MATIU 25
25
Na pangerangu rukuda da hakambulu ana karia
1“Jàka namaika na Ana Tau ba Miriya, na hadana hama tuna yiana na pangerangu: Tau hakambulu-ha da ana karia, da karia-na na bidi papa, da-kawàra piti palita ba dalua pa-tàbuku-ya na bidi papa mini. 2Nu lai nyuda ninja ba tau malima-ha da manduba, dàngu da tau malima hawiangu da-manggàna. 3Da tau malima da manduba dangàndi palita, tàka nda da-payema-nja wai minada. 4Da ana karia malima da ma-manggàna dangàndi palita, dangàndi pakaria-manja wai minada.
5Na bidi papa mini na endapu na tàkana, jia-duyaka nuda da ana karia hi kiri tàtiku-da, ka lupa mahuru-danyaka.
6La mandalora, hinaka hi darongu mawara, ‘Nàmu-nyaka na bidi papa mini! Maiwa kai tàbuku-ya!’ na mawàna. 7Nuda da ana karia hakambulu, hadangu-danyaka, hi da-pakehi-nja da palita-da. 8Da ana karia manduba karai-danyaka la ma-manggàna, “Wua àrunda minami hawutu, ba mbàda wàdaka da palita-ma nyuma,” wàda. 9Dahema da ana karia ma-manggàna, ‘Nda pekuna! Nadu napa nanjàpu-dunda mina. Lua bia pakei la toku,’ wàdanja. 10Da ana karia manduba lua-danyaka pakei mina. Ba talànga nàhunja, tàka-nanyaka na bidi papa mini. Da ana karia da marimangu tama karia-danyaka na bidi papa mini la ngia pambabu, ka bita-danyaka na pindu!
11Tunaka nu, tàka-danyaka da ana karia ha-banjaru. Hi da-paaungu, ‘Miri, Miri, bunggahu àru-nggama pindu!’ wàda. 12Tàka nahema na bidi papa mini, ‘Nda kutanda-akai!’ wànanja.
13Ka panjàpu-nanyaka na pangerangu-na i Yehu ba napanii, “Jia-duya hi wànggu-nggai, imàra mangga rimangu, ba ndai pinya na lodu dàngu na njàmu tàkana!’ wàna.
Na pangerangu rukuda da madua haàtu tau papalewa
(Luk. 19:11-27)
14“Jàka natàka na Ana Tau ba Miriya na hadana hamana na pangerangu yiana. Na haàtu na tau na-kamomatu palaku la tana mamarau. Napaau-nja da papalewa-na, hi na-kawàra pakata-nja da bandana. 15La ni-mbihuda nu da papalewa-na nawua-nja tutu ràka pamàka-da. Na haàtu nawua-nya lima rata àmahu rara. Na haàtui nawua-nya dua rata àmahu rara. Tàka na hili haàtui nawua-nya harata àmahu rara. Ka laku-nanyaka.
16Na tau papalewa na ma-ngalangu lima rata àmahu rara, luma laku-madua-nanyaka pa-danggangu, hi na-ngalangu utuna hilu lima ratamai àmahu rara. 17Tuna numai duna na haàtu na papalewa na ma-ngalangu dua rata àmahu rara, na-ngalangu utuna hili dua ratamai àmahu rara. 18Tàka na tau papalewa haàtu na ma-ngalangu harata àmahu rara, lua-nanyaka hi naàki lambongu la tana, hàla hi nawini-nya nuna na àmahu-na na mirina lai nu.
19Mandai langatàka ba hàla patuna nu, ka beli-nanyaka na mirida nuda da tau papalewa, hi na-padiha dànja nyuda. 20Na tau papalewa na ma-ngalangu lima rata àmahu rara mai-nanyaka, hi nawotu-ha ba hakambulu ratada, ‘Miri, hi wàna’, yia nana mu-pakatangga lima ratada da àmahu rara. Iluha, kuwingu-ha hi kuhili ngalangu lima rata àmahu rara pautu-nggu!’ wàna. 21‘Hàmudu!’ hi wàna na mirina. ‘Nyumu papalewa mahàmu dàngu ma-tuturu-kau. Rukuna ba pa-monungu-kau nyumu la ma-hawutu-na, napa ku-pakata-nggaunja da ma-dangu lai nyumu. Tamawa kau mbaha eti dàngga nyungga!’ wànanya.
22Tàka na papalewa haàtu na ma-ngalangu dua rata àmahu rara hurungu-nanyaka, hi napanii, ‘Miri, da pa-pakata-mungga dua ratada da àmahu rara. Iluha, ba kuhili ngalangu utu dua rata-madai,’ wàna. 23‘Hàmudu,’ hi wàna na mirina, ‘nyumu tau papalewa mahàmu dàngu ma-tuturu-kau. Rukuna ba pa-monungu-kau nyumu la ma-hawutu-na, napa ka ku-pakata-nggau madangu nyumu. Tamawa kau mbaha eti dàngga nyungga!’ hi wànanya. 24Tunaka nu na tau papalewa na ma-ngalangu harata àmahu rara, hurungu-nanyaka hi napanii, ‘Miri, ku-pimanggau nyumu ba tau mbana etikau. Bau pàpu bia wuana la panda pamula-mu dàngu bau muti bia la panda hàbaru-mu. 25Ba ku-mangàdatu, jia-duyaka hi kulua pawini-nya la tana na àmahu-mu. Yiana-yaka miri na àmahu-mu,’ wàna. 26‘Nyumu bai tau papalewa akatu dàngu mapatai etikau!’ hi wàna na mirina. ‘Ka nda mbàda pimungga ba kupàpu la panda pamula-nggu, dàngu ba kumuti la panda hàbaru-nggu? 27Jia-duyaka ba tuna nu làti, kau pahàmu-ya na àmahu-nggu la mbàngu, ka pekuna ba kubeli-ka, ka kungala belinya na àmahu-nggu dàngu anana. 28Jia ba tuna nu, pitiya nana na àmahu welingu lai nyuna, ka wuanya na tau na maningu hakambulu ratangu àmahu rara. 29Nadu na tau na mambàda ningungu, ba pahilu wua padangu-duyaipa, hi lupa na-parihingu. Tàka na tau na manda ningungu, na ma-hawutu-na na maninya lai nyuna napa papiti-mbuya. 30Tàka na tau papalewa na manda ningu lingungu, kawuka-nya la ma-kapàtangu la hambeli. Lai nu nyuna napa hiinanya dàngu mayila-nanyaka!’ ” wàna.
Na patandangu ngera la lodu hupu njàpuna
31“Jàka natàka na Ana Tau ba Hanganji-ya ba dandàki-ya paraï mbuu ndàbada da papalewa-na, napa Nyuna na-mandapu la kanjàka pareta-na na ma-bunjuku. 32Mbuu ndàbada da banjaru napa pa-pauhingu-ha la hanggana. Hàla hi na-kawàri-ha, hi na-kadàmbu pauhinja, hama tuna na ma-pawangu ba nakawàri-ha da mbimbi welingu la kamàmbi. 33Na tau na ma-patundu-nya na pambuha-na i Ala napa na-pauhi-nja la kawana-na, tàka hawiangu la kalai-nanja. 34Tunaka nu Nyuna na Hanganji hi napanii-nja da tau la kawana, ‘Imaiwa dimi tau pa-kanyuru-na na Amanggu. Tamawa la ngia pa-hanganji na pa-payemangu-kai piti weli mula weli tanangu. 35Nadu ba jiaya na rimbangu-nggu, bai wua-dungga pangangu, ba jiaya na madaunggu, bai wua-dungga pa-unungu. Ba tau weli nàmungu-ka bai pahia-dungga la umami. 36Ba nda ningu pakinggu Nyungga, miwua-ngga paki. Ba kuhidu, nyimi ma-paloku-ka. Ba patama-ngga Nyungga la uma kapàtangu, nyimi mandula-ka,’ wàna.
37Hàla da tau nuda napa dapanii, ‘Miri, pirangu-ka nu ba maita-kau rimbangu-mu tàka hi mawua-nggau pangangu, jàka ndia bau madau hi mawua-nggau pa-unungu? 38Piranguka Miri ba maita-kau hama tuna tau weli nàmungu, tàka hi manggepi-kau la umama? Pirangu-ka Miri ba maita-kau ba nda ningu pakimu, tàka hi mawua-nggau paki? 39Piranguka Miri ba maita-kau bau hidu jàka ndia ba la uma kapàtangu-kau tàka hi mandula-kau?” wàda. 40Nahema na Hanganji, ‘Kai pinya: ba jiaya nawunda-mi matungu nu, jiapa ka jiaya na haàtu na angu dedinggu na marihi ngia wawa halawàla, wunda-minya lai Nyungga-maduka nu,’ wànanja.
41Hàla na Hanganji hi napanii-nja da tau la kalaina, ‘Pa-yilangu-kai weli yiahungu, ha pa-ràtungu! Tamawa la epi panda peku pàda, na pa-payema-nya i Kambàliku dàngu da papalewa-na. 42Nadu ba jiaya na rimbangu-nggu, ba ndai wua-angga pangangu; ba jiaya na madaunggu, ba ndai wua-angga pa-unungu. 43Ba tau weli nàmungu-ka Nyungga, ndai pahia-angga umami. Ba nda ningu pakinggu, ndai wua-angga paki. Ba kuhidu dàngu ba la uma kapàtangu-ka, ndai ingaaka.’ 44Hàla ka panii-danyaka napa lai Nyuna, ‘Miri, pirangu-ka nu ba maita-kau bau rimbangu, jàka ndia bau madau, jàka ndia ba tau weli nàmungu-kau, jàka ndia ba nda ningu pakimu, jàka ndia bau hidu, jàka ndia ba la uma kapàtangu-kau, tàka hi nda mandula-kau?’ wàda. 45Nahema na Hanganji, ‘Kai pinya: ba jiaya na nda bihumi pandula-ya na haàtu na marihi ngia wawa halawàla yiana, nda bihu-minya pandula-ka Nyungga-maduka nu,’ wànanja. 46Da tau nuda napa pahuku-nguha, wàngu hukungu pa-lupangu, tàka da tau da mawànya na pawuku-na i Ala napa hanggau-danyaka na luri pa-langatàkangu dàngu pa-lupangu,” wàna.
Currently Selected:
MATIU 25: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
