Olelo 3
3
Itamba iyofete la tsa
1Mose esanyaki mpate yʼokilo okae Yitelo, nkanga ea Midiana, ko aotomba mpate nda wiji wa ouest ndʼete keleke, ko aokita nda ngongo ea Nzakomba wete Olebe. 2Ko ekima ea Yawe aolenyʼelʼende nda lombe ja tsa, ndʼetei ea itamba; ende aolenda, ko bala, itamba iyofete la tsa, ko itamba ntilika. 3Mose akela; “Ndetʼendo fele wae ndenʼetalo ene ko la ncina efa itamba olike.” 4Aki Yawe ene wae aoleta wete alende, Nzakomba aoloeta limʼete i ea itamba, akela, “Mose, Mose!” 5Ko ende aokela, “Emʼone.” Aokela, “Totutamake, lotola bikoto limʼakakaʼake, ele itenela indemi we ile itenela yʼoeko.” 6Koko aokela, “Emi nde Nzakomba ea ise eke, Nzakomba ea Abalayama, Nzakomba ea Yisaka, Nzakomba ea Yakoba.” Ko Mose aokukʼelongi ekae; ntaaleya Nzakomba ekiʼndʼoangaka.
7Yawe akela, “O nsosolo, njenaki elo endena bantoʼakami ndʼEjipeto, ko ndokaki lilelo likiyo ndʼewela ea bankolo bakiyo: elʼemi ndea nkeseli ikiyo: 8ko njokitela wae ndasikole limʼakata ba Ba-Ejipeto, ko ndaoza limʼese eko, ko ndayele ndʼese eʼolotsi lʼeʼenene, wete ese efula lʼaele la mpako: wiji bofetsa Ba-Kanana la Ba-Ete, la Ba-Amola, la Ba-Peliza, la Ba-Iwa, la Ba-Yebusa. 9Ko aeyoko, bale lilelo ja bana ba Yisalaele jokitʼelʼemi: koko njolena lotuko lotukamʼiyo la Ba-Ejipeto. 10Ndʼewelʼeko, yaka, nkotomele Falo, wae woza bantoʼakami bana ba Yisalaele limʼEjipeto.” 11Mose aokela Nzakomba, “Emi nde na? wae ncwʼele Falo, ko ndoza bana ba Yisalaele limʼEjipeto?” 12Koko Nzakomba aolokela, “O nsosolo emi njifoyala la we; ko lone lotaza ele we wete njokotoma: ae wʼoyelʼantʼako limʼEjipeto, lifosaela Nzakomba nda ngongo ene.”
13Ko Mose aokela Nzakomba, “A emʼokitʼele bana ba Yisalaele ko ndakela, Nzakomba ea baiseʼakinyo aontomʼelʼinyo; ko banduola, Lina likande na? Joi li emʼasangela na?” 14Nzakomba aokela Mose, “EMI NDE, WAE NDE.” Ko akela, “Sangela bana ba Yisalele ngone, NDE aontomʼelʼinyo.” 15Koko Nzakomba aokela Mose, “Wifosangela bana ba Yisalaele baoyiʼane, Yawe Nzakomba ea baise bakinyo, Nzakomba ea Abalayama, Nzakomba ea Yisaka, Nzakomba ea Yakoba, aontomʼelʼinyo. Line wae lina likami seko, ko jofwa likami elaka nko biotswelo biuma. 16Kenda yotakanya bingambi bia Yisalaele, wʼakele, Yawe Nzakomba ea baise bakinyo, Nzakomba ea Abalayama, lʼea Yisaka, lʼea Yakoba, aolenyʼelʼemi, ko akela, Nsosolo njolobiza, ko njolena baoyi bakelamʼelʼinyo nda Ejipeto: 17ko njokela, Njifozʼinyo limʼelo ea Ejipeto ko njelʼinyo ndʼese ea Ba-Kanana, la Ba-Ete, la Ba-Amola, la Ba-Peliza, la Ba-Iwa, la Ba-Yebusa, wae ese efula la baele la mpako. 18Ko iyo bifokoza lofoso loke; ko wifokita, we la bingambi bia Yisalaele, ele roi ea Ejipeto, ko lokele, Yawe, Nzakomba ea Ba-Ebele aokumana lʼiso; aeyoko, tokoonda, kelʼiso tokende ndʼete keleke lokendo ja bembile besato, wae tolekya mbeka ele Yawe Nzakomba ekiso. 19Koko emi njolea wete roi ea Ejipeto afoakayʼinyo elekelo wae lokende, imola nko la likata ja mpamba. 20Ko emi njifosembola likata likami, wete nsisoza Ejipeto lʼelemo bekami bia nkakamwa be emʼokela ndʼetei ea ese eko; ko ndʼafeka, ifimeza wae lokende. 21Koko njifoatela bantʼane boya ndʼaiso ba Ba-Ejipeto; ko joi lifiela wae a inyʼokenda, lofaocwa o mpampa: 22lolonde wengiʼonto ifuolʼende osingitana lʼende lʼendʼoyala ndʼilombe ikande, bekombe bia argent la wolo, ko lʼenkoto. Lifolotsa bana bakinyo bʼaende lʼamato belemoʼeko ko inyo lifofunza Ba-Ejipeto.”
Currently Selected:
Olelo 3: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
