Matthew 10

Asomafo Duebien no

(Mark 3.13-19; Luke 6.12-16)

1Na ɔfrɛɛ n’esuafo duebien no baa ne nkyɛn no, ɔmaa hɔn tum wɔ esunsum fi do, dɛ wontu hɔn, na wɔnsa nyarba nyina, nye ahoɔmberɛw nyina.

2Na esuafo duebien no hɔn edzin nye yinom: dza odzi kan no, Simon a wɔfrɛ no Peter, nye no nua Andrew; James, Zebedee ba no, nye no nua John; 3Filip nye Bartholomew; Tomas nye Matthew towgyenyi no; James, Alfaeus ba no, nye Tadeus; 4Simon Kanannyi, nye Judas Iskariot a oyii no mae no so.

Jesus Soma Asomafo no

(Mark 6.7-13; Luke 9.1-6)

5Duebien yi na Jesus somaa hɔn, na ɔhyɛɛ hɔn dɛ, Mma hom nnkɔ amanaman kwan no mu, eso mma hom nnhɛn Samariafo kurow biara mu: 6na mbom hom nkɔ Israel fie nguan a wɔayew no nkyɛn. 7#Luk 10.4-12 Na hom kɔ a, hom nkɛka dɛ, Ɔsor ahenman no abɛn. 8Hom nsa ayarfo yarba, hom nnyan ewufo, hom mma akwatafo ho nsan, hom ntu mbɔnsam: hom enya no kwa: hom mfa mma kwa. 9Mma hom mmfa sika, anaa dwɛɛtɛɛ, anaa kɔɔber nngu hom abɔdo mu; 10#1 Kor 9.14; 1 Tim 5.18 mma hom mmfa bɔtɔ, anaa sorntar ebien, anaa nsokota, anaa poma: osiandɛ ɔfata odwumayɛnyi dɛ odzidzi. 11Na kurow anaa ekurobaase biara a hom bɛhɛn mu no, hom nhwehwɛ nyia ɔsɛ wɔ hɔ; na hɔ na hom ntsena nkodu dɛ hom befi hɔ akɔ. 12Na sɛ hom rehɛn ofi no mu a, hom nkyia. 13Na sɛ ɔyɛ fie a ɔfata a, hom asomdwee nka no, na sɛ ɔmmfata a, hom asomdwee nsan mbra hom hɔ. 14#Ndwu 13.51 Na obiara a ɔnnkɛgye hom anaa onnketsie hom asɛm no, hom fi ofi anaa kurow no mu rokɔ a, hom mporoporow hom ananadze huntuma. 15#Mat 11.24; Gye 19.24-28 Nokwar mese hom dɛ atsɛmbu da no mu dza ɔbɛba dɛm kurow no do no bɛsen dza ɔbaa Sodom nye Gomora do no.

Daakye Amandzehu

(Mark 13.9-13; Luke 21.12-17)

16 # Luk 10.3 Hwɛ, mosoma hom dɛ nguan wɔ mpataku finimfin: dɛm ntsi hom nyɛ enyansafo dɛ nwɔ, na hom nyɛ krɔnn dɛ mbubur. 17#Mar 13.9-11; Luk 12.11, 12; 21.12-15 Na hom nhwɛ yie wɔ nyimpa ho; osiandɛ wobeyi hom akɔ mpanyimfo bagua mu, na wɔaka hom mpire wɔ hɔn nhyiamudan mu; 18na eso wɔdze hom bɔkɔ ambradofo nye ahemfo enyim wɔ me ntsi, dze eedzi dase ama hɔn nye amanaman. 19Na sɛ woyi hom ma a, mma hom nndwendwen mbrɛ hom bɛyɛ, anaa dza hom bɛka, na wɔdze dza hom bɛka bɛma hom dɔn no ara mu. 20Na nnyɛ hom na hom kasa, na hom Egya no Sunsum na ɔkasa wɔ hom mu. 21#Mar 13.12; Luk 21.16 Na nua beyi nua ama owu, egya beyi ba ama; na mba bɔsoɛr wɔ awofo do na wɔama woeku hɔn. 22#Mat 24.9; Mar 13.13; Luk 21.17; Mat 24.13; Mar 13.13 Na nyimpa nyina bɛtan hom wɔ me dzin ntsi: na nyia ɔbɛtsena mu ekodu ewiei no, ɔno na wɔbɛgye no nkwa. 23Na sɛ wɔtseetsee hom wɔ kurow yi mu a, hom nguan nkɔ fofor mu; na nokwar mese hom dɛ, Hom nnkowie Israel nkurow nyina do kɔ ansaana Nyimpa Ba no aba.

24 # Luk 6.40; Joh 13.16; 15.20 Osuanyi nnkyɛn ne kyerɛkyerɛfo, na akowaa nnkyɛn no wura. 25Ɔdɔɔ so ma osuanyi dɛ ɔbɛyɛ dɛ ne Kyerɛkyerɛfo, na akowaa dɛ ɔbɛyɛ dɛ no wura. Na sɛ wɔafrɛ ofiwura no Beelzebul a, ebɛn edzin ara na wɔnnkɛfa afrɛ ne fifo!

Nyia Ɔsɛ dɛ Hom Suro No

(Luke 12.2-7)

26 # Mat 9.34; 12.24; Mar 3.22; Luk 11.15 Dɛm ntsi mma hom nnsuro hɔn: na biribi do nnkatae a worinnyi no edzi, na onnhuntae a worunnhu. 27Dza meka kyerɛ hom wɔ sum mu no, hom nka no kan mu; na dza hom tse no asomu no, hom mpaa mu nka no adan etsifi. 28Na mma hom nnsuro hɔn a woku nyimpadua no, na ɔkra dze, wonntum nnku no: na mbom hom nsuro nyia obotum asɛɛ ɔkra nye nyimpadua nyina wɔ amandzehu kurow mu. 29Ana wɔnntɔn nsorɔm ebien nngye pɛsewa? Naaso hɔn mu kor mpo nnkokwetsir hom Egya ahwe famu. 30Na hom tsinhwi mpo wɔakan ne nyina. 31Dɛm ntsi mma hom nnsuro: na hom som bo kyɛn nsorɔm pii.

32 Dɛm ntsi obiara a ɔbɔbɔ me dzin wɔ nyimpa enyim no, ɔno na mo so mobobɔ ne dzin wɔ m’Egya a ɔwɔ sor n’enyim. 33#2 Tim 2.12 Na obiara a ɔbɛpa me wɔ nyimpa enyim no, ɔno na mo so mebɛpa no m’Egya a ɔwɔ sor n’enyim.

Nnyɛ Asomdwee a, na Nkrantsee a

(Luke 12.51-53; 14.26, 27)

34 Mma hom nndwen dɛ mebae mobɔsomaa asomdwee wɔ asaase do: mammba mammbɔsoma asomdwee, na mbom nkrantsee a.

35 # Mika 7.6 Na mebae mebɛpaapaa mu ma banyin nye n’egya eenya,

babaa nye ne na eenya, asew basia nye n’asewbaa eenya:

36 na nyimpa n’atamfo bɛyɛ ne fifo.

37 Nyia ɔdɔ egya anaa na kyɛn me no, ɔmmfata me; na nyia ɔdɔ babanyin anaa babaa kyɛn me no, ɔmmfata me. 38#Mat 16.24; Mar 8.34; Luk 9.23 Na nyia ɔmmfa ne mbeamudua na ɔnnka mo do no, ɔmmfata me. 39#Mat 16.25; Mar 8.35; Luk 9.24; 17.33; Joh 12.25 Nyia ɔdɔ no nkwa no, ɔbɛyew no; na nyia ɔyew no nkwa wɔ me ntsi no, obohu.

Akatua

(Mark 9.41)

40 # Luk 10.16; Joh 13.20; Mar 9.37; Luk 9.48 Nyia ɔgye hom no, ɔgye me; na nyia ɔgye me no, ɔgye nyia ɔsomaa me no. 41Nyia ɔgye nkɔnhyɛnyi wɔ nkɔnhyɛnyi dzin mu no, obenya nkɔnhyɛnyi akatua; na nyia ɔgye ɔtseneneenyi wɔ ɔtseneneenyi dzin mu no, obenya ɔtseneneenyi akatua. 42Na obiara a ɔbɛma nketseaba yi mu baako nsunwin kɔɔpow ma mpo wɔ osuanyi dzin mu no, nokwar mese hom dɛ n’akatua rommbɔ no.

Currently Selected:

Matthew 10: MFANBRP

Highlight

Copy