LUHU 15
15
Na luduna i Muha
1I Muha dàngu da tau Ihirailu wunda-danyaka yiana na ludu ba daludu wotunya i MIRI,
“Ludunya i MIRI wànggu,
nadu ba na-mehangu talu manàra.
Da njara dàngu ma-kaliti-ha
na-bubulu-nja la libu muru.
2I MIRI ma-kahiri-ka na-kapàru;
Nyuna-maka na ma-pamara-ka.
Nyuna Ala-nggunya ka kuwotu-nya Nyuna wànggu,
i Ala na palumu-da da bokunggu la mangilu, ku pa-mangunju-ya.
3I Ala mambeni hanggangu na-kaborangu,
MIRI-ya na tamuna.
4Da tanatara Mehiru dàngu da kareta-da
na-kawuka wàrunja la tehiku.
Da parawira da ma-kaborangu halawàla
da-mumuhu la Tehiku Tibuhala.
5Nyuda na kawàluku-nja libu muru,
hama tuna watuha ba da-tandaningu la kiri dehi.
6Na kapàru-mu na-pamaratangu, dou MIRI,
hi lupa mu-pamija mauya na papamu.
7Wàngu bokulu mangunju-mu,
bau pa-tàlaru hàlaya na mapapa-nggau.
Na hànggamu na-kandulangu hama tuna epi
hiu tunuha nyuda hama tuna rembi.
8Muhapui-ya na tehiku hi na-hangguluru pa-janggangu,
hi na-ndolaku tinjangu hama tuna kangeli,
hi peku li ningu la kiri libu muru.
9Napanii na muhu, ‘Napa kuyaulu-ha hi kuyàpa-ha,
ku-butuhu hapanda-nggu dàngu ku-pambuta-ha.
Hàla hi kuwàhi ndàbaha da bandada,
kupabe - berinja hi ku-malanja wànja lundu hodanggu,’ wàna.
10Tàka i MIRI nawàngu kayeku handàkangu-a,
ba na-patàka-nya lodu hanggàmaru na Mehiru.
Da-tandaningu hama tuna tambura na mambotu,
la kawunggaru nda najaru-na na wai.
11Nggi Ala-kiya na menjamu Nyumu,
dou MIRI Mahupu-mangarangu dàngu ma-matua?
Nggamu na mamàka patuu pa-hangàtarungu
dàngu ma-patumbu ma-bokulu hamana i MIRI?
12Mu-pajola-nya na lima kawana-mu,
hi na-molungu na papamu ba na-kawàluku-nya tana.
13Mu-kapipi-ya na banjaru na pambàda pamara-mu yiana,
nadu bau tuturu la patura la panjanji-mu.
Wàngu kodi màkamu bau opanja nyuda,
hi mulonda limaha la tana matua-mu.
14-15Darongu ndàba da banjaru hi da-kandàndaku;
na banjaru Pilitingu dàngu da liku uru Endumu da-kanggupuku.
Da tau Muapu kaborangu da-nggairidu,
da tau Kanaàngu da-kadukungu da etida.
16Kanjupu mangàdatu-ha nyuda,
ba daita mataya na kodi màkana i MIRI.
Ba nàhunya na banjaru-mu nda datara papàtu-ya paraï muhu;
ka laku pangalangu-nanyaka na banjaru pa-pahàla-mu.
17Hi mu-karia-nya na Ihirailu,
la pa-ngiangu na papindi-mu patuu ngia pa-ngiangu-mu.
Nu hi da-paengangu la tandula matua-mu,
la Uma na pawulu wikimu.
18Nyumu dumu MIRI-kau, Hanganji-kamu
ma-katangu pareta lundu nu - nu,” wàna.
Na luduna i Miriyàmu
19Ba dapala tehiku da tau Ihirailu da laku li ningu la latana na mamàdu. Tàka ba datama-ka la tehiku da kareta Mehiru dàngu da njara hamanai da ma-kaliti-ha, i MIRI na-palaku beliya na wai ba na-pambulu-nya hi lupa da-mumuhu hàla.
20Hàla i Miriyàmu, na wunangu kawini, ayana i Harungu, piti-nanyaka na lamba ha-kapapa-na dàngu mbuu ndàbada da kawini anguna da-tundungu-mbu lamba ha-kapapa ba dàngu renjada. 21I Miriyàmu naludu-nja nyuda,
“Wundanya ludu i MIRI,
nadu ba mbàda talu manàra-naka.
Mbuu ndàbada da njara dàngu da ma-kaliti-ha
na-kawuka wàrunja la libu muru,” wàna.
Na wai paita
22Tunaka nu i Muha na-karia-nya na banjaru Ihirailu welingu la Tehiku Tibuhala hanggangu la maràda telangu Hiuru. La ngala tailu mbua lodu ba dalaku-nya na maràda telangu nda ana ngalangu-da wai. 23Nu ka tàka-danyaka la hau pangia na ma-tamungu Mara,#Mara: yiana na tamu la hilu Imbarani “paita,” wàna. na nyuna na wai lai nu paita nda ukuya, hi nda peku la paunu-nya. Jia-duya Mara hi wàdanya lai nu, paita, wàna-duka nu. 24Ka panii hoputu-nanyaka tau i Muha, hi da paàra-nya, “Nggàraka paunu-nda yia?” wàdanya. 25Ka hamaya pa-mbanangu-nanyaka i Muha, tàka i MIRI hi na-paita-nya na ha-katiri na ai. Na ai nuna nanduha-ya i Muha daa la wai, ka kàba-nanyaka na wai, hi peku ununya.
La pangia lai nu i MIRI ba nawua-njaha da kalaratu dàngu lai numbu ba nakama-nja. 26Napanii i MIRI, “Karadaku weli etingu-wa lai Nyungga, dàngu wunda-hawa da mahàmu ba wànggu; nunju-hawa mbuu ndàba da hupu liinggu. Jàka timi nu, nyimi napa nda kuhuku wa-ànggainja da panyaki da pa-panggàna-nggunja da tau Mehiru. Nyungga duku MIRI-ka ma-pamàlaru-kai nyimi,” wànanja.
27Tunaka nu tàka-danyaka la hau pangia, na ma-tamungu Elimu. Lai nu ninja ba hakambulu dàmbuda da matawai dàngu hi pihu kambulu-da da pingi kuruma. Dawulu maüda la lihi matawai.
Currently Selected:
LUHU 15: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
