Olelo 4
4
1Mose aolamba, akela, “Lolonde bala, bafaondimeza ko bafaokoza lofoso lokami: iyo bifokela, Yawe ntenya ele we.” 2Yawe aolokela, “Boko bokici we nda likata like na?” Aokela, “Bonkando.” 3Ko Yawe aokela, “Usʼoko ndʼamoci.” Aolusʼoko ndʼamoci, ko bofaningwa njwa: Ko Mose aolota njwa eko. 4Ko Yawe aokela Mose, “Sembola likata like, ko kitʼeko nda losolongo”, – ko aosembola likata likande ko aokitʼeko, ko eko eofaningwa lenkina bonkando nda likata likande – 5“la ngoko bimeza wete Yawe Nzakomba ea baise bakinyo, Nzakomba ea Abalayama, Nzakomba ea Yisaka, la Nzakomba ea Yakoba, aolenya ele we.” 6Ko Yawe aolokela lenkina, “Aeyoko ila likata like nda ntolo eke.” Aolila liko nda ntolo; ko akiʼndʼimolaka liko, bala, likata likae jokela nkangi ea baeka, fe nga neige. 7Ko akela, “Ila lenkina likata nda ntolo.” Ko aolila lenkina likata likande nda ntolo ko akiʼndʼimolaka liko lima ntolo, bala, joluta lenkina elengʼele wunyu bokae mongo. 8Ko joi lifiela, “Nkina iyo bafokimeza, ko bafokoza lofoso ja lotaza ja joso, bifimeza lofoso ja lotaza jʼafeka. 9Koko joi lifiela, nkinʼiyo bafimeza ntaza ikʼife, ko bafokoza lofoso lokawe, we wifotokolʼasi ba ntando, ko wutezʼako ndʼokili, ko basi batokola wenda ntando bifofaningwa balongo ndʼokili.”
10Mose akela Yawe, “O Nkolo, limʼeki joso, ko limʼaki wʼotefelaka lʼosali oke, emi mpa la nkaso; elʼemi ndeki bontoku ndʼomwa, ko la lokuto ndʼete feelo.” 11Koko Yawe aokela, “Ondemaki bomwa wʼonto na? Ondema bonto lokisi, lʼokindʼatoi, oyene ko oweiʼaiso na? Af emi, Yawe nde? 12Ndʼewela eko kenda, ko emi njifoyala lʼomwaʼoke, ko nkolake baoyi bae wʼotefela.” 13Mose akela, “O Nkolo ekami, nkoonda, toma la likata jʼonto oe wʼotoma.” 14Limʼako Yawe aolemwa Mose bolemo, ko aokela, “Alona, owa Lewi, afa botomolo oke? Ndea wae ende ale nkaso ndʼomwa. Ko bala, aoyʼokumana la we: ko a endʼokena, ifokʼekemo ndʼotemaʼokande. 15Ko we wifotefela lʼende, ko wilʼaoyi ndʼomwaʼokande, ko emi njifoyala la bomwaʼoke, ko la bomwaʼokae: ko ndakʼinyo elenge e inyʼokela. 16Ko ende ifoyalema botefeji oke elʼanto: ende ifoyalema ele we ngole bomwa, ko we wifoyalemʼelʼende ngole Nzakomba. 17Tomba bonkando bone nda likata like, boko boe wʼokela belemo bia nkakamwa.”
Utelo ea Mose nda Ejipeto
18Koko Mose aocwa, aoluta ele Yitelo bokilo okae, aolokela, “Nkoonda, kela nkende wae ndute ele ilongo ikami bale ndʼEjipeto, kela ndene nkina bayoike.” Ko Yitelo aokela Mose, “Kenda la kuci.” 19Ko Yawe aokela Mose nda Midiana, “Kenda, yute ndʼEjipeto: ele banto bakasaki we wae bakoome baowa nkʼiyʼauma.” 20Koko Mose aokola waji okae lʼanaʼakae bʼaende, aolaafya nda mpunda, ko aoluta ndʼese ea Ejipeto: ko Mose aotomba bonkando wa Nzakomba nda likata likae.
21Yawe akela Mose, “Ae wʼuta ndʼEjipeto, fonga lokela nda joso ja Falo baoyiʼako ba nkakamwa bakiʼmʼokolakaka; lolonde emi njifocilinganya botemaʼokae, ko afaolanga wae bantʼako bakende. 22Ko sangela Falo, ‘Yawe aokela baoyiʼane, Yisalaele ale bona okami, wete bona okami owa nsomi: 23njokokela we, Kela bona okami akende wae ankambele belemo: ko ngʼofeka lʼende wae afokende: bala, emi njifooma bona okawe, wete bona oke owa nsomi.’ ”
24Koko Yawe aokumana lʼende ndʼilombe ya lilako nda mboka, ko asaki wae oome. 25Nkako Sipola aokola ekenje ea mpia ko aotena bona okande nsonge, aolusʼeko ndʼakaka ba Mose, ko akela, “O nsosolo, we bome owʼalongo elʼemi!” 26Ko Nzakomba aolocika. Kela Sipola akela, “We bome owʼalongo elʼemi,” ndʼewela ea ntatena ea nsonge.
27Koko Yawe akela Alona, “Kenda ndʼete keleke okumana la Mose.” Ko ende aocwa ko aokumana lʼende nda ngongo ea Nzakomba, ko aolosambela la baiser. 28Mose aosangela Alona baoyi baki Nzakomba otomakʼende bauma, ko la ntaza ikiʼndʼosiselaka. 29Koko Mose la Alona baocwa otakanya bingambi bia Yisalaele biuma: 30ko Alona aosangʼaoyiʼauma baki Yawe osangelaka Mose, ko aokela ntaza nda joso jʼanto. 31Ko banto baolimeza, ko akiʼyʼokaka wae Yawe aobiza bana ba Yisalaele, ko aolenʼelo ekiyo, baosunyʼetsa bekiyo ko baomemya Nzakomba.
Currently Selected:
Olelo 4: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
