YAHAYA 40
40
Da pulu pa-monungu
1Tuna yia na paniina na Alamu,
“Omba-yawa, omba-yawa na banjaru-nggu!
2Pangudu-ha da eti tau Yeruhali,
peka-njawa ba kanjupungu-nanyaka na ngerada ba ataha.
Da ndokuda mbàda jàma-nggunjaka,#Da ndokuda ... jàma-nggunjaka; jàka ndia: mbàda palohu-daka la njalada.
ku-pandua hama dangunja ba kuhuku-nja da njalada,” wàna.
3Ningu tau ma-warangu,
“Rimanya ànda i MIRI la maràda telangu.
Pamola-nya ànda bokulu la maràda nggailaru
ndumana na Alanda!
4Nimbihu lolangu lupangu hungguru-manja bàdi,
da palindi da tandula pa-ndidaru-ha.
Da tana ma-patundungu ka danjadi-ha ma-ndidaru,
da ma-karoba - karobaku pa-kamilihu-ha.
5Na bunjuku-na i MIRI napa pa-pawuwa-yaka;
na tau mbuu ndàbana da-kawàra itaya.
Langatàka i MIRI wiki-maka na mambàda ràndiya!” wàna.
6Ningu tau mawara,
“Bobaru-yawa!” wàna.
“Nggàraya na pa-bobaru-nggu?” hi wànggu ba ku-paàrangu.
“Bobaru-ya na tau hama rumba-aya,
hama wàla ai ma-mananda handàkangu.
7Na rumba nameti dàngu na wàla ai na-malaï,
jàka na-hapui-nya ngilu mbana i MIRI.
Langatàka na banjaru nuna
hama tuna rumba-maaya.
8Na rumba nameti dàngu na wàla ai na-malaï,
tàka na liina na Alanda na-torungu lundu nu - nu,” wàna.
9Heiwa la palindi jangga,
dàngu pakada-nyawa na lii hàmu la Yeruhali!
Wara pa-kodungu-wa, dàngu pakada-nyawa,
na lii hàmu la Hiungu!#Heiwa ... la Hiungu; jàka ndia: Yeruhali, heiwa la palindi jangga dàngu bobaru-yawa na lii hàmu! Hiungu, wara pa-kodungu-wa, dàngu bobaru-yawa na lii hàmu!
Pekanja da paraingu Yahunda
napa ba nàmu-nyaka na Alada nyuda!
10Tàngaru, i MIRI Ala namai wàngu kuaha-na
la pa-paluangu lima wàngu kaborangu-na.
Nakiri-ya paraï da tau da pambàda pahàla-na.#da tau da pambàda pahàla-na; jàka ndia: da wunda jàrana, da ihi paraï da pangala-na.
11Hama tuna haàtu ma-pawangu Nyuna na-kulipu kabàba-na;
Nyuna wiki ma-pauhi-nja nyuda.
Da ana mbimbi nalunggu-ha,
nawàngu ma-malijangu ba nairu ngàndiha da baida nu da manguna.
Na Ala Ihirailu nda ningu menjana
12Nggamu mamàka pa-takaru wànya tàbalu limana na libu muru,
jàka ndia ma-hukutu wànya panggana na hanggubu awangu?
Nggamu ma-takaru wànya takaru na tanana na pinu tana
jàka ndia matimba-nya mbotuna na palindi la ndahingu?
13Nggamu ma-kapipi-ya i MIRI,
jàka ndia ma-papeka-nya beri ma-panaunya Nyuna?
14Lai nggamu ngia pa-paàrangu-na i MIRI
ka na-ngalangu pingu dàngu jàngapu?
Dàngu nggamu ma-paita-nya Nyuna
ka na-nggànangu na pawàna?
15Lai MIRI da ba - banjaru hama tuna ha-kambàtiku wai la hambaha,
hama ha-kawutiru kabu tana-aya la ndahingu;
da nuha hama halela-da dàngu kumburu tana kangudahu.
16Mbuu ndàba da banda la omangu Limbanongu
nda da-jàmungu-a patuha kameti maraku patunu;
da pingi aina nda da-jàmungu-a
la patuha ai mutungu.
17Mbuu ndàbada da banjaru nda nggàra-aha lai Nyuna,
beri hama tuna ba nda ninja la hanggana Nyuna.
18Ka nu i Ala nggamuka hamana wàmu?
Nggamuka wàmu bau kakaya na hama hadana Nyuna?
19Nyuna nda hama-ada da kahala hada da ruku limada da tukangu,
kahala tau pa-apihungu àmahu rara dàngu na ma-latangu àmahu bara.#Talànga wanguna na-njenjangu ningu-mapa ba tuna yia na ihina: pa-apihungu marara ... mabara.
20Na tau manda màka pakei àmahu marara mabara,#Talànga wanguna na-njenjangu ningu-mapa ba tuna yia na ihina: manda màka ... mabara; na lawiti Imbarani-na nda na-lohangu-a.
napindi ai manda muda pamobu.
Nahimbu mini pandoi mamàhi,
la pa-pandoi-nya kahala hada na manda muda pa-hanggubalu.
21Nggiki hamana hi ndau pinya dàngu hi ndau ronguya,
dàngu hi nda papanii-nggau nu weli àmangu?
Nggiki hamana hi ndau jàngapu-ya welingu la wungana,
jàka nggikina na pakiringu-na na pinu tana yiana?
22Na ma-padika-nya ditaya na-mandapu ningu la pinu kawori pinu tana,
na mangia-nya na-màrahu-a ba itaya hama kabala-aya.
Nyuna na ma-wàlahu-ya na awangu hama tuna tera,
hi na-patàngi-ya hama tuna maü tera ngia pa-ngiangu.
23Nyuna ma-pawiti-nya hi nda da-pawidi da maningu kuahangu,
dàngu hi na-àlingu na kuaha-da da ngara tau bokulu.
24Nyuda ngera hamana na pa-pamula na pabidi runjukungu,
ba hina-apa natumbu na amuna.
Jàka era pa-hapuputu-nanya na ngilu i MIRI,
màdu-danyaka hi na-jiliru-ha ngilu hama tuna rembi.
25Nggamu nu bau kakaya mahama-nya i MIRI Mahupu-matua?
Dàngu nggamu-yaka nu na pa-pahama wàmunya?
26Tàngaru la awangu, dàngu hamata-ya!
Nggamu mawulu-ha da kandunu?
Nyuna ma-wandalu-ha hi hama pambaha,
napinja jàka pira nggubulu-da mbuu ndàbada,
dàngu na-kawàra paaunja dàngu ta - tamuda.
Nda ana ningua ma-mbulangu,
nadu ba bokulu kuaha-mananya i MIRI!
27Jiaya ba tuna, Ihirailu, nggikina hiu hali uramu,
beri nda napinggau i MIRI Alamu ba handuka-munya?
Hama tuna nda na-ihili-nya na ura dedimu,
dàngu nda na-kawela-nya na hàkumu?
28Nggikina hi ndau pinya dàngu hi ndau ronguya?
I MIRI ba Ala malundu nuya,
na ma-padika-nya nggubulu-na na pinu tana.
Nda na-handàkangu panjili jàka ndia paonja;
nda patoma-ya na kanandingu-na.
29Na-paàtalu-ya na tau na manjili,
nawua-nya ringgitu na manda nggiki wàna.
30Da bidi tau dalua-ya la njili dàngu la onja
da ana nduluru danjoru paraï pa-hakimbatu.
31Tàka na tau na ma-monungu lai MIRI,
napa na-ngalangu àtalu mabidi.
Nyuda hama tuna mbaku tehiku-ha
ma-hawuru pa-janggangu wàngu àtalu wulu kàpana.
Dapalai nda daera la panjili,
dàngu ba dapangga nda daera la paonja.
Currently Selected:
YAHAYA 40: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
