Olelo 12
12
Efendelo – iwa ya nsomi – Ba-Yisalaele bola limʼEjipeto
1Koko Yawe aotefela la Mose la Alona ndʼese ea Ejipeto, akela, 2“Nsanzʼene ifoyalemʼelʼinyo iango ya nsanza: ifoyala nsanza ea joso ea mbula elʼinyo. 3Losangela etakano euma ea Ba-Yisalaele lakele, Nda mbile ea jom ea nsanza ene bakole wengiʼonto wengi bona owa mpate, elengʼele tolombe ta baise bakiyo, wengi ilombe wengi bona owa mpate: 4ko nkina ilombe iko ifokoke la bona owa mpate, kela bomongʼilombe lʼonto osingitana lʼende tute bakole bona owa mpate emoko isangi elengʼele boanji wʼanto; leza bona owa mpate elengʼele elelo ea wengiʼonto. 5Bona owa mpate okolʼinyo, wete jende okita mbula emoko, nkʼolema, lokolʼoko lima mpate nkina lima nta: 6ko loombʼoko elaka nko mbile ea jom lʼinei ea nsanzʼeko, ko bantʼauma ba etakano ea Ba-Yisalaele baome nyama eko lʼokolo. 7Ko bakole balongo ba mpate eko, ko basanzole ndʼakonji ba wiso bakʼafe, la ndʼosukutswa bole ndʼaliko ba wiso wʼilombe i iyʼola nyamʼeko. 8Bale nyamʼeko o lʼotsʼoko, ntatumba la tsa, bale la mampa esamba nyango; bale la njunda yʼololo. 9Batalake la wufufu, ko bataleke nkakatsa lʼasi, lolonde ntatumba la tsa; o lʼotsa la bekolo, lʼefonda. 10Talocikakʼemo elaka nko nkesa; nkina nyamʼemo eciki la nkesa, lolongozʼiko nda tsa. 11Ko loleke ngone; lʼembembe bekinyo ndembama, la sandala yʼakaka o ndalota, lʼenkandoʼekinyo o nkakita nda likata: ko loleke la lomolomo; eko ele Efendelo ea Yawe. 12Elʼemi njifotuwana ese ea Ejipeto lʼotsʼoko, ko njifooma nsomi iuma ndʼese ea Ejipeto, lʼanto la nyama: ko emi njifotena bakambo ba nzakomba ya Ejipeto iuma: emi nde Yawe. 13Ko balongo bako bayaleme elʼinyo lotaza nda tolombe tokinyo toyalʼinyo: ko a emʼena balongoʼako njifofendʼinyo; a emʼooma ese ea Ejipeto, nsisoza efaokitʼelʼinyo wae efitʼinyo.
14“Ko mbilʼene ifoyalemʼelʼinyo mbile ea jofwa, ko lifofongʼeko wae elambo ea Yawe. Losekya mbilʼeko elambo bikeke biuma seko nda biotswelo bikinyo biuma. 15Loleka mampa esamba nyango bembile nsambo; limola nyango ea mampa lima tolombe tokinyo nda mbile ea joso: bonto nko loswele ola mampa ele la nyango lima mbile ea joso o la mbile ea nsambo bembileʼeko beuma, bontʼoko ifozama limʼele Ba-Yisalaele. 16Nda mbile ea joso lotakana ndʼetakano ea boeko ko nda mbile ea nsambo etakano ea boeko; lotakambakʼolemo nda bembile beko imola nko toma tolʼanto, bolemo bokambʼinyo o boko. 17Lofongʼelambo ea mampa esamba nyango; ekiʼmʼoyelaka beloi bia bantʼakinyo limʼese ea Ejipeto nda mbilʼeko: ndʼewelʼeko, lofonga mbilʼeko nda biotswelo bikinyo biuma lʼesekyelo bikeke biuma seko. 18Nda nsanza ea joso, nda mbile ea jom lʼinei lʼokolo, loleka mampa efa la nyango elaka nko mbile ea ntuku ife lʼemoko lʼokolo. 19Nyango ea mampa etatanemake nda tolombe tokinyo nda bembile beko nsambo; bonto nko loswele ola mampa ele la nyango, ifozama limʼetakano ea Ba-Yisalaele, nkina ale bofaya nkina bonto ootswaki ekʼinyo. 20Lotaleke yomba ile la nyango ea mampa; ndʼeyalo bekinyo beuma loleka nko mampa efa la nyango kika.”
21Limʼako Mose aoleta bingambi bia Yisalaele, ko aolakela, “Locwʼokola bana ba mpate elengʼele tolongo tokinyo, ko looma bona owa mpate owa Efendelo. 22Ko lokola esombo ea hysope ko lotefyʼeko ndʼalongo bale ndʼijwa ko lokunda ndʼosukutswa la ndʼakonji bakʼafe ba wiso lʼalongo bale ndʼijwa; ko nkʼonto ondola lima wiso wʼilombe ikande elaka nko nkesa. 23Ele Yawe ifotuwana wae aome Ba-Ejipeto ko a endʼena balongo bako ndʼosukutswa la nda bakonji bakʼafe ba wiso, Yawe ifofenda wisoʼoko, ko afaolanga wete bofici otswa nda tolombe tokinyo wae aomʼinyo. 24Ko inyo lifokela elengʼene nga esekyelo, we lʼanaʼake bikeke biuma seko. 25Koko joi lifokelama, a inyʼokita ndʼese ee Yawe okayʼinyo elengʼele elaka ekiʼndʼocikelakʼinyo, wete lofongʼokamba ekambelo ene. 26Ko ae bana bakinyo okelʼinyo, ‘Bolemʼone bole na?’ 27Inyo lifokela, ‘Ele wae mbeka ea Efendelo ea Yawe, ofendaki tolombe ta bana ba Yisalaele ndʼEjipeto, akiʼndʼoomaka Ba-Ejipeto ko aikyaki tolombe tokiso.’ ” Ko bantʼako baosunyʼetsa ko baomemya Nzakomba.
28Ko bana ba Yisalaele baocwʼokela ngoko: elengʼeki Yawe osisaka Mose la Alona, iyo bakelaki nkʼelengʼeko.
29Koko joi jokelama ndʼete kole eʼotso, Yawe aomaki nsomi iuma ndʼese ea Ejipeto, la nsomi ea Falo okokitase nda ngwende ekae ea roi, la nsomi ea loanga oki ndʼilombe yʼonyolo: ko la nsomi ya nyama iuma. 30Falo aoetswa lʼotso, ende lʼasaliʼakae bauma, la Ba-Ejipeto bauma; ko lilelo jolekola ndʼEjipeto; nkʼilombe imoko iki omo ntawaki. 31Ko aoleta Mose la Alona lʼotso, akela, “Lemala, lokende, limana limʼelʼantoʼakami, inyo la bana ba Yisalaele; locwʼokambela Yawe bolemo ngokiʼnyʼuolaka. 32Lotomba betonga bia mpate la nta la ngombo ikinyo ngokiʼnyʼokelaka, ko lokenda; koko lonsakelʼemi bokako wa swa!”
33Ko Ba-Ejipeto baolakama, wae basokolʼiyo limʼese eko la lomolomo; ekiʼyʼokelaka, “Isʼauma towa mo!” 34Ko bantʼako baotomba mampa itilame nyango, ko baokoma bioka lʼetute ndʼenkotoʼekiyo ko baolofya bako ndʼasokoʼakiyo. 35Bana ba Yisalaele bakelaki ngoki joi ja Mose; buolaki Ba-Ejipeto belotswaka bia argent la bia wolo, ko lʼenkoto: 36ko Yawe aolaatela elula ndʼaiso ba Ba-Ejipeto, ko iyo bakaaki toma tokiʼyʼauolaka. Ko elengʼeko bafunzaki Ba-Ejipeto.
37Bana ba Yisalaele baocwa lima Lamesese nda Sukota, baki baende mongo nga nkoto benkamʼotoa, ko lʼanolu. 38Ko etukuluku eʼanto ba nko loswele bacwaki lʼiyo, bouke mongo; lʼetonga bia mpate la nta la ngombo, nyama ya mbongola iuke mongo. 39Ko batumbaki mampa isamba nyango lima mampa iko ikiʼyʼoyelaka lim’ Ejipeto, eki iko ntiki la nyango; ekiʼyʼosokolamaka limʼEjipeto la lomolomo, ko ntabasalingwaki la toma ta ndala nye.
40Ekeke eki bana ba Yisalaele oyalaka ndʼEjipeto eki wete mbula benkamʼenei la ntuku isato. 41Nda nsukela ea mbula benkamʼenei la ntuku isato, o nda mbilʼeko ea nsukela, beloi biʼanto ba Yawe beuma beolola limʼese ea Ejipeto. 42Botsʼoko bosekyama esekyelo wete bafongʼoko ele Yawe, ekiʼndʼayelaka lima ese ea Ejipeto: botsʼoko wae botso wa Yawe, ko bana ba Yisalaele bauma bafongʼoko mpafonga mongo nda biotswelo bikiyo biuma.
43Koko Yawe aokela Mose la Alona, “Ene wae esekyelo ea Efendelo: bofaya ataleke eko nye; 44lolonde bokwala owa wengiʼonto osombamaki lʼaumba, ae wʼotenʼende nsonge, aleke. 45Bofaya la bosali owʼofuto bataleke. 46Efendelo eleama ndʼilombe imoko; talotombake nyama emo ndʼanza bʼilombe; ko talounake wese wa nyamʼeko. 47Etakano ea Yisalaele euma bafongʼeko. 48Wenaka bofaya omo ayala la we, ko alanga lofongela Yawe Efendelo, kela baende bakae bauma batename nsonge, ko limʼako kela aye ko afongʼeko; ko ende ifoyalema elengʼele bonto ootswaki ndʼese ekinyo; lolonde nkʼonto otatename nsonge alʼeko ndala. 49Esekyelo ele nkʼemoko, ele bomongʼola lʼele bofaya oyala lʼinyo ngoko.”
50Bana ba Yisalaele bauma bakelaki ngoko; ngoki Yawe osiselaka Mose la Alona, iyo bakelaki nkʼelengʼeko. 51Koko nda mbilʼeko, Yawe ayelaki bana ba Yisalaele iimʼese ea Ejipeto lʼeloi bekiyo.
Currently Selected:
Olelo 12: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
