LUHU 16

Da màna dàngu da Powa

1Nu mbuu ndàbana na banjaru Ihirailu hadangu-danyaka welingu la Elimu, la tànggalu hakambulu lima na wulangu padàmbu wàna ba dahàla pa-taluru-nya na Mehiru, tàka-danyaka la maràda telangu Hingu, la manggawa Elimu dàngu Palindi Hinai. 2Lai nu la maràda telangu mbuu ndàbada dapanii hoputu-nja i Muha dàngu i Harungu. 3Dapanii nyuda, “Nahàmu-mapa làti jàka mbàda pameti-nanggàma i MIRI la Mehiru. Lai nu nda jia màtangu-ama pa-mandapu hanggangu tolungu dàngu roti lundu mbihuma. Tàka nyimi mikaria-nggama lai yiahu la pameti ndàba la rimbangu,” wàdanja.

4I MIRI napanii-nya i Muha, “Nàhu taï pa-purungu-nggunyaka pangangu mabundu làndangu hama tuna urangu ndumami nyimi mbuu ndàbami. Nimbihu lodu lupangu-ma kai pa-uhingu ràka ngangumi nduma hau lodu. Ba wàngu patunggu nu kama-nggunya na banjaru-nggu, ka peku pinggunya jàka da-karadaku-nja da pareta-nggu hi ndia. 5La lodu panomu wàna lupangu-ma da-pauhi-nja nuda da pangangu pandua hama danguda,” wàna.

6Ka panii-danyaka i Muha dàngu i Harungu la tau Ihirailu mbuu ndàbada, “La malingu nàhu pi-minyaka ba i MIRI-ma duna na ma-karia-nggai paluhu welingu la Mehiru. 7Haromu la mbaru napa nyimi miita-ya na-kajilaku ba ninya i MIRI. I MIRI narongu-mayaka bai mbe - mbeninya Nyuna; langatàka Nyunama na pambeni-mi nadu nyuma duma ba nunju-manya na pareta-ana duma. 8I MIRI napa nawua-nggai tolungu la malingu, dàngu roti la mbaru hi lundu mimbihu, nadu i MIRI ba narongu-mayaka bai mbe - mbeninya Nyuna. Langatàka, jàkai mimbe - mbeni-nggama nyuma, mbe - mbeni-minya i MIRI-ma,” wàdanja.

9Tàka i Muha hi napanii-nya i Harungu, “Paràha-nja ka da-hurungu ndàba lai MIRI, nadu ba narongu-mayaka na panii hoputu-da nyuda,” wànanya. 10Ba talànga paniina i Harungu lai nyuda mbuu ndàba, da-tàngaru la maràda telangu hi jia ita-bia-danya na kajilaku-na i MIRI la karumangu. 11I MIRI napanii-nya i Muha, 12“Mbàda rongu-manggu-nyaka Nyungga na panii hoputu-na na tau Ihirailu. Peka-njawa nyuda, ba ngangu-danyaka tolungu la malingu, tàka la mbaru peku nganguda roti lundu mbihuda. Ka pi-duda-nyaka ba MIRI-ka Nyungga, na Alada nyuda,” wàna.

13Nu la malingu tàka-danyaka da powa hi lundu dira danguha hi da-panggàbalu hàlanya na ngia pawulu-da maü, tàka la mbaru puru-nanyaka na wai hamburungu la winggiru-na na ngia pa-pamaüngu-da. 14Ba namihi hàlaka na wai hamburungu, wuwa-danyaka la maràda telangu da ana nggàra, da-manipihu ba hama nepiha dàngu da-mirihu ba hama wai hamburungu ka màndalu-ha. 15Nu ba daita-ha paraï tau Ihirailu, nda dapinja jàka nggàraha. Ka paàrangu-danyaka dàngga anguda, “Nggàra-haka ni?” wàda.

Tàka i Muha hi napanii-nja, “Yiada jia-duhaka da pangangu pawua-nanggai nyimi i MIRI, wànanja.

16I MIRI nawua-nja pereta, màtawa nimbihu-da ka da-pauhingu ràka tudana, jia duyaka ba dàmbu litaru nduma haàtu angu kuru uma,” wànanja.

17Tuna numa na pawàda da tau Ihirailu; tàka nimanyai hawiangu na ma-pauhi pa-rihingu welingu la dàmbu litaru nduma haàtu, tàka nimanyai hawiangu na manda toma. 18Nu ba da-takaru-haka, ita-danyaka ba nda narihi na ma-pauhi pa-dangungu dàngu ba nda najapu-nya na ma-pauhingu hawutu. Nimbihu-da da-pauhingu ràka tudana. 19I Muha napanii-nja nyuda, “Jiapa nda nggamuya, àmbu nabii-du ana hawutu pangangu ndumana haromu,” wànanja. 20Tàka ninya hawiangu ba mapira-ha la hongada nyuda da manda wàrihu-ya na papanii-na i Muha. Dabiiha hawiangu anguda nuda da pangangu. Hadangu harii kataru-danyaka nuda da pangangu dàngu kanjupu wauha; ka hàngga-nanjaka paraïna i Muha. 21Nimbihu mbaru ba da-pauhi-nja nuda da pangangu ràka tudana danguna, tàka jàka na-pakiringu-ka pambana na lodu lui-danyaka da pangangu da mani-injapa la tana.

22La lodu panomu wàna da-pauhi-nja nuda da pangangu da-pandua wundangu danguda hi patu litaru nduma haàtu. Mbuu ndàbada da liku uruda damai papanii-nya i Muha na rukuna nuna. 23Nanapa-ha paraïna i Muha, “Yiana-yaka na pareta-na i MIRI: Haromu lodu matua-ya na rapa hangahu, na lodu Hangahu, lodu pawotu lai MIRI-ya. Jàka nggàraha da pa-handara-mi la lodu nàhu handara-njawa, dàngu jàka nggàraha da pa-manahu-mi manahu-hawa. Da marihi welingu la pawàngu la lodu nàhu, kai kawàri-ha dàngu kai pahàmu-ha ndumana haromu,” wànanja.

24Jia-duyaka da pangangu da marihi da-pahàmu-ha ndumana haromu, hama tuna na pa-pareta-na i Muha; da pangangu nuda nda dawàu mbaia dàngu nda da-pakatarungu-mbu.

25Napanii i Muha, “Yiada-haka da pangami ndumana la lodu nàhu, nadu la lodu nàhu ba lodu Hangahu-ya, lodu hangahu ka tembi wànya i MIRI, dàngu nda ana hawutu-mbupa pahunggu-mi da pangangu nuda la hambeli ngia pa-pamaüngu. 26Nomu mbua lodu mandaina bai pa-uhingu pangangu, tàka la lodu na papihu wàna, lodu hangahu-ya, nda ningu-a pangangu mapuru la lodu nuna,” wànanja.

27La lodu papihu wàna ba mapira-ha da tau Ihirailu ka pa-uhingu pangangu ba wàda, tàka nda nggàra ndoku pangala-da. 28Ka panii-nanyaka i MIRI lai Muha, “Lundu pirangu-mapa dimi ba ndai tundunja da pareta-nggu? 29Namu-maya ba hauna na lodu pawua-nggai kai hangahu. Jia-mayaka na pakiri-na la lodu panomu wàna hi kuwua-nggai pangangu tudana la dàmbu lodu. La lodu papihu wàna lupangu-ma nimbihu-na na tau ka na-ndàdiku la uma, nda peku-ana paluhu,” wàna. 30Jia-duyaka la lodu papihu wàna hi nda daràma.

31Da pangangu nuda màna#màna: Yiana na tamu hama linguna na kareuku hilu Imbarani “Nggàraya nina,” wàna. wàdanja paraï tau Ihirailu. Na hadada hama tuna karohu bara ma-màrahu-ha dàngu ba pàdanja hama tuna kanguta patungu manggaluwangu-ha.

32Napanii i Muha, “I MIRI na-paràha-nda nyuta papita màna ràkangu dàmbu litaru, ka pahàmu-nja da wàla wuanda, ka peku ita-danja da pangangu da pawua-nanda nyuta i MIRI la maràda telangu, ba na-karia-nda paluhu welingu la Mehiru,” wàna. 33I Muha napanii-nya i Harungu, “Piti hau wurungu, paihi-nya rakangu dàmbu litaru màna, bànjalu-ya la hanggana i MIRI, ka pahàmu-nja da wàla wuanda,” wànanya. 34I Harungu na-bànjalu-ya nuna na-wurungu la hangga Pàti Pa-ràndingu ka pahàmu-ya nunjuya na pareta-na i MIRI lai Muha. 35Nuda da màna jiaha da pangada da tau Ihirailu la dalu patu kambulu ndaungu, hi lupa da tàka la tana Kanaàngu, na ngia pa-ndàdiku pa-daingu-da. ( 36Da takaru da pa-takaru wàngu ma-pakarohungu da pakàli wàda la rehi nuna, ràkangu dua kambulu litaru ihida.)

Currently Selected:

LUHU 16: KAM

Highlight

Compare

Copy