Matthew 9

Jesus Sa Mbubuinyi bi Yarba

(Mark 2.1-12; Luke 5.17-26)

1Na ɔkɔr hɛn mu, na otwae baa nankasa no kurow mu. 2Na hwɛ, wɔdze mbubuinyi a ɔda mpa do brɛɛ no; na Jesus hun hɔn gyedzi no, ɔsee mbubuinyi no dɛ, Ɔba, hyɛ dzen, wɔdze wo bɔn akyɛ wo. 3Na Akyerɛwfo no binom kaa wɔ hɔn tsirmu dɛ, Dɛm nyimpa yi reka ebususɛm. 4Na Jesus hun hɔn adwen no, ɔsee dɛ, Ɔyɛ dɛn na hom rodwen dza omuo wɔ hom akoma mu yi? 5Na dza ɔwɔ hen na ɔyɛ mberɛw kɛse, ebɛse dɛ, Wɔdze wo bɔn akyɛ wo, anaa ebɛse dɛ, Soɛr na nantsew a? 6Na mbrɛ ɔbɛyɛ ma hom ehu dɛ nyimpa Ba no wɔ tum wɔ asaase do dɛ ɔdze bɔn kyɛ ntsi, (nna ɔsee mbubuinyi no dɛ,) Soɛr, fa wo mpa na kɔ wo fie. 7Na ɔsoɛree na osii mu kɔr ne fie. 8Na nyimpadodow no hunii no, wosuroi, na woyii Nyankopɔn a ɔdze dɛm tum ama nyimpa no ayɛw.

Jesus Frɛ Matthew

(Mark 2.13-17; Luke 5.27-32)

9Na ɔresen no, ohun nyimpa bi a wɔfrɛ no Matthew dɛ ɔtse bea a wɔgye tow, na ɔsee no dɛ, Ka mo do. Na ɔsoɛree kaa no do.

10 # Luk 15.1, 2 Na ɔtse edzidzii wɔ Matthew ne fie no; ɔbaa dɛ atowgyefo nye ndzebɔnyɛfo pii bɛtsenatsenaa Jesus nye n’esuafo no nkyɛn. 11Na Farisiifo no hunii no, wɔsee n’esuafo no dɛ, Ɔyɛ dɛn na hom Kyerɛkyerɛnyi nye atowgyefo nye ndzebɔnyɛfo dzidzi yi? 12Na ɔtsee no, ɔsee dɛ, Hɔn a wɔtse hɔn apɔw mu no, wonnhia oduyɛfo, na mbom hɔn a wɔyar no a. 13#Mat 12.7; Hos 6.6 Hom nkɔ nkosua iyi n’asekyerɛ: Mepɛ ehumbɔbɔr, na nnyɛ afɔrbɔ a. Mammbɛfrɛ atseneneefo, na mbom ndzebɔnyɛfo a.

Mbuadadzi Ho Asɛm

(Mark 2.18-22; Luke 5.33-39)

14Nna John n’esuafo no baa ne nkyɛn bɛsee dɛ, Ebɛnadze ntsi na yɛnye Farisiifo no yɛtɔ dɛ yedzi mbuada, na w’esuafo dze, wonndzi mbuada yi? 15Na Jesus see hɔn dɛ, Ayeforpia mu mba no, aber a ayeforkun no wɔ hɔn nkyɛn no, wobotum edzi awerɛhow anaa? Na nda no bɛba a wobeyi ayeforkun no efi hɔn nkyɛn, na nkyii wobedzi mbuada. 16Obi mmfa tam fofor sin nntaa atar dadaw mu: dɛm no, dza wɔdze taa mu no yi fi atar no mu, na ntsewee no yɛ kɛse. 17Na wɔmmfa wenyin fofor nngu nwomantoa dadaw mu: dɛm no, nwomantoa no paa, na wenyin no hue gu, ma toa no so sɛɛ; mbom wɔdze wenyin fofor gu toa fofor mu, ama ebien nyina ayɛ yie.

Ɔpanyin bi ne Babaa na Basia no a Ɔkaa Jesus N’atar no

(Mark 5.21-43; Luke 8.40-56)

18Na ɔreka yinom kyerɛ hɔn no ara na ɔpanyin bi bae bɔkotoow no see dɛ, Me babaa ewu sesei: na bra bɛfa wo nsa to no do, na obenya nkwa. 19Na Jesus soɛree kaa no do, na n’esuafo no so dɛmara. 20Na hwɛ, ɔbaa bi a ɔyar bɔgyaagu mfe duebien bae bedzii n’ekyir dze ne nsa kaa n’atar ano ndwow: 21osiandɛ ɔbaa no see wɔ no mu dɛ, Sɛ meka n’atar nko ara mpo a, mo ho bɛyɛ me dzen. 22Na Jesus daan noho na ohun no no, ɔsee no dɛ Babaa, hyɛ dzen, wo gyedzi agye wo. Na hɔ no ara na ɔbaa no tsee apɔw. 23Na Jesus hɛɛn ɔpanyin no ne fie, na ohun hɔn a wɔhɛn atɛntɛbɛn nye nyimpadodow a wɔreyɛ gyegyeegye no, 24ɔsee hɔn dɛ, Hom ntwe homho, na akataasiaba no nnwui, na ɔada ara. Na wɔsereew no twee. 25Na wɔpaam nyimpadodow no fii hɔ no, ɔkɔr dan mu na okosuoo akataasiaba no ne nsa mu, na ɔsoɛree. 26Na iyi ho asɛm tahyee asaase no nyina do.

Enyifurafo Beenu hu Adze

27Na Jesus fi hɔ rokɔ no, enyifurafo beenu kaa no do tseaa mu see dɛ, David ba, hu hɛn mbɔbɔr. 28Na Jesus kɛhɛɛn fie no, enyifurafo no baa ne nkyɛn, na Jesus see hɔn dɛ, Ana hom gye dzi dɛ mubotum ayɛ yi? Wɔsee no dɛ, Nyew, Owura. 29Nna ɔkaa hɔn enyiwa see dɛ, Mbrɛ hom gyedzi tse no, ɔnyɛ dɛmara mma hom. 30Na hɔn enyiwa buebuei. Na Jesus braa hɔn dzendzenndzen dɛ, Hom nhwɛ yie mma obiara aanntse iyi ho hwee. 31Na hɔn dze, wofii hɔ no, wɔdze ne nka kɛtahyee wɔ asaase nyina do.

Mmum a Abɔnsam Afa no

32Na worifir edzi no, hwɛ, wɔdze mmum a abɔnsam afa no brɛɛ no. 33Na otuu abɔnsam no, mmum no kasae. Na ɔyɛɛ nyimpadodow no nwanwa, na wɔsee dɛ, Wonnhun dɛm yi bi pɛn wɔ Israel. 34#Mat 10.25; 12.24; Mar 3.22; Luk 11.15 Na Farisiifo no dze, wɔsee dɛ, Mbɔnsam hɔn panyin do na ɔnam tu mbɔnsam no.

Jesus Nya Ayamuhyehye ma Nkorɔfo no

35 # Mat 4.23; Mar 1.39; Luk 4.44 Na Jesus kekyiin nkurow nye nkurobaase nyina mu kyerɛkyerɛe wɔ hɔn nhyiamudan mu, na ɔkaa ahenman no ne nsɛmpa no ho asɛm, na ɔsaa nyarba nyina nye ahoɔmberɛw nyina. 36#Nka 27.17; 1 Ahe 22.17; 2 Mbe 18.16; Eze 34.5; Mar 6.34 Na ohun nyimpadodow no, ne yamu hyehyee no maa hɔn, osiandɛ wɔahaw na wɔsam hɔ dɛ nguan a wonnyi ɔhwɛfo. 37Na ɔsee n’esuafo no dɛ, Ndɔbaa no dɔɔ so, na edwumayɛfo no dze, wosuar. 38Dɛm ntsi hom nserɛ ndɔbaa no wura ma ɔnsoma edwumayɛfo mbra n’edwuma no mu.

Currently Selected:

Matthew 9: MFANBRP

Highlight

Copy