MATIU 24
24
I Miri Yehu ba napanii-ya na ta-weharu-na na Umana i Miri
(Mrk. 13:1-2; Luk. 21:5-6)
1Ba na-dunjaku-nyaka na Umana i Miri paraïna i Yehu, mai-danyaka lai Nyuna da makiku - makiku-nya hi da-paita-nya na hada-naka na Umana i Miri. 2I Yehu napanii-nja nyuda, “Màla miita-ha nu mbuu ndàbada? Kai pinya, napa nda ningu-apa hau watu welingu nuda da uma da ma-padaingu pa-panunggulungu la pangia-na. Mbuu ndàbada napa pa-weharu-ha,” wàna.
Na handuka dàngu na mayila
(Mrk. 13:3-13; Luk. 21:7-19)
3Tunaka nu i Yehu nalaku la Tandula Haitungu, dàngu ba talànga mandapu-na, mai-danyaka da makiku-nya la papanii dà mehanya Nyuna, “Peka-nggama, pirangu-ka nu ba nadedi mbuu ndàbana. Dàngu nggàra-yaka na tandana na tàkamu la hupu njàpu rehi?” wàdanya.
4Nahema i Yehu, “Rimangu, ka àmbu ningudu ma-panyonga-kai. 5Nadu ba nadangu na tau haromu na mamai wànya na tamunggu hi dapanii, ‘Nyungga Hanganji Mapamà-nanguka!’ wàda. Dangu tau pa-panyonga-da. 6Napa mirongu riu raü ma-pakabungu dàngu lii pabera lai nu - lai nu, na nyuna àmbi mangàdatu-du. Nadu nudaka mbuu ndàbada ba datumbu-mapa bàdi, ba tuna nda jia-aya na rehi hupu njàpuna. 7Na hau banjaru napa na-pabera dànya na hili hau banjaru, na hau nanggara napa nahada-nya na hili hau nanggara. La nggi - nggi napa natumbu na rimbangu dàngu na upungu. 8Nunaka hina-apa na-pakiringu, hama tuna na katiu na papàda-na na kawini mahangga-nya na habola-na.
9Ba tunaka nu napa nyimi payapa-kai hi dapuli-nggai la pa-mayila-kai dàngu la pa-pameti-kai. Na pinu tana nggubulu-na napa da-karaü-nggai eti, lumuna bai kikungga. 10La rehi nu dangu tau ma-kandulingu, na ma-pakalekangu dàngu na ma-pakaraüngu eti dua wikida. 11Dangu wunangu kabàli napa ma-mumuku, hi da-panyonga-ya na tau dangu. 12Na akatu na-làmbatu mbana eti hi lupa nadangu na tau na manda hili pi-anyapa pa-pambuhangu. 13Tàka na tau na ma-pajàrungu lundu njàpuna, napa jia-yaka na pa-pamara. 14Na Lii Mànangu rukuna jàka nggikina ba na-pareta i Ala, pa-bobaru-ya napa la pinu tana nggubulu-na, ka peku ronguna mbuu ndàbana na tau. Hàlaka nu hinaka hi jiaya na rehi hupu njàpuna.”
Na akatu na ma-palàjaru
(Mrk. 13:14-23; Luk. 21:20-24)
15“Napa nyimi miita-ya ‘Na akatu na ma-palàjaru,’ ba na-ndolaku la pangia matua, hama tuna na papanii-na i Wunangu Ndanialu. (Na lii panamu hahangu ndumana na mambaha-ya: Patanda-nya jàka nggàraya na ihina!) 16La rehi nu, na tau na maninya la Yundia màtawa ka napalai la ma-palindingu. 17Na tau na maninya la toku ndidu uma àmbu napuru-dupa papiti ngga - nggàra daa la uma. 18Na tau na maninya la woka àmbu nabeli-dupa papiti-ya na kalembi bokulu-na. 19Mambana mbàringu-ya la lodu - lodu nuda na ngerada da kawini da mambotu ihida, dàngu da ina da ma-pahuhu anarara! 20Hamayangu-wa ka àmbu lupa palaimi la rehi urangu jàka ndia la lodu Hangahu! 21Nu la lodu mbàringu tungu nu napa ninya na handuka bokulu na mandedi ningu hamana piti welingu la kawunga ninya na pinu tana lundu la lodu nàhu, dàngu nda hili tuna nuapa. 22Làti duna i Ala jàka nda na-padànggitu-ya na rehi; nda hili ningu-apa mamara. Tàka lumuna na banjaru-na, jia-duyaka hi na-padànggitu-ya na rehi paraïna i Ala.
23La rehi nu jàka ningu mapanii-nggai, ‘Iluya, na Hanganji Ma-pamànangu ninya lai yiahu!’ jàka ndia ‘ninya lai nu!’ jàka wàna-nggai – àmbi waiduya na tau nuna. 24Nadu napa ba mumuku-danyaka da mapamà-nangu kabàli, dàngu da wunangu kabàli. Nyuda napa da-patumbu pawunda - pawunda manda ningu hamangu, dàngu pa-hangàtarungu pa-panyonga wàngu, jàka pekuna, na banjaru-na i Alambu. 25Jia-duya, namuya! Nyungga ba mbàda panii haha-nggunggai-nyaka narukuna nuna, ba ndedi natumbu nuna.
26Jàka ningu mapanii-nggai, ‘Tàngaru-ya, ninya Nyuna lai nu la maràda telangu,’ jàka wànanggai, àmbi luadu lai nu. Jàka ndia, ‘Tàngaru, ninya daa la kurungu na-kapàndi, jàka wàna – àmbi waiduya. 27Nadu na tàkana na Ana Tau ba hama tuna hambila kabilaku-ya, na ma-tapanangu welingu la pahunga hi na-handaraku lupa la patama.
28Nggiya na maningu ma-metingu lai nu-mbuha da ma-hawurungu da mangangu tolu meti,” wàna.
Na tàkana na Ana Tau
(Mrk. 13:24-27; Luk. 21:25-28)
29“Nda nggi tuna mandaina ba hàlaka pa-handuka tuna nu, kapàtangu-nanyaka na mata lodu, dàngu na wulangu nda nahili hambila-apa. Da kandunu munju-danyaka welingu la awangu, dàngu da ngara pa-kapingatu wàna na kuru awangu nggoda nggàduku-danyaka. 30Hàlaka patuna nu na tandana na Ana Tau wuwa-nanyaka la awangu. La rehina nuna mbuu ndàbada da banjaru la pinu tana napa hii-danyaka. Napa ita-danyaka na Ana Tau ba namai la pinu karumangu dàngu mbiha manyola-na dàngu rihi mangunju-na. 31Napa pa-palingu-yaka na taleli bokulu, dàngu na Ana Tau paràha-nanjaka da papalewana la pa-pauhi-nya na banjaru-na welingu la patu kabihu-na na pinu tana, welingu la kiri awangu hau lupa la kiri awangu hau,” wàna.
Na ngerangu welingu la pingi ai kapilitu
(Mrk. 13:28-31; Luk. 21:29-33)
32Pitiwa ngerangu welingu la pingi ai kapilitu, jàka da-kanguraku-ka da karàngga-na dàngu jàka da-kameli-ka da ruuna pi-maami-nyaka ba mareni-nanyaka na wandu. 33Tuna numbu-duka nyimi jàka miita-ha nuda ba datumbu, pi-dimi-nyaka na rehina ba mareni-ama-naka.#na rehina ba mareni-ama-naka: jàka ndia: Nyuna mareni-nanyaka, mareni mai-nanyaka. 34Kai pinya! Nuda hangia - hangia napa datumbu ba ndedi nameti ndàba na tau na maluri nàhu. 35Na awangu dàngu na tana napa na-molungu, tàka na pulunggu napa na-palupangu lundu nu - nu,’ wàna.
Nda ningu mapinya loduna dàngu njàmuna
(Mrk. 13:32-37; Luk. 17:26-30, 34-36)
36“Nda ningu mapinya pirangu na loduna dàngu na njàmuna, da papalewa la awangu ndia, na Ana Ala ndiambu,#La lawiti ndai da manda pirada nda ningua kareuku tungu yia: na Ana Ala ndiambu. mbulungu i Ama-a na mapinya. 37Jàka namai napa na Ana Tau, na hadana hama tuna la rehina i Nuhu la handàka-na. 38La lodu - lodu ba ndedi naiwa bokulu, na tau ngangu ngunungu-danya dàngu lalei mangoma-danya. Tuna nu mànu hi lupa tomaya na lodu tamana i Nuhu la kapalu. 39Ba na-làndahu-njaka iwa nyuda mbuu ndàbada, hinaka hi dapàda-nya jàka nggàraya na matumbu. Tuna nu na hadana napa jàka natàka na Ana Tau. 40La rehi nu, da tau madua da maràma la woka: Na haàtu napa pa-kariangu-ya, tàka na haàtu pa-màtangu-ya. 41Da tau kawini madua da manggihu uhu nggàndumu: Na haàtu pa-kariangu-ya, tàka na haàtu pa-màtangu-ya. 42Jia, rimangu, nadu ba ndai pinya pirangu napa na Mirimi ba natàka. 43Namuya yiana! Era pinanya mangu umangu njàmu pira nu la rudungu ba natàka na ma-manganga, nda na-katuda-mapa duna, ka àmbu peku tamana na mamanganga la kuru umana. 44Jia nu, màta nyimi kai rimangu-padua. Nadu na Ana Tau ba natàka wàngu la rehi panda mbutimi nyimi.”
Na tau papalewa na matuturu dàngu na manda tuturu
(Luk. 12:41-48)
45Nahili panii i Yehu, “Jàka tuna nu, nggamu tau papalewa-yaka na matuturu dàngu na ma-manggàna? Nyunaka napa-wotuna na mirina la pa-kapala-nja da tau papalewa hawiangu, ka peku wua-nanja pangangu tomaya na rehina. 46Oha langatàka-na na tau papalewa nuna, jàka natàka belika na mirina, ba natàka-nya ba dàngu paloku-nanya na wai ngerana. 47Langatàka ka kupeka-nggai, na mirina napa na-pahangga hàla-manjaka duna da bandana lai nyuna. 48Tàka jàka na-akatu nuna na tau papalewa, ka panii-nanyaka la etina, 49‘Na miringgu namandai-pa ba nabeli,’ wàna, hi pa-kiringu-ma-ananya papalu-ha da anguna paata hawiangu dàngu hi nangangu hi nangunu dànja da tau maüku. 50Tunaka nu tàka-nanyaka na mirina la lodu dàngu la njàmu na panda mbutina. 51Ka pajàra halawàla-nanyaka#Ka pajàra halawàla-nanyaka: jàka ndia: ka wàngga-nanyaka la hambeli. paraïna mirina nuna na tau papalewa, hi wàrunya la pangia tau kapelu. Nyuda napa hii-danyaka dàngu mayila-danyaka lai nu,” wàna.
Currently Selected:
MATIU 24: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
