Olelo 5
5
Mose la Alona nda joso ja Roi ea Ejipeto. Falo aokokeza Ba-Yisalaele bolito wʼosala
1Ndʼafeka Mose la Alona baocwʼele Falo, ko baolokela, “Yawe, Nzakomba ea Yisalaele, akela ngone, Kela bantʼakami bakende, wae balamb’ elambo elʼemi ndʼete keleke.” 2Falo aokela, “Yawe ale na? ndokoza lofoso lokande wete Ba-Yisalaele bakende lae? Emi mpea Yawe, koko mpaokaya Yisalaele elekelo wae bakende.” 3Iyo bakela, “Nzakomba ea Ba-Ebele aokumana lʼiso: tokoonda, kelʼiso tokende ndʼete keleke lokendo ja bembile besato, wae tolekya mbeka ele Yawe Nzakomba ekiso; nyango afotokwelʼiso lʼeto ea nkangi, nkina lʼifaka yʼetumba.” 4Roi ea Ejipeto aokela, “Inyo Mose la Alona losukʼanto ndʼesalaʼekiyo likambo na? Lonco ndʼelemoʼekinyo.” 5Ko Falo akela, “Bala banto bʼese ene balʼauke, ko inyo lolaomya limʼelemo bekiyo!” 6Ko nda mbilʼeko Falo aosisa bakapita bʼantoʼako, la bankolo bakiyo, akela, 7“Talokaake lenkina bantʼako bete mbe ndʼosalaʼokiyo wa briques ngokiʼny’ akaaka nda joso: lacike, baocwʼotakanya bete mbe iyo mongo. 8Ko leta limʼelʼiyo botunya wa briques ngokiʼyʼemaka nda joso, talakokolake botunya nye: elʼiyo la mponye: ndʼewelʼeko baolela bakela, Kelʼiso tocwʼolekya mbeka ele Nzakomba ekiso. 9Lofuzʼelemo bia baendeʼako wete bakambe nkʼelengʼeko: ko talolangake wae bokoza baoyi bʼampulu.”
10Bakapita bʼantʼako baolola, iyo lʼankoloʼakiyo, ko baosangelʼanto bako bakela, “Falo akela ngone, Mpaokayʼinyo bete mbe. 11Inyo mongo locwʼasa bete mbe nda wiji bo inyʼoata, lolonde botunya wʼosala bokinyo bofaokokwa nye.” 12Elengʼeko bantʼauma baofalangana ndʼese ea Ejipeto euma, wae base bailo, efʼiyʼoate bete mbe. 13Ko bankolo baolakama, bakela, “Losizʼotunya wa wengi mbile ngoki joso, akiʼnyo lʼete mbe.” 14Ko baokunda bakapita ba bana ba Yisalaele baki bankoloʼakiyo ailelaka, bakela, “Lotasizʼotunya wa briques wa mbilʼeki lobi la mbilʼene ngoki joso lae?”
15Nkako bakapita ba bana ba Yisalaele bayoonde Falo, bakela, “Oyokeele basaliʼake elengʼene ncina na? 16Bafotokaya bete mbe, ko batokela, Lema briques: ko bala basaliʼake baokundama la njiji; lolo liunga lilʼele banto bakawe mongo.” 17Lolonde Falo akela, “Inyo lole la mponye, lole la mponye: ndʼewelʼeko lokela, Kelʼiso tocwʼolekya mbeka ele Yawe. 18Ndʼewelʼeko, lonco aeyoko, losala besala bekinyo, lofaata lenkina bete mbe, lolo lifokokya botunya wa briques.” 19Bakapita ba bana ba Yisalaele baolena wae likambo likiyo jokaka, akiʼyʼokaka wae bafokiteza botunya wa briques ndʼosala wa wengi mbile. 20Ko iyo baokumana la Mose la Alona bakemi nda mboka, akiʼyʼolaka limʼele Falo. 21Baolakela, “Yawe aalʼinyo, ko atene likambo; elʼinyo lotilʼiso nga toza jei jʼobe nda joso ja Falo ko lʼasaliʼakande, lo lolilʼifaka yʼetumba nda likata likiyo wae batoome.”
22Ko Mose aoluta ele Yawe, aokela, “O Yawe, okeela bantʼane bobe lae? Ontomaki likambo na? 23Limʼakiʼmʼoyaka ele Falo otefela nda lina like, ende aokeela bantʼane bobe, ko we otaikya nye.”
Currently Selected:
Olelo 5: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
