Matthew 11

John Onumanyi no N’asomafo Kɔ Jesus nkyɛn

(Luke 7.18-35)

1Na Jesus wiee n’esuafo duebien no kasakyerɛ no, ofii hɔ dɛ ɔrekɛkyerɛkyerɛ na ɔakɛka asɛm wɔ hɔn nkurow mu.

2Na John tsee Kraest no ndwuma wɔ efiadze no, ɔsomaa n’esuafo no kebisaa no dɛ, 3Ana ɔwo nye nyia ɔreba no, anaa yɛnhwɛ nyimpa fofor bi so kwan? 4Na Jesus buae see hɔn dɛ, Hom nkɔ nkɛka dza hom ehu na hom atse yi nkyerɛ John: 5#Isa 35.5, 6; Isa 61.1 enyifurafo hu adze, mbubua nantsew, akwatafo ho san, etsitsifo tse asɛm, ewufo nyan, na wɔka asɛmpa no kyerɛ ehiafo. 6Na nhyira aka nyia mennyɛ fintsidua mma no. 7Na John n’esuafo no rokɔ no, Jesus hyɛɛ ase kaa John ho asɛm kyerɛɛ nyimpadodow no dɛ, Ebɛnadze na hom kɔr sar no do kɔhwɛe? Ndzɛmbir a mframa rihim no a? 8Na ebɛnadze na hom puei kɔhwɛe? Nyimpa a ofura serekye tam a? Hwɛ, hɔn a wofura serekye tam wɔ ahemfo fie. 9Na ebɛnadze koraa na hom kɔree kɔhwɛe? Ana dɛ hom bohu nkɔnhyɛnyi a? Nyew, mese hom dɛ nyia ɔkyɛn nkɔnhyɛnyi mpo a. 10#Mal 3.1 Oyi nye nyia wɔakyerɛw no ho asɛm dɛ,

Hwɛ, morosoma mo bɔfoe ma oeedzi w’enyim kan a

Obesiesie wo kwan a ɔda w’enyim no.

11 Nokwar mese hom dɛ, hɔn a mbaa awo hɔn nyina mu biara mmpuei a ɔyɛ kɛse kyɛn John Onumanyi no; naaso nyia ɔyɛ aketseaba wɔ sor ahenman mu no yɛ kɛse kyɛn no. 12#Luk 16.16 Na ofitsi dɛ John Onumanyi no bae dze bodu ndɛ sor ahenman no gye enyiber, na hɔn a hɔn enyi aber no fa no enyiɔdzen do. 13Na nkɔnhyɛfo nyina nye mbra no hyɛɛ nkɔm bɛpeem John do. 14#Mal 4.5; Mat 17.10-13; Mar 9.11-13 Na sɛ hom pɛ dɛ hom gye to mu a, oyi nye Elija a ɔreba no. 15Nyia ɔwɔ aso a ɔdze tsie no ma ontsie. 16Na ebɛnadze na medze ɔsantsen yi mobɔto ho? Ɔtse dɛ mbofraba a wɔtsenatsena gua do, na wɔrefrɛfrɛ hɔn anyɛnkofo, se dɛ,

17 Yɛahɛn atɛntɛbɛn ama hom, na hom annsaw;

yeetwa ewuo na hom werɛ annhow.

18 Na John bae, onndzidzi eso ɔnnom, na wɔse dɛ, Ɔwɔ abɔnsam. 19Nyimpa Ba no bae, odzidzi na ɔnom, wɔse dɛ, Hwɛ, nyimpa tumfur, nsahweam, atowgyefo nye ndzebɔnyɛfo nyɛnko. Naaso nyansa no ndwuma bu no bem.

Nkurow a Wɔanngye Enndzi

(Luke 10.13-15)

20Nna ɔhyɛɛ ase twuuw nkurow a ɔyɛɛ no tum ndwuma pii wɔ mu no enyim, osiandɛ woennu hɔnho. 21#Isa 23.1-18; Eze 26.1—28.26; Joel 3.4-8; Amos 1.9, 10; Zek 9.2-4 Korazin, due! Bɛtsaeda, due! Osiandɛ sɛ tum ndwuma a wɔyɛe wɔ hom mu yi, wɔyɛɛ no wɔ Taere nye Sidon mu a, nkyɛ wonuu hɔnho dada wɔ eyitam nye nso mu. 22Na mese hom dɛ atsɛmbu da no mu ɔbɛfanyim Taere nye Sidon akyɛn hom. 23#Isa 14.13-15; Gye 19.24-28 Na ɔwo, Karpernaum, wɔbɛma wo do akɔ sor anaa? Hwɛ, wɔbɛbrɛ wo adze akɔ samanadze; osiandɛ tum ndwuma a wɔyɛe wɔ wo mu yi, sɛ wɔyɛɛ no wɔ Sodom a, nkyɛ wɔtse hɔ bodu ndɛ. 24#Mat 10.15; Luk 10.12 Na mese hom dɛ atsɛmbuda no ɔbɛfanyim Sodom akyɛn wo.

Hom Mbra Me Nkyɛn Mbɛgye Ahomgye

(Luke 10.21, 22)

25Na aber no mu, Jesus buae see dɛ, Miyi wo ayɛw, Egya, sor nye asaase Wura, dɛ edze ndzɛmba yi esuma enyansafo nye abadwembafo, na eyi akyerɛ nkɔkowaba. 26Nyew, Egya, dɛm na ɔsɔɔ w’enyi. 27M’Egya dze ndzɛmba nyina ahyɛ me nsa; na obiara nnyim Ɔba no, gyedɛ Egya no; eso obiara nnyim Egya no gyedɛ Ɔba no, na nyia Ɔba no pɛ dɛ oyi no kyerɛ no. 28Hom nyina hom mbra mo hɔ, hom a hom reyɛ edwuma berɛ na wɔasoa hom dza ɔyɛ dur, na mebɛma hom ahomgye. 29Hom mfa mo kɔndua nto hom do, na hom nsua me, osiandɛ modwe na mebrɛ moho adze wɔ akoma mu; na hom benya ahomgye ama hom akra. 30Na mo kɔndua yɛ mberɛw, na m’adzesoa yɛ har.

Currently Selected:

Matthew 11: MFANBRP

Highlight

Copy