1 KORINITU 10
10
Na pa-panamu hahangu la ngera marapu
1Angu dedi! Màta kai namuya na rukuda da boku la mangilu-nda àmangu ba dalaku karia-nya i Muha. Nyuda mbuu ndàbada ba na-pamaü-nja karumangu dàngu ba damara la papala-ya la Tehiku Rara. 2Ka peku kiku-danya i Muha, nyuda mbuu ndàbada pa-parunungu-ha la kuru karumangu dàngu la tehiku nuna. 3Nyuda mbuu ndàbada dangangu pangangu pangahu ma-pahama, 4dàngu da-unungu paunu pangahu ma-pahama. Nyuda mbuu ndàbada da-unungu welingu la kaba watu pangahu na mandutu-ha nyuda; na kaba watu ba wànda jia-duyaka i Karitu wiki. 5Na nyuna ba tuna, da anguda nyuda dadangu da panda hàmuna eti i Ala, tuna nuduka hi dataneparu da metida la maràda telangu.
6Nu mbuu ndàbada tunanda ngerangu-duka lai nyuta, la pa-panamu-nda napanau wànda ka àmbu ta-mataru-nja da hangia - hangia da ma-akatu hama tuna nyuda. 7Dàngumbu ka àmbu talumu-nja da marapu hama tuna na pawunda-da hawiangu da anguda. Daa la Huratu Matua ninya na pa-tulihu, “Na banjaru nuna ngangu ngunungu-danyaka dàngu renja-danyaka ba dalumu-nya na marapu,” na mawàna. 8Àmbu tatu-duya na hangia - hangia na ma-kajari, hama tuna na pawunda-da hawiangu da anguda. Nadu ba tau dua kambulu tailu rataya na anguda nyuda da mameti kahau lodungu, nu ba tuda nu. 9Àmbu ta-kamangu àngadu pakama-nya i Miri#i Miri; da pa-haleli ndai da manda pirada: i Karitu. hama tuna na pawunda-da hawiangu da anguda àmangu, hi lupa dameti ba nakati-ha kataru mbana. 10Àmbu ta-kangudaru-mbu; hama tuna na pawunda-da hawiangu da anguda àmangu, hi lupa na-pameti-ha paraïna Papalewa Meti.
11Nuda mbuu ndàbada hi tuda nu lai nyuda, màta ka nanjadi ngerangu la tau hawiangu wàna. Dàngu nuda mbuu ndàbada pa-tulihu-mbuha la pa-panamu hahanda nyuta. Nadu nyuta nàhu ba luri-ndanya la hupu njàpu rehi.
12Na tau na makaka wikina ba ndolaku màndungu-nanya, pananjarungu badi; ka àmbu jia njoruna. 13Nimbihu-na na mapakamangu na pangala-mi pakàli ngala-mananya na tauka. Ba tuna i Ala na-tuturu-ma la paràndi-na. Nyuna nda napuli-anggau la pakama-nggau làpahu-nya na màkamu. La rehi tàka-nanggau ma-pakamangu napa nawua-manggau ànda duna hi peku màkamu la pa-pajàrungu.
14Jia-duya nu angu dedi pambuha-nggu, màta kai karaü-nya eti la pa-lumungu marapu. 15Nyungga ba ku-pabanjaru dànggai hama tuna langgunya na tau manggàna. Màta kai timba wiki bianya na papanii-nggu yiana. 16La rehi ba taunu-nya na wai angguru ba tawàngu pamalangu-nya i Ala, màla nda pawuwa-andanya nu ba mbulungu-ndanyaka nyuta dàngu i Karitu la metina? Dàngu la rehi ba tapabe - berinja da roti hi takawàra ngangu, màla nda pawuwa-andanya nu ba mbulungu-ndanyaka nyuta dàngu na tàda ihina i Karitu? 17Nadu ba hau pàkuna na roti, tàka nyuta mbuu ndàbanda hi tangangu hàla welingu la roti nuna ba hauna, nu nyuta madangu beri haàtu tau-madua-ndaka.
18Kamangu pa-tàngaru-ha da tau Yahundi. Da manganja da pangangu pa-maraku wàngu la pinu ngia pawotu maraku, jia-mahaka da ma-pambulu dànya nuna na ngia pawotu maraku. 19Nggàraya na pawuku-nggu? Da marapu dàngu da pangangu da pa-maraku wàngu la marapu nda ningu ndoku ihina. 20Nggàraha da pa-maraku wàngu la ngia pa-marakungu kameti la marapu, nda pa-marakungu lai Alaha, tàka la wàndi - wàndi akatu. Tàka nyungga nda ku-mbuhangu-a kai pa-mbulungu dàngu wàndi akatu. 21Nyimi nda uku pa-unungu welingu la kaba wai angguru-na i Miri, dàngu hi kaperaku-minyai la pa-unungu welingu la kaba wai angguru-na i wàndi akatu. Nyimi nda uku la pangangu la menjana i Miri dàngu hi ngangu-minyai la menjana i wàndi akatu. 22Jàka ndia ka ta-pakapihi-ya i Miri wàndaka? Màla tarihi kapàru-pa nyuta welingu lai Miri?
23Na panii tau, “Peku-mana duta pawundaya jàka nggàra biaya na pambuha-nda,” na mawàna. Tubangu-ma! Ba tuna nda jia lingu ndàba-ada da pambuha-nda. “Nyuta pambuha bianda nggàra ula jàka wànda” – ba tuna nda mbuu ndàba-ana na pambuha-nda na ma-ngalangu pa-pahada-nya na lurinda. 24Àmbu jia ningudu haàtu tau mapamukarungu nduma wiki-ana. Nimbihu-na na tau lupangu-ma na-pamukarungu nduma tau hawiangu-mbu.
25Nyimi peku ngangumi ngga - nggàra pa-danggangu la pahangu tolungu. Àmbi kanuturu mangilu-duhapa, jiapa ka ningu-kadu ma-pabetangu daa la eti dalumu. 26Nadu daa la Huratu Matua ninya na pa-tulihu, “Na pinu tana yiana dàngu nggubulu-na na ihi-naka manguna i Miriya,” na mawàna.
27Era ningu haàtu tau manda Karitu madunda-nggai pangangu, tàka nyimi mi-kataku-mayaka, nga bianya jàka nggàraya na pa-pahangga-nanggai. Àmbu kanuturu-duha jàka nggi paweli-da nuda da pangangu, ka àmbi ningu ma-pabetangu daa la eti dalumi. 28Tàka jaka ningu mapanii-nggai, “Da pangangu yiada pambàda pa-maraku wàngu-haka la marapu,” jàka wànanggai, àmbi ngadunja da pangangu nuda, rukuna ba pangàda-nya ngerana na tau nuna dàngu na pa-pàdangu la eti dalu. 29Na pawuku-nggu nda jia-aya na papàda-mu la eti dalumu nyumu, tàka eti daluna na tau nunaya.
Raï hi ningu bia ma-paàrangu, “Ha, nggikina hi padira-nya na kalongga-nggu nyungga ruku papàda eti dalu haàtu? na mawàna. 30Jàka kungangu pangangu dàngu pamalangu-nggunya i Ala, nggikina na tau hi na-paaka wàngganja nuda da pangangu, ka ni ba hàla-madu-ngguka pa-pamalangu-nya i Ala?” jàka wàna.
31Nggàra biaya na pawunda-mu – ka ngangumunya jàka ndia ka unungu-munyakai – wunda hàla biaha ka wotu wànya i Ala. 32Ilu-anya ràkana na lurimu, ka àmbu mu-pawiti-nya pawunda manjala na tau hawiangu; ka tau Yahundi-ya jàka ndia ka tau nda Yahundi-yakai, jàka ndia ka kabungguruna i Ala-yakai. 33Luriwa hama tuna nyungga. Nyungga duku pa-mukarungu manggunya ka nahàmu wàngu na etina mbuu ndàbana na tau la ngga - nggàra mbuu ndàba-naka, wànggu, dàngu nda ningu pawukunggu la nduma wikinggu nyungga. Na pakeha-nggu jia-aya ka peku pamàna-nja nyuda mbuu ndàbada, wànggua.
Currently Selected:
1 KORINITU 10: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
