Matthew 13

Oduafo ho Abɛbu no

(Mark 4.1-9; Luke 8.4-8)

1Da no ara Jesus fiir fie kɛtsenaa mpoano.

2Na nyimpadodow pii behyiaa ne nkyɛn, ma dɛm ntsi ɔkɔr hɛn mu kɛtsenaa ase wɔ mu; na nyimpadodow no nyina gyinagyinaa mpoano.

3Na ɔkaa ndzɛmba pii kyerɛɛ hɔn wɔ mbɛbu mu see dɛ, Hwɛ, oduafo no kɔree kɛpee aba; 4na ɔrepe aba no, bi koguu kwan nkyɛn na nnoma bae bɔsosɔwee; 5na bi koguu abosam do mbrɛ oennya dɛtse pii; na ntsɛmara na ofirii, osiandɛ oennya dɛtse a ɔdɔ; 6na ewia soɛree no, onyinyamee na osiandɛ onnyi ndwow ntsi ɔkyenkyenee.

7 Na bi so koguu nsoɛ mu, na ofifirii ara na nsoɛ no miaa no.

8 Na bi so koguu asaase pa mu, na ɔsoow aba, bi ɔha, bi eduosia, bi eduasa.

9 Nyia ɔwɔ aso no, ma ontsie.

Siantsir a Jesus Buu Bɛ no

(Mark 4.10-12; Luke 8.9-10)

10N’esuafo no baa ne nkyɛn bɛsee no dɛ, Ebɛnadze ntsi na ekasa kyerɛ hɔn mbɛbu mu yi?

11Na obuae see hɔn dɛ, Hom dze, wɔdze ama hom dɛ hom nhu sor ahenman no mu esumasɛm, na hɔn dze, wɔmmfae mmaa hɔn.

12 Na obiara a ɔwɔ no, na wɔbɛma no na oenya mbordo, na obiara a onnyi no, dza ɔwɔ mpo wɔbɛgye ne nsamu.

13 Dɛm ntsi na mekasa kyerɛ hɔn mbɛbu mu, osiandɛ wɔhwɛ a wonnhu, wɔtse a wonntsie, eso wɔnntse ase. 14#Isa 6.9, 10 Na hɔn mu na Isaia nkɔnhyɛ no aba mu dɛ,

Tse dze, hom bɛtse naaso hom nnkɛtse ase;

Na hwɛ dze, hom bɔhwɛ naaso hom nnkohu.

15 Na ɔman yi hɔn akoma epirim,

Na hɔn aso esisiw dɛ wɔbɛtse

Na woemuamua hɔn enyiwa

Amma aber bi wɔaammfa hɔn enyiwa ennhu,

Na wɔaammfa hɔn aso anntse,

Na wɔaammfa hɔn akoma anntse ase,

Na wɔaannsakyer

Amma maannsa hɔn yarba.

16 # Luk 10.23, 24 Na nhyira aka hom enyiwa dɛ wohu, nye hom asowa dɛ wɔtse.

17 Na nokwar mese hom dɛ nkɔnhyɛfo nye atseneneefo pii pɛɛ dɛ wohu dza hom hu yi, naaso woennhu, na wɔtse dza hom tse yi, naaso wɔanntse.

Jesus Kyerɛkyerɛ Oduafo ho Bɛ no mu

(Mark 4.13-20; Luke 8.11-15)

18 Afei hom ntsie oduafo no ne bɛ no. 19Sɛ obiara tse ahenman no no ho asɛm, na ɔnntse ase a, ɔbɔn no ba bɛfa dza wɔpee no n’akoma mu no kɔ. Oyi nye dza wɔpee no wɔ kwan nkyɛn no. 20Na dza wɔpee no abosam do no, ɔnye nyia otsie asɛm no, na ntsɛmara ɔdze dɛw gye; 21na onnyi ndwow wɔ no mu, na ɔwɔ hɔ ma ɔkyɛr kakra, sɛ abɛbrɛsɛ anaa ahohia soɛr wɔ asɛm no ntsi a, ntsɛmara na ato no fintsidua. 22Na dza wɔpee no nsoɛ mu no, nye nyia otsie asɛm no, na wiadze yi mu akɔdadwen nye ahonya ndaadaa mia asɛm no, ma ɔnnsow aba. 23Na dza wɔpee no asaase pa mu no, ɔnye nyia otsie asɛm no, na ɔtse ase; ɔno so na ɔsow aba, bi ɔha, bi eduosia, bi eduasa.

Nworahaban a Ɔfora Ewifua mu ho Bɛ

24Obuu bɛ fofor so kyerɛɛ hɔn dɛ, Sor ahenman no tse dɛ nyimpa a oduaa aba pa wɔ no kwa mu; 25na nyimpa dedae no, ne tamfo bae boduaa nworahaban so wɔ ewifua pa no mu, na ɔkɔree.

26 Na oyii ahaban na ɔsoow aba no, nna nworahaban no so daa edzi.

27 Na ofiwura no nkowaa bae bɛsee no dɛ, Yewura, ana ammpe aba pa wɔ wo kwa no mu? Na nworahaban yi so fi hen?

28 Na ɔsee hɔn dɛ, Ɔtamfo na ɔayɛ yi. Na nkowaa no see no dɛ, Ana epɛ dɛ yɛkɔ kɔboaboa ano?

29 Na ɔsee dɛ, Oho: bɛyɛ na hom roboaboa nworahaban no ano no, hom etutu ewifua no so aka ho. 30Hom mma n’ebien nyina nnyin nkesi twaber no; na twaber no mebɛse etwafo no dɛ, Hom ndzi kan mboaboa nwora no ano, na hom nkyekyer no efiefi ma wɔnhyew no, na hom mboaboa ewifua no ano nkɔ me san do.

Sinape Aba no nye Mbɔrkaw ho bɛ

(Mark 4.30-32; Luke 13.8-21)

31Obuu bɛ fofor so kyerɛɛ hɔn dɛ, Sor ahenman no tse dɛ sinape abafua a nyimpa fae koduaa no kwa mu; 32ɔno na osuar kyɛn aba nyina; na sɛ onyin a, ɔyɛ kɛse kyɛn nhaban nyina na ɔyɛ dua, ma wimu nnoma bɛgyegye n’abaw do.

33Obuu bɛ fofor so see hɔn dɛ, Sor ahenman no tse dɛ mbɔrkaw a ɔbaa fae sumaa mbɔr korbaa ebiasa mu dze kesii dɛ ne nyina kawee.

Ɔdze Mbɛbusɛm dzii Dwuma

(Mark 4.33-34)

34Yinom nyina Jesus kaa kyerɛɛ nyimpadodow no wɔ mbɛbu mu, na oennkwetsi bɛ annkasa annkyerɛ hɔn; 35#Dwom 78.2 ma dza nkɔnhyɛnyi#13.35 ma dza nkɔnhyɛnyi: Tsetse akyerɛw a wɔagye ato mu no bi ka dɛ: “Nkɔnhyɛnyi Isaia”. no kae no aaba mu dɛ,

Mubobue m’ano wɔ mbɛbu mu;

Mebɛpaa mu maka nsɛm a ohuntsa fi wiadze ahyɛse.

Nworahaban ho Bɛ no ne Nkyerɛasee

36Nna Jesus gyaa nyimpadodow no kwan na ɔbaa fie. Na n’esuafo no baa ne nkyɛn bɛsee dɛ, Kyerɛ hɛn kwa mu nwora no ho bɛ no ase. 37Na obuae see dɛ, Nyia oduaa aba pa no nye nyimpa Ba; 38kwa no nye wiadze; aba pa no nye ahenman no ne mba; nwora no nye ɔbɔn no ne mba; 39ɔtamfo a oduaa hɔn nye abɔnsam; twaber nye wiadze n’ewiei; na etwafo no nye abɔfo no. 40Na dɛ mbrɛ wɔboaboa nwora no ano wɔhyew no wɔ gya mu no, mbrɛ ɔbɛyɛ wɔ wiadze n’ewiei nye no. 41Nyimpa Ba no bɔsoma n’abɔfoe na wɔakɔboaboa dza ɔto fintsidua nyina ano efi n’ahenman mu; nye hɔn a wɔyɛ emumuyɛ nyina, 42na wɔatow hɔn egu gya fononoo mu: hɔ na osu nye asetwɛr wɔ.

43 Ɔno na atseneneefo bɛhyerɛn dɛ ewia wɔ hɔn Egya ahenman mu. Nyia ɔwɔ aso no, ma ontsie.

Akoradze a Ɔhyɛ Daadze

44 Sor ahenman no tse dɛ akoradze a wɔdze sumaa haban mu a nyimpa hunii no, ɔdze huntsae, na no ho dɛw ntsi ɔkɔree kɔtɔɔn dza ɔwɔ nyina na ɔtɔɔ haban no.

Ahondze Pa ho Bɛ

45 Bio, sor ahenman no tse dɛ batanyi a ɔrohwehwɛ ahondze pa; 46na ohun ahondze kor a no bo so no, ɔkɔree kɔtɔɔn dza ɔwɔ nyina na ɔkɔtɔe.

Eboa ho Bɛ

47 Bio, sor ahenman no tse dɛ eboa a wɔtowee guu po mu a obumaa nam ahorow nyina bi; 48na ɔyɛɛ ma no, wotwuwii baa mpoano na wɔtsenaa famu, na wɔboaboaa papa no ano guu mbirefi mu, na wɔtoow dza omuo no gui. 49Mbrɛ ɔbɛyɛ wɔ wiadze ewiei nye no; abɔfo bɛba abɛpa nyimpa bɔn efi atseneneefo mu, 50na wɔatow hɔn egu ogya fononoo mu; hɔ na osu nye asetwɛr wɔ.

Akoradze Afofor nye Adadaw

51 Hom atse yinom nyina ase? Wobuaa no dɛ, Nyew. 52Na ɔsee dɛ, Dɛm ntsi kyerɛwnyi a wɔayɛ no osuanyi ama sor ahenman no ɔtse dɛ ofiwura a ofi n’adzekorabea yi ndzɛmba afofor nye adadaw pue.

Nazarɛt Pow Jesus

(Mark 6.1-6; Luke 4.16-30)

53Na ɔbaa dɛ Jesus wiee mbɛ yi bu no, ofii hɔ kɔree. 54Na ɔkɔr nankasa no kurow mu no, ɔkyerɛkyerɛɛ hɔn wɔ hɔn nhyiamudan mu, ma hɔn ho boow hɔn na wɔsee dɛ, Oyi nyaa nyansa nye tum ndwuma yi wɔ hen? 55Ana nnyɛ dwimfo no ne ba nye yi? Ana ne na wɔmmfrɛ no Mary, na no nuanom nye James, Josef, Simon, nye Judas? 56Na nnyɛ ne nkyerɛbaa nyina na wɔnye hɛn wɔ ha yi? Na afei oyi nyaa ndzɛmba yinom nyina wɔ hen? 57Na ɔyɛɛ hɔn fintsidua. Na Jesus see hɔn dɛ, Nkɔnhyɛnyi nnhwer enyidzi gyedɛ nankasa no kurow mu, nye nankasa ne fie. 58Na gyedzi a wonnyi ntsi ɔannyɛ tum ndwuma pii wɔ hɔ.

Currently Selected:

Matthew 13: MFANBRP

Highlight

Copy