1 KORINITU 11
11
1Tundu-nyawa na ngerangu-nggu nyungga, hama tuna nyungga duku ba kutundunya na ngerangu-na i Karitu.
Na ngera tungu tamalingu la katiku la rehi lumungu
2Nyungga kuwotu-nggai nyimi nadu nyimi ba naingu-mana nanamu-mingga nyungga bai tundunja da pa-ajaru da pawua-nggunggai. 3Na nyuna ku-mbuhangu kai pinya na hili hangiai, Na ma-kapala-nya nimbihu-na na tau minika jiaya i Karitu; na ma-kapala-nya na kawini papaha jiaya na mini lei, dàngu na makapalanya i Karitu jiaya i Ala. 4Na haàtu na tau mini la rehi hamayangu jàka ndia la rehi patàka-nanya na lii welingu lai Ala la hangga tau dangu, ka natuu tamalingu, na tau nuna paaka-nanya i Karitu. 5Tàka na haàtu na tau kawini la rehi hamayangu jàka ndia la rehi patàka-nanya na lii welingu lai Ala la hangga tau dangu, ka nda natuu tamalingu la katiku-na, na kawini nuna paaka-nanya na mini leina na ma-kapala-nya nyuna. Nuna hama biana ba beringu pa-kikiru-yaka na katiku-na na kawini nuna. 6Nadu na haàtu na kawini jàka nda na bihu pa-patamali-nya na katiku-na, nahàmu-pa ka nggutinya na lunggina. Tàka na haàtu na tau kawini jàka pa-kikiru-ya na katiku-na jàka ndia pangguti-nya na lunggina, nuna nu pa-paakangu wàngu-yaka lai nyuna. Jiaduya nahàmu-pa ka natuu tamalingu. 7Na mini nda nggàra naihi wàngua la patuu tamalingu, nadu ba ninu maü dàngu ba pa-mangunju wàna i Alaya. Tàka na kawini duna ninu maü mangunju tau miniya, 8nadu na mini ba nda pa-padedi welingu la tau kawini-aya, jiaya na tau kawini duna na pa-padedi welingu la tau mini. 9Na mini hi padika-nya nda lumuna na kawini-a, tàka jiaya na kawini hi padika-nya lumuna na mini. 10Jia-duya ka dahàmu wàngu da etida da papalewa awangu, na haàtu tau kawini natuu bàdi ndàbi katiku-na, tandana nyuna ba la wawa kuaha mini leinanya. 11Na nyuna ba tuna la lurinda tau Karitu, na tau kawini nda na-ndolaku meha-a pahàlangu welingu la mini, dàngu na tau minimbu nda na-ndolaku meha-a pahàlangu welingu la kawini. 12Nadu ka jiapakai pa-padedi welingu la miniya na kawunga kawini, tàka la hambeli-na nu, na mini nadedi-ya welingu la kawini; tàka ngara mbuta-naka mapawelingu lai Alaya.
13Kamangu kai timba wikinya na ngerana yiana angu dedi: Màla nahàmu nu ba nda na-pandàdangu katiku-na na haàtu tau kawini, ba na-hamayangu lai Ala la hangga tau dangu? 14Welingu la pambàda erana i madangu pambàda ajaru-makaika, ba hangia manda pa-ràkangu-ya jàka namalai lunggina na mini. 15Tàka na ngerana na kawini, na lunggi pa-wuangu-mayaka la pa-pandàda wànya na katiku-na dàngu na lunggi malai ba pa-hamemu wànanya. 16Na, jàka ningu ma-mbuhangu pa-palumu wànya na rukuna yiana, hangia jua-ana na papanii wànggu nyungga, nu jiaya ka nyutakai ka da kabunggu - kabungguru-na i Ala hawiangu-kai, mbulungu-maana ba hangia-na na pambàda ndàmangu la kuru kabungguru; hinggilu-na nuna nda hili ningua.
Na pamangu-na i Miri
17Na rukuna yiana na habata, nyungga nda kuwotu-anggai nyimi. Na pauhi-mi la lumungu-mi, nda ningu linguna mahàmu, tàka manda hàmuya. 18La kawu - wungana na parongu-nggu, nu la pauhi - pauhi-mi ningu kaliba - kalibaru ma-pandubaku. Dàngu ba kureki-ya nu na parongu-nggu harangu ningu-madu pa-deningu-na. 19Tubangu, ànda-mana ba natumbu na pakawàringu lai nyimi, ka peku wuwana napa jàka ngga - nggamuha da tau Karitu langatàka. 20Tàka nu bai pauhi, na pawunda-mi nda Pamangu-na i Miri-aya. 21Nadu ba jia-yaka na rehi ngangu, haàtu - haàtu ba parimbungu-dunanyai-ka papiti-ha da pangangu wikida, hi lupa ninya hawiangu na manda ngalangu ndoku ngga - nggàra, tàka hawiangu hi lupa na-maüku wànya. 22Nggikina hi tuna nu? Ka nda ningu umami nu angu dedi? Làti lai nu duna kai ngangu kai ngunungu! Jàka ndia napa hi harawuku-mi la pa-paaka-nya na kabungguru-na i Ala dàngu la pa-makia-ha da tau mila? Nggàraka bàdi papanii-nggunggai nyimi? Kuwotu-nggaika bàdi? Ndia-a! Nda kuwàngu pawotu ndoku-manggai.
23Nadu na pa-ajaru-nggunggai, nuna pangalanggu welingu lai Miri wiki-maya: la rudungu nu ba jiaya na kaleka-nya i Yehu, na Mirinda, napiti-ya na roti, 24dàngu ba nahàla-ka pa-pamalangu-nya i Ala ba jiaya na roti, kawita - wita wàna-nyaka limana, hàla hi napanii, “Yiana jiaya na taunggu na papajàmangu ndumami nyimi. Wànyawa yiana kai namu wàngga,” wàna. 25Tuna numbui ba hàla pangangu, napiti-ya na kaba wai angguru hi napanii, “Na angguru yiana jia-yaka na pa-ràndingu bidina i Ala, na pa-pakaràngi wàngu wai rianggu. Handàka unu - handàka unuminya yiana, màta kai wànya kai namu wàngga,” wàna. 26Tubangu-ma, handàka nga - handàka ngaminya na roti dàngu bai ununya na wai angguru yiana, nyimi bobaru-minya na metina i Miri, hi lupa namai beli.
27Jia-duyaka nu, na tau na mangangu rotina i Miri jàka ndia na ma-unungu angguru-na i Miri dàngu nda wànguna huri maràka-na, na tau nuna nanjala hanggangu lai Miri, na mambàda pa-kameti wàngu wikina dàngu tolu dàngu riana. 28Jiaduya, haàtu - haàtu nakinju pàku bàdi wikina, ka namangu panganya na roti dàngu paunu-nya na angguru. 29Nadu na tau jàka nangangu roti dàngu jàka na-unungu angguru dàngu nda wàrihu-nanya na pamangu nuna ba ma-deningu la tauna i Miriya, na tau nuna ba nangangu ba na-unungu ngalangu-nanya hukungu-na i Ala la tàda ihi wikina. 30Nuya na pakiri-na hi nadangu la hongami nyimi na mahidu dàngu na ma-mangonangu, dàngu ningumbu mameti. 31Tàka jàka ta-manginjiru pàku wikinda, napa nda jia huku-ananda i Ala. 32Tàka jàka nahuku-nda i Ala, nawàngu pa-ràmbahu-ta, ka àmbu nanggàna-ta nahuku papohu-nda dàngu pinu tana yiana.
33Jiaya nu angu dedi, jàka mi-pauhi pangangu la pamangu-na i Miri, màta nyimi kai kawàra pa-nedingu. 34Jàka ningu mamanjuu, nangangu pàku bàdi la umana. Nyimi jàka mi-wàrihu-ya na ngerana yiana, na pauhi - pauhi-mika bai lumungu napa nda na-patàka-anggai hukungu welingu lai Ala la tàda ihi wikimi. Jàka jiaha da pabata - pabata hawiangu, napa ka ku-palara-nggai jàka kumai.
Currently Selected:
1 KORINITU 11: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
