Matthew 14

John Onumanyi no Wu

(Mark 6.14-29; Luke 9.7-9)

1Aber no mu no, ɔmansinhen Herod tsee Jesus ne nka, 2na ɔsee n’asomfo no dɛ, Iyi dze, John Onumanyi no a: oenyan no efi ewufo mu; dɛm ntsi na tum ndwuma yi da edzi wɔ no mu yi. 3Ansaana no nna Herod no nua Filip ne yer Herodias ntsi, Herod akyer John akyekyer no akɔto efiadze. 4Ne siantsir nye dɛ John see no dɛ, Innyi ho kwan dɛ ewar basia no. 5Ɔpɛɛ dɛ nkyɛ oku no naaso osuroo ɔman no, osiandɛ wobuu John dɛ nkɔnhyɛnyi. 6Na wodzii Herod n’awoda no, Herodias ne babaa bae bɛsawee wɔ hɔn enyim, na ɔsɔɔ Herod n’enyi. 7Ɔno do na ɔdze ntam bɔɔ no anohoba dɛ ɔbɛma no biribiara a obebisa. 8Na ne na kaa hyɛɛ ne ntsirmu no, ɔsee dɛ, Fa John Onumanyi no ne tsir to prɛtse mu ma me ha. 9Na ɔyɛɛ ɔhen no yaw; naaso ne ntam nye hɔn a wɔnye no tse edzidzi no ntsi, ɔhyɛɛ dɛ wɔmfa mma no: 10na ɔsomae ma wokotwaa John ne tsir wɔ efiadze. 11Na wɔdze ne tsir too prɛtse mu bae, na wɔdze maa akataasia no, na ɔdze kɛmaa ne na. 12Na n’esuafo no bae bɛfaa no fun no kesiei, na wɔkɔree kɛkaa kyerɛɛ Jesus.

Jesus Ma Mpemenum Edziban

(Mark 6.30-44; Luke 9.10-17; John 6.1-14)

13Na Jesus tsee no, ɔtwee noho fii hɔ nam hɛn mu kɔr sar do nkyɛn beebi, na nyimpadodow no tsee no, wofii nkurow mu nam daadze tsiiw no. 14Na odwirii no, ohun nyimpadodow pii, na ne yamu hyehyee no maa hɔn, na ɔsaa hɔn ayarfo yarba. 15Na odur ewimbir no, n’esuafo baa ne nkyɛn bɛsee no dɛ, Ha yi sar do a, na adze so resa: gya nyimpadodow yi kwan, ma wɔnkɔ nkuraase nkɔtɔ edziban mma hɔnho. 16Na Jesus see hɔn dɛ, Onnhia dɛ wɔkɔ beebiara: homara hom mma hɔn biribi ma wondzi. 17Na wɔsee no dɛ, Yɛwɔ paanoo enum nye esunam ebien pɛ wɔ ha. 18Na ɔsee dɛ, Hom mfa mbrɛ me ha. 19Na ɔhyɛɛ nyimpadodow no dɛ wɔntsenatsena mpɔnkɔfuw no do, na ɔfaa paanoo enum no, nye esunam ebien no, na ɔhwɛɛ sor no, ohyiraa do, na obubui, na ɔdze paanoo no maa n’esuafo no, na n’esuafo no dze maa nyimpadodow no. 20Na hɔn nyina dzidzii mee; na wɔtasee mporoporoba a ɔkae no, nkɛntsɛn duebien amaama. 21Na hɔn a wodzidzii no, sɛ wɔannkan mbaa nye mbofraba annka ho a, wɔbɛyɛ mpemenum.

Jesus Nantsew Po Enyi

(Mark 6.45-52; John 6.15-21)

22Na ntsɛmara opiapiaa n’esuafo no dɛ wɔnkɔ hɛn mu na wondzi n’enyim kan wɔ esuegya noho, ma ongya nyimpadodow no kwan.

23Na ogyaa nyimpadodow no kwan no, ɔkɔr koko no do nkyɛn beebi kɔsɔree; na odur ewimbir no nna noara nko na ɔwɔ hɔ. 24Nna aber yi mu no, hɛn no wɔ po finimfin, na asorɛkye rubu bɔ no; na mframa so esi hɔn enyim. 25Na ahanamakye ndɔnnan rokɔ no, ɔnantseew po enyi baa hɔn nkyɛn. 26Na wohun dɛ ɔrenantsew po enyi no, hɔn akoma tui, na wɔsee dɛ, Ɔsaman a, na wɔdze hu kekaa mu. 27Na ntsɛmara ɔnye hɔn kasae, na ɔsee hɔn dɛ, Hom nhyɛ dzen: mara a, mma hom nnsuro.

28Na Peter buaa no see dɛ, Ewuradze, sɛ woara a, hyɛ me ma membra wo nkyɛn wɔ nsu no do. 29Na ɔsee dɛ, Bra. Na Peter fii hɛn no mu sii, na ɔnantseew nsu no do dɛ ɔrokɔ Jesus nkyɛn. 30Na ohun mframa no, osuroi; na ɔhyɛɛ ase rodɔ no, ɔkaa mu dɛ, Ewuradze, gye me. 31Na ntsɛmara Jesus too ne nsa suoo no mu, na ɔsee no dɛ, Ɔwo a wo gyedzi suar, ɔyɛ dɛn ntsi na egyee kyim? 32Na wɔbaa hɛn no mu no, mframa no gyaae. 33Na hɔn a wɔwɔ hɛn no mu no kotoow no dɛ, Ampa, Nyankopɔn Ba nye wo.

Jesus Sa Ayarfo Yarba wɔ Genesaret

(Mark 6.53-56)

34Na wotwae no, wɔbaa Genesaret asaase do. 35Na nyimpa a wɔwɔ hɔ no hun no no, wɔsomae ma wɔkɔr nkurow a etwa ehyia nyina mu, na wɔdze hɔn a wɔyaryar nyina brɛɛ no, 36na wɔserɛɛ no dɛ ɔmma wɔnka n’atar no ara nko mpo: na dodow a wɔkaa no no, hɔn ho yɛɛ hɔn dzen.

Currently Selected:

Matthew 14: MFANBRP

Highlight

Copy