko ja Amulama iki bonkama la ntuku isato la nsambo. 21Koko bana ba Yisala; Kola la Nefenge, la Zikili. 22Koko bana ba Uziele; Misaele la Elezafana, la Siteli. 23Ko Alona aokola Eliseba, bona owʼomoto owa Aminadaba, nkana ea Nasona, waji; ko ende aolootela Nadaba la Abiu, la Eleazala, la Itamala. 24Koko bana ba Kola; Asila la Elekana, la Ebiasafa; bone wae baoci ba Kola. 25Ko Eleazala, bona owa Alona, aokola bona omo owa Putiele, waji, ko ende aolootela Finasa. Bane wete bingambi bia tolongo ta Ba-Lewi, eleng’ ele baociʼakiyo.
26Bane wae Alona eko la Mose eko baki Yawe okelaka, “Loza bana ba Yisalaele limʼese ea Ejipeto, elengʼele beloi bekiyo.” 27Bane wete nkʼiyo batefelaki la Falo roi ea Ejipeto, wae boza bana ba Yisalaele limʼEjipeto: bane wae Mose eko la Alona eko.
28Koko nda mbile eki Yawe otefelaka la Mose ndʼese ea Ejipeto, 29Yawe akelaki Mose, “Emi nde Yawe: we, sangela Falo roi ea Ejipeto baoyi ba emʼokosangela bauma.” 30Mose aokela nda joso ja Yawe, “Bala, emi mpa la nkaso ndʼete feelo, Falo andokozʼemi ngamo?”
Currently Selected:
Olelo 6: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
