YAHAYA 39

Da ngara papalewa welingu la Mbambilu

(2 Hang. 20:12-19)

1La manggawa-na na rehi nuna na hanganji Mbambilu i Marondàku Mbalandangu anana i Mbalandangu, narongu-ya i Hanganji Hihikia ba bidi mandangu-na la hidu. Ka palewa-duna-nyaka tau la pangàndi huratu dàngu pa-wotungu lai Hihikia. 2I Hihikia nanggepi hamu etiha da ngara papalewa dàngu na-paita hàlanja da banda pawulu-na àmahu marara, mabara, rungu dàngu mbii kati, hamanai da pambeni wàda da tanatara. Nda hau ndokupa la uma hanganji dàngu la nggubulu pa-hanganji pawini-na welingu lai nyuda. 3Tunaka nu hurungu-nanyaka i Yahaya lai Hanganji Hihikia hi na-paàrangu, “Nggi welida nuda da tau? Nggàra wàda nu?” hi wàna.

Nahema i Hihikia, “Nyuda welida la mamarau la Mbambilu,” wàna.

4“Nggàra paita-da nu la uma hanganji?” wàna i Yahaya ba na-paàrangu.

“Mbuu ndàbada,” hi wàna i Hihikia. “Nda ana hauma la kuru banda uma hanganji da panda paita-nggunja nyuda,” wàna.

5Hàla i Yahaya hi napanii la hanganji, “I MIRI Mahupu-mbiha napanii, 6‘Napa natàka na rehina mbuu ndàbada da pawulu da maninja la uma hanganji-mu, dàngu da pambàda pauhi-da da boku la mangilu-mu lundu lodu nàhu, pa-palaüngu-ha la Mbambilu. Napa nda hili ningu-apa ma-kanjepi. 7Welingu la ana umbuku-mu napa ninguka papiti matanggu paloku la uma hanganji, la palumu-nya na hanganji Mbambilu,’ ” wàna.

8I Hanganji Hihikia nahema, “Mahàmu-maduya na puluna i MIRI na pa-patàka-mungga,” wàna. Nu hi nahema tuna nu, nadu la kanandingu-na, “Mili pa-daingu mànjaku-na dàngu mambiru-na na pa-hanganji-nggu la ngala luringgu,” wàna.

Currently Selected:

YAHAYA 39: KAM

Highlight

Copy

Compare