Olelo 13
13
Besise bia Efendelo la bia nsomi iuma
1Yawe aotefela la Mose, akela, 2“Ombulezʼemi nsomi iuma nda boeko, wete nsomi ya bana ba Yisalaele, iango ya liota, la nsomi yʼonto, la nsomi ya nyama, iko ile wete ikami.”
3Ko Mose aokelʼantʼako, “Lofwa mbilʼene, ekiʼnyʼolaka lima Ejipeto, limʼilombe ya likwala; eki Yawe oyelakʼinyo lima wijʼone la mpamba ea likata: taloleke mampa ele la nyango. 4Mbilʼene lolola nda nsanza ea Abiba. 5Asi Yawe okotsweya ndʼese ea Bo-Kanana, la Bo-Ete la Bo-Amola, la Bo-Iwa, la Bo-Yebusa, ekiʼndʼosiselaka baiseʼake la nsimbi wae akokaya, ese efula la baele la mpako, lofongʼolemʼone nda nsanza ene. 6Leka mampa efa la nyango bembile nsambo, ko nda mbile ea nsambo elambo ifokelama ele Yawe. 7Mampa efa la nyango ifoleama bembile nsambo; mampa ele la nyango efaenya ele we, nda biiji bike biuma. 8Ko sangela bona oke owa jende nda mbilʼeko, kela, Joi line jokelama ndʼewela ea joi liki Yawe onkeelakʼemi akiʼmʼolaka lima Ejipeto. 9Ifoyalema ele we nga lotaza nda likata like, ko la jofwa ndatsa baiso bake, wete bisekyelo bia Yawe biyale ndʼomwaʼoke: eki Yawe okoyelaka limʼEjipeto, la likata ja mpamba. 10Ndʼewelʼeko, fongʼesekyelo ene ndʼekeke endezama lʼeko mbula la mbula.
11“Asi Yawe okotsweya ndʼese ea Ba-Kanana ngokiʼndʼokosiselaka we lʼaiseʼake la nsimbi, ko akokaya we ese eko, 12wifobuleza Yawe nsomi iuma, iango ya liota, ndʼoeko; ko la wengi nsomi ya nyama; baende bayale ba Yawe. 13Koko wifosikola cu nsomi ea mpunda la bona owa mpate; ko nkina ofolange losikolʼeko, buna nkingo ea eko: sikola nsomi yʼanto iuma ya banaʼake. 14Ko wenaka bona oke akuola we life, akokela, Joi line na? wʼosangele, Yawe atoyelaki lima Ejipeto, limʼilombe ya likwala, la mpamba ea likata: 15ko aki Falo ntalangʼolotsi wae tokende, Yawe aomaki nsomi iuma ndʼese ea Ejipeto, la nsomi yʼanto la nsomi ya nyama: ndʼewelʼeko ndekya mbeka ele Yawe ea nsomi yʼaende iuma wete iango ya liota; lolonde njosikole nsomi ya banaʼakami bauma la nsiko. 16Ko joi line liyale lotaza nda likata like, ko la ntaza ya joso ndatsa baisoʼakawe: eki Yawe otoyelaka limʼEjipeto la mpamba ea likata.”
Lokendo ndʼete keleke – Efendelo ea Lieke ja Ngola
17Aki Falo okaaka banto elekelo wae bakende, Nzakomba ntalondakʼiyo nda mboka ea Ba-Pelesete, mpeka la mboka eko nteki esi: eki Nzakomba okelaka, “Nyango andena bantʼako etumba, bafoyakana, ko bafuta ndʼEjipeto”: 18lolo Nzakomba aolalonda wiji la wiji ndʼete keleke nda mboka endiela Lieke ja Ngola; bana ba Yisalaele bacwaki limʼese ea Ejipeto la bifeko biʼetumba nkakita. 19Ko Mose aotomba biese bia Yosefa lʼende; eki Yosefa osisaka bana ba Yisalaele wae bosimbelʼende nsimbi, aokela, “Nzakomba ifobizʼinyo nsosolo, ko inyo lifotomba bieseʼekami limʼendo.” 20Baocwa nda lokendo lokiyo lima Sukota, ko bezaki lilako likiyo nda Etama, ndʼompempe wʼete keleke. 21Ko Yawe aocwa nda joso likiyo la mbile nda likonji ja litute, wete alondʼiyo nda mboka; ko lʼotso nda likonji ja tsa, wae aatelʼiyo fole; wete bakendaka la mbile lʼotso; 22likonji ja litute la mbile, la likonji ja tsa lʼotso, ntabimanaki lima joso ja bantʼako!
Currently Selected:
Olelo 13: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
