MATIU 23
23
Na panaungu la pa-manggangu wiki la kapelu tau Parihi dàngu ngguru anggama
(Mrk. 12:38-39; Luk. 11:43, 46, 20:45-46)
1Hàla hi napanii i Yehu la tau dangu dàngu la makiku-nyaka. 2“Da ngguru anggama dàngu da tau Parihi da-ngalangu wai ngaba la pa-pakaloka-nya na ukuna i Muha. 3Jia-duya karadaku-nja dàngu kikunja mbuu ndàbada da pareta-da. Na nyuna àmbi wunda-duha da pawunda-da, nadu ba nda danunju-aya hama tuna na pa-ajaru-da. 4Da-karuhi hangia - hangia ma-kalutu dàngu da-wuangu-ha da kalaratu mambotu, tàka nyuda wiki nda hawutu lidanya ka nawàngu na tau na mangita-ha. 5Mbuu ndàbada da palaku-da màta ka naita wànggama tau wàda-a. Nyuda da-harawuku la patuu tera hamayangu ma-mbàlaru dàngu ba da-pamalai-ha da ruu mata kalembi-da.#ruu mata kalembi-da: nuda da ruu mata kalembi-da jiaha da tanda manundu-da lai Miri Ala (tàngaru-ya la Di. 15:37-41). 6Nyuda da-mbuhangu pangia mahàmu la mbabu, dàngu kanjàka pawiri la uma bungguru. 7Nyuda da-mbuhangu patembi-ha tau la ngia pa-parànggangu, ‘Ngguru,’ ka wàda-nggama, wàda. 8Tàka nyimi àmbi keha-dunya màta ‘Ngguru’ ka wànanggai tau, nadu na Nggurumi ba haàtu-ana, tàka nyimi ma-paangu dedingu-kai. 9Dàngu àmbu ningudu haàtu ‘Ama’ ba wàminya la pinu tana yiana, nadu na Amami ba haàtu-ana nu i Ama la awangu. 10Dàngu nyimi màta, ‘Ma-pairungu,’ ka wànanda tau àmbi wàmidu, nadu na ma-pairu-nggai ba haàtu-ana, nu i Hanganji Ma-pamànangu na paràndi-na i Ala. 11Na tau na marihi bokulu lai nyimi màtawa ka nyuna na malumu-nggai. 12Na tau na ma-pajangga wikina napa pa-pawawa-ya, tàka na tau na ma-pawawangu wikina napa pa-pajangga-ya,” wàna.
Ba na-paaka-nya na huri kapelu i Miri Yehu
(Mrk. 12:40; Luk. 11:39-42, 44, 52, 20:47)
13“Ura-amika ha nyimi ngguru anggama dàngu tau Parihi! Nyimi ma-kapelu-kai! Nyimi ma-paratahu-nya na tau patama la angu banjaru-na i Ala. Nyimi wiki ndai bihu panjadi angu banjaru-na i Ala, tàka na tau hawiangu na ma-mbuhangu, nyimi mi-pabeta-nya.
[ 14Ura-amika nyimi ngguru anggama dàngu tau Parihi. Nyimi ma-kapelu-kai. Nyimi mi-panyonga-ha da kawini meti lei dàngu bai wàhiha da umada, tàka ka pandàbi wànya na akatu nuna, mi-hamaya pamala - laingu. Nu jia-duyaka napa hi nambotu na hukungu-mi!]
15Ura-amika nyimi ngguru anggama dàngu tau Parihi! Nyimi ma-kapelu-kai! Nyimii laku mara - rau la hapapa tehiku, dàngu bai njadanya na mamara keha ka ningu haàtu matama la anggama-mi. Tàka ba natama-ka nuna na tau la anggama-mi hi tuuminyai uhu epi naraka na ma-pandua rihi akatu-nggai nyimi wiki!
16Ura-amika nyimi ha ma-pairungu poki! Nyimi ma-ajaru wànya yiana, ‘Nggamu mahara wànya na Umana i Miri, nda na-karitaku-aya harangu-na; tàka jàka nahara wànja da àmahu rara la Umana i Miri, nyuna na-karitaku-ya harangu-na,’ wàmi. 17Nyimi tau nduba pokikai! Nggiya na marihi mbàtingu: na àmahu rara jàka ndia na Umana i Miri na ma-pamatua-ya nuna na àmahu rara? 18Nyimi mi-ajaru wàmbunya, ‘Nggamu na mahara wànya na ngia pawotu maraku nda na-karitaku-aya harangu-na; tàka jàka nahara wànya na tanda maraku la pinu ngia pawotu maraku, nyuna na-karitaku-ya harangu-na.’ 19Mambana poki-dukai! Nggiya na marihi mbàtingu? Na maraku jàka ndia na ngia pawotu maraku hi na-matua wàngu na tanda maraku? 20Jia-duya, na tau jàka nahara wànya na ngia pawotu maraku, hara wàna-nyaka na ngia pawotu maraku dàngu mbuu ndàbada da tanda maraku da maninja dita la pinuna. 21Dàngu na tau jàka nahara wànya na Umana i Miri, hara wàna-nyaka na Umana i Miri dàngu i Ala na ma-ngiangu lai nu. 22Dàngu na tau jàka nahara wànya na awangu, hara wànanya na kanjàka pareta-na i Miri, dàngu i Ala na ma-mandapu lai nu la kanjàka pareta.
23Ura-amika nyimi ngguru anggama dàngu tau Parihi! Nyimi ma-kapelu-kai! Darungu, hama tuna da kandangu, da manggalawa dàngu da walahànggi nyimi miwotu-ha da hangia la hakambulu lai Miri. Tàka da hangia - hangia da ma-mbàtingu la uku anggama, hama tuna: na pa-deningu, na mila eti, na tuturu, nyimi ndai ihili-nja. Làti nuda-hapa duda da paràka pawàngu dàngu nda pambula-nja nuda hawiangu. 24Nyimi ma-pairungu poki! Na kaniniku la wai paunu-mi mi-hambàngi-ya, tàka na ota ba heuna mi-kawàluku-nyai!
25Ura-amika nyimi ngguru anggama dàngu tau Parihi! Nyimi ma-kapelu-kai! Da kaba dangu da kawinga-mi mibaha pa-yarahu-ha la hambeli, tàka daa la kuruda iraku nda ukuha wàngu hangia - hangia da pangala wàmi pa-janggilu dàngu manganga eti. 26Parihi poki! Baha pa-yarahu pàkuha bàdi daa la kuruda da kaba dàngu da kawinga-mi, ka peku yarahu-mbuna la hambeli!
27Ura-amika nyimi ngguru anggama dàngu tau Parihi! Nyimi ma-kapelu-kai! Nyimi beri reti pa-dorangu mabara-kai; la hambeli nahàmu ba itaya, tàka daa la kuruna hi mbinuna padua rina dàngu mbuu ndàbada da mawau. 28Timi numbu nyimi. La hambeli mihàmu ba naita-kai tau; tàka nu daa, nyimi mbinumi wàngu kamàla ju - jua dàngu na pangga-minya na uku,” wàna.
I Miri Yehu ba nanyura-ya na hukungu-da da ngguru anggama dàngu da tau Parihi
(Luk. 11:47-51)
29“Ura-amika nyimi ngguru anggama dàngu tau Parihi! Nyimi ma-kapelu-kai! Nyimi mi-pandoi-nja reti manandangu da wunangu dàngu bai pandoi pa-mananda-nja andungu panamu wànja da tau da mahàmu lurida. 30Nyimi bai panii, ‘Làti ka mbàda luri-maka la rehi ninja da boku la mangilu-ma àmangu, nyuma nda matundu-anja ba da-pameti-ha da wunangu.’ 31Jia ba tuna, mangaku wiki-wami-nyaka dimi nyimi ba wàlada datau ma-pameti wunangu-kai! 32Jàka tuna nu, pangala-manja dàngu kai palundu-nja da njala da pambàda pakiri-da da boku la mangilu-mi. 33Nyimi tau akatu-kai dàngu wàla tau akatu-kai! Nggiki hama pamara-mi wikimi welingu la hukungu la naraka? 34Rongu pa-hàmungu: Napa Nyungga ku-pangàndi-nggainja da wunangu, da tau pingu, dàngu da ngguru; hawiangu nyuda napa mi-pameti-ha, dàngu hawiangui napa nyimi mi-harika-nja. Ninja napa da pa-pajàra-mi la uma bungguru, dàngu da pakeha-mi welingu la hau paraingu lupa la paraingu hau. 35Jia-duya, napa nyimi pa-hukungu-kai ruku pameti-miha mbuu ndàbada da tau manda njala – piti welingu ba pameti-ya i Hambilu na manda njala, lupa tomaya ba pameti-ya i Hakaria anana i Mberikia, na pa-pameti-mi la manggawa Umana i Miri dàngu ngia pawotu maraku. 36Langatàka-ma ka kupeka-nggai: mbuu ndàbana napa patanggu-na na tau nàhuya,” wàna.
I Miri Yehu ba namila-nya eti la Yeruhali
(Luk. 13:34-35)
37“Yeruhali, Yeruhali! Da wuna - wunangu mu-pameti-ha. Da pa-pahuru-na i Ala mu-nàhaku-nja watu hi lupa dameti. Nda ku-pambirangu bia ba ku-mbuhangu paangga ndàbaya na tau na mangia-nggamu hama tuna na bai manu ma-kahiri-ha da anana la lumbu ruu kàpana, tàka nyimi ndai bihu! 38Jia-duya nu i Ala nda nahilu angu-anggaipa. 39Kau pinya: Piti welingu nàhu ndau hilu ita-akapa hi lupa upeka, ‘Pa-kanyuru-nyawa Nyuna na mamai wànya na tamuna i Miri,’ ba wàmi,” wàna.
Currently Selected:
MATIU 23: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
