2 Timotius 2
2
Timotius ebe Yesus emin hwedik welemagoluk, esa’go weregei wene
1Timotius nomlogo yo. Nis Kristus Yesus emin hwedik oruakma, Allah ebabut op en woknentasu a’ge ai pam hede hurlesogo wolomup o. 2An en wene aphwami esan enilem mo’gulhegismu wegen a’ge ano, hat en is aphwami logon enede he’berik a’ge en is logon mo’gulontogu lemagoluk, enebam pomup o. 3Ap weim obogwi a’ge onuelak eniak hologo weim obogulat, di obotut yu obotut hil-hil obogwi ’gela’ge, hat en Yesus Kristus iak hologo, di obotut yu obotut hasulat, hepe mosogoat taga lomup o. 4Is ap weim obogwi a’ge ai, onuelak ’gain onogola enagai houwagoluk, weim obogulat, di a’ge yu a’ge o pam a’ge eberak erlakma enat obogwi ai o. 5Ye, mesik e, sa omut oruak sa omut erlak pungtak lagalat, ap yo’go enebasu a’ge en,
“Disogo tu o,” oluk oso a’ge iak hologo lagai erlak holuk,
“Omut aga a’ge, ap yuat o,” oluk, o’go ’gare-’gare ’gela’ge ’buktak onobogwi a’ge ai ’buktak onobo mia o. We, iak hologo lagai holugat ’buktak onobo yo. 6Ye, mesik e, aphwami logon eniabuk worugulat, owi yorogulat set hoposogo togwi a’ge ai, ebe hurle agoam, onu’gwarek naduk no’gwi ai o. 7Wene an en mo’gulhegis a’ge ai, hede eberise lomma, nonue ’gain Onuk Logo a’ge en ’berlegat se’geksogo mo’gulhom a’ge oruak ai en, ebam eberise lomup o.
8An op wene mo’gulentil neselegi ai re, Yesus Kristus, at Daud en dogo’gwe a’geat ebe werigisema, Allah en elalugaptegei wene ai, hede eberak modok wolomup o. 9An op wene asogo mo’gulentil nosoma, is aphwami logon en, is logon wiak togwi a’ge tagonobo ’gela’ge, an di obotut yu obotut taknobogulat, ne’gik herle worogulat, togwi a’geat de, Allah iak ai herle hettu mia o. We, herle hebeligat oruak ai o. 10Ai en e, is aphwami logon Allah en poligenebesi a’ge, Kristus Yesus emin hwediktak poma re, enebe delenebiselat, enelaluk op modok welemagoluk, obabenebasulat, tuagoluk e, an asogo wiagapnobogukhweat, nepe mosogo welegi ai o.
11Wene disogo oluk ogwi yu re, demat o,
Nis at emin warege a’ge holuk,
at emin nenelaluk modok wolomulat o.
12 #
Mat. 10:33; Luk. 12:9 Nis nenepe mosogo wolomul holuk,
aphwami at eragam ’guarik welema a’ge ai,
nis emin enat tenentarok wolomul o.
Nis en e,
“Yesus nonue erlak o,” oluk, at ebe modok ukpul holuk e, at en e,
“Is an nosi erlagat o,” oluk, uknonobouwayat o.
13A’ge re, at u’gwarek en,
“An nebabut naduk welegi a’ge ai erlak o, oluk muat meneniso erlak ai en,
nis at ebam lo’boktak wolomul erlak holuk,
at en nis nenebam modok lo’boktagat welago yo,”
oluk ogwi ai demat o.
“We wene ukpoluk, dem wene aiat enesa’go werise lomup o,” oluk mo’gulesi wene
14Wene mo’gulhegis a’ge ai ’berlegat is logon onogola ebesogo mo’gulentasu lomup o. Mo’gulentasulat, we, eniak a’ge pagerat wene sorok ogwi ai Allah il pam enesa’go opsogo werise lomup o. Asogo sorok ogwi ai pam, op ema erlak o. We, is logon enesa’go holuarik, wiak emayat o. 15Allah en e,
“Hat an nebaget op taga legen,” oluk, mo’gulhemagoluk e, hannisogoat taga lomup o. Is logon di a’ge yu a’ge tuagoluk yo’go onobogwiam e, opsogo togulat, ene’gerli erlaksogo togwi ai ’gela’ge, hat en dem wene aiat hegitsogo mo’gulentasu lomup o. 16A’ge re, is aphwami logon en dem wene ai erlakmayat, we ’burlat, erlak ema a’ge paget ogwi ai, ukpoluk ’gwi-’gwani lasu lomup o. Is ai asogo ogulat, Allah ebe ukpoluk hegil-hegil ’bok lebagaiat o. 17Wene dem wene erlakmayat mo’gulontogwi a’ge ai, aphwami yebil dugenebisoam, ebema agalat lok-lok lasu ai ’gela’ge, is ai eniak asogoat ogwi ai pam is logon loksogoat wiagabonobogwi ai o. Ap Himeneus Filetus e’birek asogo togulat, 18dem wene ukpoluk ’gwi-’gwani lebagalat, is en e,
“Allah en aphwami werak a’ge enelalugabonobua oluk obok egei ano arat agama yu i o,” oluk, is logon mo’gulontogwiam, enede Allah ebam he’berik oruak a’ge wiagabonobogwi ai o. 19#Bil. 16:5A’ge re, Allah en o wa’gi ’gela’ge dalegei a’ge ningtak modok welema ai pam pelal disogo oluk wogo oruak ai,
“Nonue ’gain Onuk Logo a’ge u’gwarek eiyagai poligenebesi a’ge ai enebe aluk o,”
oluk egei. Ye, wene mesik e,
“Is logon en e,
An nebe nonue ’gain Onuk Logo a’ge orat o, oluk, ogwi a’ge,
Wiak tu nenebit o, oluk ukpoluk ’gwi-’gwani
’bok laga lemak o,”
oluk egeimu pelal wokho oruak ai o.
20O lok werik a’ge ogola re, di a’ge yu a’ge emas a’ge emin, perak a’ge emin, hele’gik a’ge o’go a’bik ai a’ge nak welago puk. We, e a’ge emin, ’gwiang a’ge emin, hele’gik a’ge ogo welago aiat o. Op a’ge tuogoluk holuk e, op a’geat wogulat, yogunat a’ge tuogoluk holuk e, yogunat a’ge wogulat, togwi ai o. 21Ai ’gela’ge re, sa u’gwarek en wiak togwi a’ge ai hosogo ukpoluk, ebe Allah paget poluk oruakma, at enat di a’ge yu a’ge op a’ge nak tik epasu holuk e,
“Arat op o,” oluk, yo’go pouwa ai o. 22Ai en e, hat e, is ap souwe a’ge en enebam aganhan agoam wiak togwi a’ge ai ukpoluk, hweiye lasu lomup o. Is aphwami logon enede mesigat op welat nonue ’gain Onuk Logo a’ge yo’go pogwi a’ge ai enemin la’bulogo wolomup o. Eneminat hegitsogo tagalat, hede Allah ebam he’berik welat, aphwami enebe enedesogo welat, aphwami enemin lioksogo welat, togwi ai a’geat motluk lasu lomup o. 23Asogo tagalat, is aphwami ado enede ebesik a’ge en wene eneperlak welat, wene ’balogwi ai ologun pam e, is-is emin weim ’gela’ge obogwi ai, enemin tu erlakma en ukpasu lomup o. 24At ap sa en nonue ’gain Onuk Logo a’ge paget tagalat e, asogo tu puk o. We, aphwami ’berlegat ebabut lioksogo enemin wolom o. Epe mosogo welat, aphwami wene opsogo mo’gulentasulom o. 25Asogo mo’gulentasuam e, is aphwami logon en e, at iak sebeluogoluk togwiam, at en iak lioksogoat enesa’go weriselom o. Asogo enesa’go werisoam, is wiak togwi a’ge ukpoluk, dem wene ai wouwagoluk, Allah en enede ’gagalua ya? erlak a, oluk enesa’go werisolom o. 26Asogo enesa’go werisoam, is enebabut heberlemarik, at Iblis ogola epasu a’ge togu lemagoluk enebe ’baik ’gume pam ’gotnok oso ’gela’ge ’gotnok egesa a’geat de, Allah en hebilogo lebikpou wayat o.
Currently Selected:
2 Timotius 2: Wul
Highlight
Copy
Compare
Share
Want to have your highlights saved across all your devices? Sign up or sign in
