Matthew 15

Tsetsesɛm ho Nkyerɛkyerɛ

(Mark 7.13)

1Nna Farisiifo nye kyerɛwfo a wofi Jerusalɛm baa Jesus nkyɛn bebisaa no dɛ, 2Ɔyɛ dɛn na w’esuafo fom mpanyimfo atsetsesɛm do? Dɛ wɔnnhohor hɔn nsa ho ana woedzidzi yi? 3Na obuae see hɔn dɛ, Ɔyɛ dɛn na hom so hom atsetsesɛm ntsi hom fom Nyankopɔn mbrasɛm do? 4Osiandɛ Nyankopɔn hyɛɛ dɛ, Dzi w’egya nye wo na nyi, na, Obiara a ɔhyɛ egya anaa na ahorba no, owu na ma onwu. 5Na hom dze, hom se dɛ, Obiara a ɔbɛse n’egya anaa ne na dɛ, Dza nkyɛ edze benya mo ho mfaso yɛ akyɛdze ma Nyankopɔn, 6nna onnyi dɛ odzi n’egya nyi. Na hom atsetsesɛm ntsi hom amma Nyankopɔn mbra no enntsim. 7Ndabrabafo, Isaia hyɛɛ hom ho nkɔm yie dɛ ɔse,

8 Ɔman yi dze hɔn anofamfa dzi me nyi,

Naaso hɔn akoma dze, ɔnye me ntamu twe kɛse;

9 Na wɔsɔr me gyan,

Wɔkyerɛkyerɛ nkyerɛkyerɛ a ɔyɛ nyimpa ahyɛdze.

Dza Ogu Nyimpa Ho Fi

(Mark 7.14-23)

10Na Jesus frɛɛ nyimpadodow no baa ne nkyɛn no, ɔsee hɔn dɛ, Hom ntsie na hom ntse ase: 11Nnyɛ dza ɔkɔ anomu na ogu nyimpa ho fi, na mbom dza ofi anomu ba no na ogu nyimpa ho fi. 12Nna n’esuafo no bae bɛsee no dɛ, Inyim dɛ Farisiifo no tsee asɛm yi no, ayɛ hɔn fintsidua? 13Na obuae see hɔn dɛ, Dua biara a m’Egya a ɔwɔ sor no anntsɛw no, wobotu. 14Hom ngyaa hɔn: wɔyɛ akwankyerɛfo enyifurafo. Na sɛ onyifurafo kyerɛ onyifurafo kwan a, hɔn beenu nyina bɔtɔ mona mu. 15Na Peter buae see no dɛ, Kyerɛ hɛn bɛ yi ase. 16Na ɔsee dɛ, Ana hom so nnyae nnyaa ntseasee? 17Ana hom nnhu dɛ biribiara a ɔhɛn anomu no ɔkɔ yafun mu, na woyi gu tsea mu? 18Na dza ofi anomu ba no, ofi akoma mu, na ɔno na ogu nyimpa ho fi. 19Na akoma mu na adwembɔn fi ba, ewudzi, awarto, ndwamanyɛ, adzewia, dasewia, ebususɛm: 20yinom nye ndzɛmba a ogu nyimpa ho fi; na edze nsa a wɔannhohor ho bedzidzi dze, onngu nyimpa ho fi.

Keenannyi Basia bi ne Gyedzi

(Mark 7.24-30)

21Na Jesus twee noho fii hɔ kɔr Taere nye Sidon afamu. 22Na hwɛ, Keenannyi ɔbaa fi ntoaado hɔ bae bɛkaa mu dɛ, Ewuradze, David ba, hu me mbɔbɔr: na abɔnsam rehaw me babaa papa. 23Na oemmbua no asɛm biara. Na n’esuafo no bae bɛserɛɛ no dɛ, Gya no kwan ma ɔnkɔ, na ɔrekeka mu dzi hɛn ekyir. 24Na obuae see dɛ, Wɔannsoma me obiara hɔ dɛ Israel fie nguan a wɔayew no nko hɔ. 25Na ɔbae bɔkotoow no see dɛ, Ewuradze, boa me. 26Na obuae see dɛ, Ɔnnsɛ dɛ wɔfa mba edziban tow ma nkramanmba. 27Na ɔbaa no see dɛ, Mo wura, nyew: naaso nkramanmba no dzi mporoporoba a ofi hɔn wuranom pon do gu no bi. 28Nna Jesus buae see no dɛ, Ɔbaa, wo gyedzi so: ɔnyɛ hɔ mma wo dɛ mbrɛ epɛ. Na ofi dɔn no ara mu ne babaa no ho yɛɛ no dzen.

Jesus Sa Nyimpa pii Yarba

29Na Jesus fii hɔ baa Galilii po ho, na ɔkɔr koko do kɛtsenaa ase wɔ hɔ. 30Na nyimpadodow pii baa ne nkyɛn a wɔdze mbubua, enyifurafo, mmum, mpakye, nye binom pii; na wɔdze hɔn boguu n’ananadze na ɔsaa hɔn yarba: 31ma ɔyɛɛ nyimpadodow no nwanwa dɛ mmum rekasa, mpakye ridzi mu, mbubua renantsew, na enyifurafo ruhu adze; na wɔhyɛɛ Israel Nyankopɔn enyimnyam.

Jesus Ma Mpemanan Edziban

(Mark 8.1-10)

32Na Jesus frɛɛ n’esuafo see hɔn dɛ, Me yamu hyehye me ma nyimpadodow yi, osiandɛ wɔatsena me nkyɛn ndaansa yi na wonnyi biribi a wodzi; na memmpɛ dɛ migya hɔn kwan ma wɔdze kɔm kɔ, bɛyɛ na wɔakɔtɔ bitsi wɔ kwan mu. 33Na n’esuafo no see no dɛ, Henfa na yebenya paanoo a ɔbɛmee nyimpadodow pii yi wɔ sar do ha? 34Na Jesus see hɔn dɛ, Paanoo ahen na hom wɔ? Na wɔsee no dɛ, Esuon, nye esunam nketsenketse kakraabi. 35Na ɔhyɛɛ nyimpadodow no dɛ wɔntsenatsena famu; 36na ɔfaa paanoo esuon no, nye esunam no; na ɔdaa ase, na obubui, na ɔdze maa esuafo no, na esuafo no so dze maa nyimpadodow no. 37Na hɔn nyina dzidzii mee; na wɔtasee mporoporoba a ɔkae no, mbirefi esuon amaama. 38Na hɔn a wodzidzii no, wɔyɛ mpemanan a wɔnnkan mbaa nye mbofraba nnka ho. 39Na ogyaa nyimpadodow no kwan, na ɔfoow hɛn baa Magadan ntoaado.

Currently Selected:

Matthew 15: MFANBRP

Highlight

Copy