LUHU 14
14
Ba dapala-ya na Tehiku Tibuhala
1Tunaka nu i MIRI napanii-nya i Muha, 2“Paràha-nja da tau Ihirailu ka dabeli dàngu ka pamaüngu la tuba paraingu Pi-Hahirutu, la manggawa paraingu Mikundulu dàngu Tehiku Tibuhala, la lihi paraingu Mbaàlu-Hepungu. 3Napa na hanganji Mehiru ka na-pangàda-nya ba laku lindingu-danya da tau Ihirailu ba da-njàrangu la maràda telangu ka wàna wàngu. 4Napa Nyungga ku-pamalihu-ya na katiku-na hi lupa na kehanggai. Tàka Nyungga napa ku-paita-nya na mbiha mendinggu na hanganji Mehiru dàngu tanatara-na, napa nyuda ka dapingga Nyungga ba MIRI-ka,” wàna. Hàla da tau Ihirailu danunju-ya hama tuna na lii pareta-na i MIRI lai nyuda.
5Ba narongu-ka na hanganji Mehiru, ba palai-nanyaka na banjaru Ihirailu, nyuna dàngu da maningu wai ngabada peka-danyaka halaera hi dapanii, “Nggikina wàndaka? Nggikina hi tapuli bianja da tau Ihirailu palaku hi lupa nda ningu-apa atanda?” wànaka. 6Hàla na hanganji hawanjiru-nanjaka da kareta pabera-na dàngu da tanatara-na. 7Ba na-hadangu, nangàndi hàla-maha da kareta-na, jia-mbuha ba 600-da da kareta manandangu, da pa-kaliti-da da parawira-na. 8Wuku-mana i MIRI la pa-pamalihu-ya na katiku-na na hanganji, hi lupa nakeha-nja da tau Ihirailu da mambàda hanàhu-da la ànda ba da-dunjaku-nya nuna na tana la lima opangu-na i MIRI.#la lima opangu-na i MIRI; jàka ndia: ba dàngu talu manàra-da. 9Da tanatara Mehiru dàngu mbuu ndàbada da njara, da kareta dàngu da ma-kaliti-ha dayaulu-ha da tau Ihirailu, dandutu-ha la ngia pa-pamaüngu-da la hingi tehiku la lihina la Pi-Hahirutu.
10Nu da tau Ihirailu ba daita-yaka na hanganji Mehiru dàngu da tanatara-na ba nàmunja, lalu mbana mangàdatu-ha, hi dawara-nya i MIRI pakarai pandulangu. 11Dapanii-nya i Muha, “Ka nda ningua reti la Mehiru, tàka hiu karia-nggama pameti ningu lai yiahu? Tàngaru-ya na karia-na na paruku-mu! 12Yia nana la Mehiru mbàda wàma-nggauka napa natumbu na matuna yia ba wàmanggau! Madàhiku-makauka àmbu ngguma-nggama, puli-nggamaka duma ka tuma nu ba maata la Mehiru. Nàhamu kipa la paàta lai nu welingu la pameti lai yiahu la maràda telangu!” wàdanya.
13Nahema i Muha, “Àmbi mangàdatu! Patorungu! Napa nyimi kai itaya na pa-patumbu-na i MIRI ba na-pamara-kai nyimi. Da tau Mehiru da paita-mi nàhu, napa ndai hilu ita-ahapa. 14I MIRI duna napa na ma-katingangu pa-kahiri-kai, nyimi dimi àmbi nggàra ula-dimi,” wànanja.
15I MIRI napanii-nya i Muha, “Nggikina hi mu-warangu pakarai pa-ndulangu? Paràha-nja da tau Ihirailu ka dalaku pa-ngalangu! 16Jakaru-nya na tokungu-mu, dàngu kau pangaku-nya la tehiku. Napa na-pahewa na wai hi peku pala-danya na tehiku da tau Ihirailu, ba dawàngu pali la tana na mamàdu. 17Na tau Mehiru napa ku-pamalihu-ya na katiku-na, hi lupa dakeha pangala-nja da tau Ihirailu, tàka Nyungga hi ku-paita-nya na mbiha manyola-nggu la hanganji Mehiru, la tanatara-na, la kareta - kareta dàngu da ma-kaliti-ha. 18Hina napa da tau Mehiru hi dapingga Nyungga ba MIRI-ka,” wànanya.
19Hàla na papalewa-na i Ala, na ma-mangilu-nya na pamba tau Ihirailu na-lelingu la malamiri. Dàngu na-lelingu-mbu na tandai karumangu hi lupa na-ngiangu ningu 20la manggawa pamba tau Mehiru dàngu pamba tau Ihirailu. Na karumangu na-pakapàta-nya#Na karumangu na-pakapàta-nya; Talànga wanguna na-njenjangu ningu-mapa ba tuna numa na ihina. na ànda, hi lupa nda da-maràngga palihi nu la rudungu da pamba tau Mehiru dàngu da pamba tau Ihirailu.
21Hàlaka pangaku-nanyaka na limana i Muha la tehiku, tàka i MIRI hi natuya na ngilu timiru na ma-hapuputu pa-mbangatungu, hi lupa na-kandulingu na wai tehiku. Maru - rudungu ba na-mbangatu na ngilu, hi lupa na-pambeli-ya tana mara na tehiku. 22Na wai na-paberi ma-nduangu, nàhu da tau Ihirailu ba dapala-ya na tehiku, lidanya la tana màduka duda, na wai la kalai la kawana beri kangeli-yaka.
23Na tau Mehiru dàngu mbuu ndàbada da njara, da kareta lupa da ma-kaliti-ha keha pangala-madanya dàngu ndutu-madanya na tau Ihirailu la padua tehiku. 24Ba mareni pabarahu-yaka, i MIRI na-tàngaru-ya welingu la tandai karumangu dàngu tandai epi na tanatara Mehiru, ka pariu raü-nanyaka. 25Da ndutungu kareta-da napàtu-ha paraïna i MIRI, hi lundu dira njiliha ba da-ndàharungu. Ka panii-danyaka da tau Mehiru, “I MIRI-maka na ma-paluangu limana huruna na tau Ihirailu la pa-papanda nyuta. Màlawa ka tapalai welingu lai yiahu!” wàdaka.
26I MIRI napanii-nya i Muha, “Pangaku-nya na limamu hu dita la tehiku, napa ka nabeli na wai, ka na-pamumuhu hàlaya na tau Mehiru, da kareta - kareta-da lupa da tau da ma-kaliti-ha,” wànanya. 27Ka pangaku-nanyaka na limana i Muha hu dita la tehiku dàngu nu ba na-pabarahu-ka pa-hàmburu beli-nanyaka na wai hamana la wungana. Da-pakakangu-ma làti pa-pamara wikida da tau Mehiru, tàka i MIRI na-bubulu hàla-ma-anja hu daa la tehiku. 28Na wai tehiku na-pahàmburu beli hi na-panggàbalu-nja da kareta - kareta lupa da ma-kaliti-haka, dàngu mbuu ndàbana na tanatara Mehiru na-makeha-nja da tau Ihirailu, da mumuhu hàla la padua tehiku hi lupa dameti mbuta. 29Tàka da tau Ihirailu duda ba dapala-ya na tehiku, lidanya la tana mara duda, dàngu na wai beri kangeli-ya la kalai la kawana-da.
30La lodu nuna i MIRI na-pamara-ya na banjaru Ihirailu welingu la nàhaku-naha tau Mehiru, dàngu daita-maha da metida da tau Mehiru da pawotu wai la hingi wara. 31Na tau Ihirailu ba naita-yaka jàka nggikina i MIRI ba nawàngu mbiha manyola-na ba na-pakàku-ya na tau Mehiru, maratangu-danyaka, hi lupa dawaiya i MIRI hamana i Muha na atana.
Currently Selected:
LUHU 14: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
